JANGWAWM SI HKAI SUN KABA GALAW MAYU YANG

Namsi namsaw hpan amyu myu nga ai hta dwi ai, hkri ai, hka ai langai hte langai namchyim n bung ai, hkai sha ladat ni mung n bung nga ai. Dai majaw aten galu hku nna Jangwawm hpe hkai sun kaba hku galaw nhtawm hpaga yumga galaw lu na matu Jangwawm hkai ladat ni hte gara hku gawn lajang ra ai lam hpe ka shaleng na nngai.

Nam si sun kaba galaw sana ngu myit dawdan sai hte maren tinang hkai na namsi gaw kaning re ai lamu ga kaw hkai yang grau htap htuk ai ngu ai hpe hkaja ra nga ai. Dai majaw shawng nnan hku nna Jang Wawm Si hpe hkai sun kaba hku galaw mayu ai rai yang Jangwawm Si gaw kaning re ai lamu ga kaw hkai yang grau kaja ai ngu ai hpe lata ra nga ai. Dwi ai namsi hpan ni gaw dwi ai dat rawng ai lamu ga hkyeng ai shara ni hpe grau ra sharawng ai zawn ndai Jangwawm Si mung dwi ai namsi hpan re majaw dwi ai dat rawng ai lamu ga hkyeng ai shara hpe lata nna hkai ya ra ai. Lamu ga chyang ai shara kaw hkai ai rai yang Jang Wawm Si ni hkri mat shangun nga ai.

Jangwawm hpe hkai ai shaloi du hkra ladaw n lata ai mai hkai ai raitim ginhtawng ta hta hkai ai Jangwawm ni grau tu kaba, si kaja nga ai. Hpa majaw nga yang Jangwawm gaw jan hte nbung hpe grai ra ai namsi hpan langai mi mung rai nga ai. Dai majaw Jangwawm hpe jan shingkang lu ai nbung shinggang hpun n nga ai shara kaw hkai ya ra ai. Jangwawm gaw kaga namsi hpun ni zawn hkai na matu n yak ai sha n-ga, hkraw nyip mat na mung n tsang ra nga ai.

Jangwawm hpe hkai ai shaloi matsun kaw ga n shang hkra sadi nna hkai ra ai. Matsun kaw ga shang mat ai rai yang asi ni n chye kaba mat ai lam ni byin ai. Lamu ga hpe ram daw htu nna hkai ra ai. Grai sung htu nna hkai ai rai yang hpun ni si mat ai lam ni byin nga ai. Hpun langai hte langai hpe pe 1' mi daram shagang nna hkai ya ra ai. Hpun langai hte langai grai gang nna hkai ai rai yang asi ni kaba wa jang hpun n-gun n dang nna galau kadang mat ai lam ni byin shangun nga ai. Ahpun hpe pe 1' mi shagang nna hkai ai rai yang she namsi hpun ni kaba wa jang asi si tim hpun langai hte langai na alap ni hte shada shingdaw da, hkat lu ai majaw hpun ni kadang mat ai lam ni n byin shangun nga ai.

Jangwawm gaw shata 5, 6 ram nga ai hte asi kalang myin shangun nga ai. Ndai zawn hkai da sai Jang Wawm hpun ni hkraw kyip mat ai lam, asi ni n hten n yat mat hkra tinang gaw galoi mung gawn lajang ya ra nga ai. Gawn lajang ai hta kaga namsi namsaw hpun ni hpe zawn nhtu, shanghkawp ni hte n mai kahtam, n mai shawt ya ai. Hpa majaw nga yang hkai da ai jangwawm ni a aru ni gaw lamu ga grai sung ai de n shang ai sha ga n tsa hkan wam taw ai majaw aru ni hpe kahtam hkra shawt hkra kau na hpe tsang ra ai majaw re.

Jangwawm gaw kalang mi hkai da yang tinang lu gawn lajang ai hta hkan nna shaning galu hku aten na na asak hkrung ai hpaga rai shatai lu nga ai. Aten na na asak hkrung na matu laning mi hta kalang gaw dat namhpun bang ya ra ai. Namhpun hpe shata man 8,9 hkan bang yang grau htap htuk nga ai. Dat namhpun bang ai lam gaw ginhtawng aten jan gahtet wa yang alap hkyeng ai lam ni byin ai majaw ndai zawn re hpe shayawm lu na matu hpun hpe jau nna n-gun jaw ai lam re.

Dai majaw anhte mungchying mungshawa ni mung Jangwawm hpe sun kaba galaw nna aten galu hkai sha lu na matu Mung Seng Yang kaw ta tut Jangwawm sun kaba galaw nga ai Jan Maran Dai Nyi kaw hpaji hpyi san la ai hpe Laiza Shi Shanan hte htawn shalai ya nngai.

Ah Naw