CHYURUM WUNPAWNG AMYUSHA NI HPE SHADUM JAHPRANG SHAGAWP GA HTET

Ndum n mai hkum mau maa,
Myit hkrum ai hte yawng rawt saga;

Daini myutsaw ramma mi yawng,
Myitsu myitrawt shanhte kabrawng;

Ma ni hpe hkrai baw nawng n mai,
Myitsu ni yawng shanglawm ra sai;

Mungsang masa wunkat hpe hpaw,
Hpyen zai ladat hpaji mung jaw;

Mungkan mungdan kanang nga nga,
Myit hkrum ra sai anhte ma hkra;

Anhte kade myit hkrum ai hpe,
Ta tut sakse madun ai hte;

Prat tup jaw lup labau shang ai,
Laklai mahtai shapraw ra sai;

Lai sai ten hpe nhtang myit yu,
Myit chyum myit htum na lam chyu chyu;

Sawa hpyen ni zing-ri zing-rat,
Hkam sha nga ra anhte a prat;

Sat nat dingsa roi rip hkrum ai,
Sanit shi ning pyi loi jan sai;

Raitim moi na hte hkum shabung,
Panglai hka pyi tsap mi n sung;

Mabyin sakse madun nna me,
Tara n lang sawa hpyen hpe;

Du baw hka jun dara na gaw,
Ya ya aten nan rai sai law.

Jaw kun, shut kun nhtang sawn yu,
Teng ai mahtai lu na matu;

Anhte bai myit yu yang,
Mala la nan n jaw n ang;

Moi moi prat kawn anhte amyu,
Mungdan shadip lu da chyalu;

Kadai kaw mung n sa pra,
Tinang ginra tinang nga pra,

Madin jarit hpe mung n lai,
Ritkawp tara n shut n shai;

Masha wa hpe mara n tam,
Galoi anhte du baw n gyam;

Myit sanseng ga ai hte maren,
Sim sim sa sa nga ai aten;

Shanhte mahtang anhte hpang de,
Mungdan shinglaw shang bang na me;

Mungkam ting hpe shanhte masu,
N chye ai ni kaja shadu;

Raitim shanhte n hkru dik ai,
Daini mungkan ting chye masai.

Ya bai kalang shut mi ga,
N myit yu ai hkum sa kapa;

Chyahkyawn masu hkalem hkrum ai,
Bainam na bai anhte hkum tai;

Hpawlam shazai hpe hkum shapu,
Nang hpe shi bai nhtang daru;

Moi na jiwoi jiwa ni gaw,
Chyasam ga galoi n kam ai yaw;

N teng n ang n jaw ai hta,
Gwi gwi dara n den ja ja;

Ninggang hpye ai pyi naw n raw,
Kadai hpe mung asum n jaw;

Daini anhte hkum hkring kanyung,
Nem ai tingnyang kaw hkum sa dung,

Npu gum-un hkum sa aba,
Htawm prat dingsa mayam tai na.

Ref. Online (fb)
Zo lat