SHABA HPE ATEN GALU HKAI SHA MAYU YANG

Simai simaw hpan law law ngai ai hta na ndai Shaba hpan mung shat gawk kata shadu lu, shadu sha ai hta simai hpan amyu myu hku nna akyu jaw ai simai hpan langai rai nga ai. Dai hta n-ga gat shagu hta mung shaba si n dut ai gat n nga ai hpe mu lu ai.

Anhte Wunpawng amyu ni gaw simai simaw, namlap namlaw ni hkai shatut sha ai hta grai naw gawngkya ai, maigan amyusha ni hkai lu, hkai sha, hpaga yumga galaw ai hpe kasi la, n-gun la nhtawm myit su myit rawt ai hte hkai lu, hkai sha magam bungli galaw lu u ga matu yaw shada let aten galu hku hkai sha mai ai ladat hpe garan gachyan dat nngai.

Shaba gaw kahtet ai duhkra ladaw hpe ra ai rai nna aten galu hkai sha mai ai simai hpan langai mung rai nga ai. Raitim anhte a ginra ni hta gaw aten gadun hku sha hkai sha ai hpe law malawng mu lu ga ai. Shaba hkai ai shaloi atum hpe kalang ta jahkrat hkai mai ai zawn bawng bra la nna tinang ra sharawng ai shara kaw hkai ai ndai hpan lahkawng hku mai hkai ai.

Shaba aten galu hkai sha lu na matu gaw Siba si ni ga hte hkra gahtep ai lam ni n byin hkra shaba hpun tsaw ai hpan hpe lata hkai chye ra ai. Shaba hkai na shara ni hpe ga mani mat hkra shatsawm manat mani kau nhtawm maza mala ni asan sha hta jasan kau ya ra ai. Hka ing mai ai shara ni kaw rai yang hkai dik hpe tsaw tsaw galaw nna ga sau namhpun kaja shangun ai Dumsu hkyi ni hte hka bang nna atsawm sha gayau manat ya ra ai.

Duhkra ladaw kahtet shadang grai tsaw ai rai yang ga madi ai dat jaw na hte tsingdu tsingman n tu hkra makawp maga lu na matu yi hku, tsing jahkraw ni hte magap da ya ra ai. Hkai ai shaloi ana kanu, latung shingtai n sha ai, greng ai, tsawm ai hkai tum hpe lata hkai na mung ahkyak madung rai nga ai.

Hkai da ai, bawng da ai Shaba ni alap 5 daram pru wa ai hte shana daw maga htawt sit hkai ya ra ai. Shaba sun galaw da ai shara ni hta nbung pru shang hkrak na matu hpun langai hte langai hpe pe 2’3’ gang nhtawm yan langai hte langai hpe mung pe 3’4’ shagang nna hkai ya ra ai. Shaba gaw lamu ga madi ai dat hpe ra sharawng ai re majaw tinang hkai da ai Siba ni n si n sum mat hkra shani shagu hka tang du hkra jaw ya ra ai.

Hpun kaba wa na matu n-gun la nga ai aten Dumsu hkyi, nam hpun ni hpe bang nna ga bai pawm ya ra ai. Ana kanu, latung, shingtai n shang hkra shani shagu gawn lajang ai lam ding yang galaw ra nga ai. Hkai da ai Siba hpun ni nhtoi 60-90 ya na ai hpang asi ni mai di hpang sai re.

Shaba si di ai shaloi ginlang lawm hkra atsawm sha sadi nna zen di la ra ai. Kam ai hku gang abrut di la ai rai yang Siba si ginlang hte Siba hpun lakung matut ai shara ni hta ningma kap mat jang ana kanu ni shang nna Siba hpun si shangun ai lam ni byin wa mai nga ai.

Anhte Wunpawng amyu ni kaga masha amyu ni a hpaga yumga sharawt ya ai hku n re sha, tinang nan ja gumhpraw lu tam ai; dinghku kata maga mi hku sha pyi kapa lu hkra hkai lu hkai sha bungli hpe ladat jaw jaw hkai sha lu na myit mada let hpaji ginlen dat nngai.

Ah Naw