NGWI PYAW AI HKRISTAN DINGHKU HPE SHA

NGWI PYAW AI HKRISTAN DINGHKU HPE SHA

BUM SHANGHKAWNG

DAW (1)

Katsi pyaw la ai Ginhtawng lana mi hta rai nga ai. Htoi san ai myihprap wan npu kaw, kun dinghku nta masha ni shana yup akyu hpyi na matu, hkyen nga ma ai. "Kanu e - ma ni pyi yup akyu hpyi na matu, yawng ala nga ma ai. Nang she hpang hkrat taw sai lawan rai wa rit" "E law - Ngai mung, chyum laika lata taw ai she rai yang" nga nna wa dung ra ai. "Um - Daina gaw, anhte nta ni yawng hkrum ai hku rai nga ai. Dai majaw, akyu garai n hpyi yang, nanhte ma ni hpe Wa! ga loi mi tsun mayu ai. Dinghku kata kanu kawa, kashu kasha ngu ai gaw, tsun ra ai kaw tsun, sharin ra ai kaw sharin, bawngban jahkrum ra ai lam ni hpe tinang hkrai myit ung ang taw nga ai baw prat n rai sai. Daini gaw Globalization prat, Global Idea prat, Internet prat rai sai. Anhte Wunpawng sha ni mung, Ginru Ginsa prat kaw nna, Hkristan tai Karai Kasang hpe nawku kam sham wa ai shaning latsa ning jan wa nga sai. Jinghpaw Wunpawng chyum laika sharin jawng hpaw hpang ai pyi (100) ning hpring na maga de rai wa sai. Dai ram ning du wa tim, an nu, wa ni gaw, chyum jawng lung yu ai mung, langai mi pyi garai n lawm nga ga ai. Ya daini gaw, nan nau ni yawng, hpaji chye ai hkrai rai sai. Dai majaw, num wa ram ai ni num wa, numla ram ai ni numla, Chyum jawng lung na ni lung rai na matu, myit yu saga, ngu mayu ai re". "Kawa e! - Nang gaw law - Ma ni hpe wa mi dai zawn ngu ai gaw, Num sha ni hpe gaw, hpyi ai ni nga yang jaw ya sha baw she rai yang mi. La sha ni hpe gaw hpyi ya na rai nga ai le taw".

"Kanu e - Ngai ngu mayu ai gaw, dai hku n re. Ma ni hpe ahkaw ahkang jaw ra sai. Tsun ga nga yang, daini anhte ka lang nga ai hkrungran poi shaga laika gaw jaw sai. Raitim, anhte galaw ai lai n jaw nga ai". "Ya - Masha hpe mara bai jaw wa re sai. Hpabaw n jaw ai rai?" "Mayu Dama lahkawng maga myit hkrum sai hte maren, ngwi pyaw ai hkristan dinghku de ya na ga ai nga ai gaw, grai jaw sai. Dai kaw myit yu ga. Ngai chye na ai gaw, numsha yan lasha tsawra hku hkau nga sai hpe kade nde na kanu kawa ni myit hkrum lawm Htunghking hte n shai, makam masham hte bung pre ai dinghku de ya ai hku she chye na ai. Kaja wa byin wa ai gaw, numsha hte lasha yan mu pyi n mu yu ai hpe kanu kawa ni adip arip wa n di tim, shagwi nna mayaw htinggaw de ya ai lam byin taw nga ai. Dai sha n rai, ngwi pyaw ai hkristan dinghku n byin ai sha hkungran poi ngut ai hte rau dai dinghku gaw, Hpu ja hka wa ra ai. Poi galaw ai hka wa ra ai hta n ga, shada da tsawra hkat nna, la ai n re majaw moi an lahkawng zawn, shada da mara tam nna, gali galaw nga ai Satan dinghku she byin mat nga ai. Dai majaw, anhte amyu sha ni a numwawn numla lam hpe sharai ra sai ngu ai rai nga ai." "Ataw Kawa - Nang gaw gara hku byin shangun mayu ai law" Amyu hte htunghkring hpe hkungga tsawra ai majaw, num wa ten hpe ganoi shalai kau let, jawng Sarama galaw nna, Dama ni hpyi na hpe sha ala nga ai shayi Hpraw sha gaw, kawa gara hku tsun wa na kun? ngu ai hpe na lasha let madat nga ai. Kawa gaw, ja chyum laika buk hpe galap nna, (Kor.13:3-13) hpe hpaw hti dan nna, bai matut tsun wa ai.

"Uhm - Ngai gaw, num sha ni mung tinang tsaw ai ra ai hpe tam, la sha ni mung dai hte maren, shada da tengman tsawra ai hpe mu hkrum nna, myitdik sai nga jang, kanu kawa hpe tsun. Dai hpe kanu kawa ni shada kasa dat jahkrum la nna, Htunghking hte n shai, makam masham hte bung pre ai, kun dinghku shabyin mayu ai re. Wa tsun ai hpe nanhte chye na sai n rai?" "Chye na sai Wa" "E-e- nanhte chye na jang chye na ai hte maren galaw ra ai. Dai gaw Wa ra sharawng ai re. Wa ra sharawng ai hte Wa gaw, galaw na re. Nanhte hpe mung Wa sadi jaw ai chye na ai i?" "Chye na sai Wa" nga nna, yawng hte wa kabu gara hkap htan ma ai. Dai hpang shanhte gaw, yup akyu hpyi hpawng hpe hpang mat wa ma sai.

DAW (2)

Nampan Sun Makau grup yin hkan tu nga ai kadung hpun ni gaw, htoi hkyeng pu tsawm let, Nshung ladaw hpe mawn sumli ya nga ai. Dai pu tsawm kadung pu ni hpe Chyu let, ntsa pyen u ni mung ladaw yu ngwi hte shapyaw nga ma ai. Mara kata ai tsaw myit hte pyaw chyai nga ai U ni hpe yu n law na zawn rai nga ai. Lamu ganghkau de mada, summwi sumla ni hkawm chyai nga. Grup yin de yu dat yang, nampan pu ni gaw, nsam hkum sumhpa hte pu tsawm nga ma ai. Dai nampan pu ni a ntsa pyen pyaw ganawng chyai nga ai palam la ni hpe yu let, shadang Ja Li Awng langai sumru mungkan de du mat wa nu ai. “Htaw - Tsaw dik ai lamu ganghkau e - pyaw hkawm nga ai hpraw tsawm summwi ni mung, nbung bungli e gawut shapoi ai de hkan nang ra nga ai. Kanang du hkra hkan lu na. Hpang jahktum e gaw, Sungdik ai panglai nammukdara de sha bai du ra mat nga ai. Tsaw ai ni nem, shawng ai ni hpang, n grin ai shingra tara wa. Shinggyim masha ngu ai mung, dai zawn sha madang gin hka shara, shakawng shingjawng shara hpa wa mi nga na rai ta? Oh - Nampan pu ni a ntsa palam la ni wa, tsawm htap ai nsam amyu myu sumraw nna, pyen pyaw nga ma ai. Shanhte shada da n ju n dawng, shakawng shingjawng ai lam n lawm nga ai. Shinggyim masha ni mahtang she, palam la ni a singkaw hpe yu nna, tsawm n tsawm ginhka ya nga ma ai. Nampan pu ni mung tsawm la ai nsam amyu myu hte manam pyaw la ai sama ni hpe shapraw let, mungkan hpe mawn sumli ya nga ma ai.

Shanhte shada da n ju n dawng gumrawng gumtawng, tsang madang ginhka myit n rawng nga ma ai. Shinggyim masha ni she shanhte ra ai hta hkan nna, manu dawdan ya nga ma ai. Gaida kasha, shinghkra kasha ngu ai n nga nga ma ai.” Sumnung shingdi, hkam sharang ai myit hpe arawng shatai nna, shakut shaja let, masha ni e tak kaji ai bungli, Nampan sun hpe madung dat hkai shatsawm nga ai Ja Li Awng langai, kalang lang gaw “Nye aprat wa! palam la shing nrai, nampan pu langai lama rai yang, kade sha pyaw na” ngu myit sumru lu nga nu ai. Shi a myit hta mung, machyin jinghku, manaw manang ngu ai ni hta nna, palam la hte nampan ni hpe grau hkuhkau tsawra myitdik nga wu ai. Shi a sumru mungkan hpe n myit mada ai nsen ni e jahten kau dat ya nu ai "He¬-Htaw masha langai gaw" "Musai - Naw tsamai sai wa re" Nsen poi sa wa ai maga de Ja Li Awng n dum ai sha kayin mada dat wu ai. N myit mada ai sha num sha lahkawng lahkrip ran ran rai hkawm sa wa ai hpe mu dat ai hte rau, Ja Li Awng mau mat nu ai. “Hpabaw galaw sa ai ni i? Hpabaw manghkang bai du ra ai kun? Tau hkrau gawn kau ra ai madung rai na re” ngu myit lu ai hte... "Nampan mari na matu sa ai rai yang, wa mu! Anhte sun kaw nampan n dut ai" ngu marawn tsun dat ai hte rau - shan lahkawng gaw... "Kaning re ai masha hte katut sai kun? An pyi hpa rai n tsun shi ai wa mi, Grai Zai sharat nga ai le-" "Ah gu- Nampan mari sa ai n rai ga ai" "Hpabaw Ah-gu da aw? shachyen pyi shachyen yu ai wa mi - Ah-gu da! kaya mung n chye - Nanhte Jinghpaw laika n chye ai i? Sunwang chyinghka lam kaw AHKANG N LU YANG, KADAI N MAI SHANG AI ngu ka da ai hpe n mu ai i?" "She mu le" "Dai rai yang, hpa tam sha shang wa ai i?" N dum ai sha Ja Li Awng a nsen ni gaw jawa nga ai Numsha yan mung n mangai ai she rai nga ma ai.

"Dai hpe chye ai majaw, Ahkang hpyi nna shang wa ai re" "Kadai kaw ahkang hpyi ai" "Ndai Nampan Sun na pru wa ai La sha ma hpe lajin nna, shang wa mu nga ai majaw, sa wa ai re." Ja Li Awng kaning n chye di sai. “Ndai gaw, Lachyau Gam e maw ai manghkang nan rai sai.” "An hpe chyeju hte garum la na hpyi lajin ga ai." "Chyeju ni hpa ni hkum tsun nga. Hpabaw galaw ya ra na." "Ndai Sun jut ang kaw du ai hte modaw sengke hten mat ai kanawng mung n mai mat sai. Dai hpe yu gram ya na myit mada ai" "Ha! Dai nga yang, n lu garum ai. Ngai gaw, nampan hpun amyu hpe sha chye hkai ai, chye lakawn ai. Jak hte seng ai ngai n chye ai, ngai gaw Bum masha sun hkau na la she re." Numsha lahkawng mau mat masai. Shi chye galaw ai lam hpe gaw, Lachyau Gam tsun ai majaw chye da nga ai tim, ngai tsun ai ngu hkum tsun nga ai re majaw, myit yak nga ma ai. Raitim n tsun n mai nga sai. Jan mung du wa nga ai. "Grai gaw n wam ai. Kaning n chye di sai. Mayat na la sha wa tsun ai. Ah-gu gaw, modaw pyi chye gram ai nga ai le. Raitim numsha ni hpe gaw, shi masu na re. Raitim, atsawm ngu lajin yang, grai garum chye ai wa re nga tsun ai le - naw garum la rit ngu grai lajin ai yaw" “Nan hpe ngai masu ga n tsun ai.” "Sengke n chye gram ai modaw gaw she gram chye law, Modaw hte Sengke kaga ga re." "Raitim, mai byin ai hku naw garum la na lajin ai law. Chyeju gaw n malap na ga ai." Ga shaga ai she, grai zai la ai zawn nga tim masha hpe garum shingtau mayu ai myit matsan dum chye ai myit hpring tsup la ai, Ja Li Awng kaning n chye di mat sai. Num sha yan a hpang hkan nna, modaw sengke nga ai de sa wa nga ma ai. Numsha yan gaw, putsawm nga ai nampan ni grai di la mayu nga ma ai. Raitim, ndai sun kaw kadai hpe mung nampan n dut ai nga ai hpe chye da sai re majaw n tsun gwi nga ma ai. Ja Li Awng - Sengke hpe gram taw nga ai.

Ga san ja la ai numsha gaw, n rau nga ai Ja Li Awng hpe masin achyaw dat ya nga ai. "Ndai sun kaw nampan ni hpe n dut ai nga yang gaw, tsawm na matu san san lamuga lahpawt hkai da ai rai sam ai i?" "Nampan hpe manu shadan chye nna, tut nawng sa mari nga ai nampan dut laksan ni hpe sha dut ya ai. Numlet numhprang ni kadai hpe mung n dut jaw ai kumhpa pyi kadai hpe n jaw ai." Nga tsun let, Ja Li Awng gaw, sengke hpe jak sharawt yu, jawn chyam yu di yu nga ai. "Gai gai.... Hkri kaba yan - kaja sai maw" ngu apya dat wu ai. "Grai Chyeju kaba sai. Gara hku chyeju dum ai baw rai kun?” "E-e- Chyeju dum mayu ai nga yang gaw, ndai sun de galoi hkum sa sa. Dai gaw chyeju dum ai rai sai. Azim sha nga mayu ai gaw, nye a ra sharawng ai lam rai li ai. Masha ginjang na hpe n ra ai." Nga tsun let, Ja Li Awng langai shi a nampan sun maga de kayin mat wa sai. Numsha lahkawng gaw, mau mau rai nga ma ai. Langai jan wa mahtang n kam hkam sam ai. "Nye prat hta ndai lang gaw, la sha ndai hpe asum jaw kau ai hku rai sai. Tim lani mi ngu hta she rai yu u ga" "Hpraw sha - e - chyeju madu- langai rai sai hpe wa dai zawn gaw hkum tsun le." "Tsun na - tsun na - sa sa - lawan jawn u" nga nna rawt mat wa masai. Nampan sun kaw nna, nau n tsan ai kaw du yang, shanhte shawng e hkrum ai la sha hte bai hkrum ma ai. "Hkri kaba yan, gara hku rai sata? Zeng rai sai i?" "N zeng tim zeng ai hku rai sai.

Grai chyeju dum ai yaw. Dai gaw rai sai. Na a sara wa gaw, kaning re masha hpan rai ta? Num n ju Ninghkring she rai sam ai. Banli banla ndi nda hkrai nga ai wa i? num hpe grai n ra sam ai." "Hpraw sha dairam gaw, n tsun ga le. Daini na an a chyeju madu ngu tim n shut sai re lu." "Seng Zin e - nang nang wa dai ram hkum maga yu u." "Hkri yan e - dai ram gaw n rai na re. Msha kaja re. Nan shi a lam atsawm garai n chye na she re. Ya hpangde chye na ra ai. Shi a mying gaw, Ja Li Awng da hkai sun dakkasu na pru nna, kanu kawa ni yaw da ai numla na hkyen ai she, num sha jan mahtang maigan la hte hprawng shakram kau da ai nga kun! nga ai rai lu ai. "Ah goi law - matsan dum hpa she rai re nga ai i!" "Hpraw Sha ya jang matsan dum grai lawan wa i! Sa sa lawan wa saga. Jan du wa sai.” Nga nna, Lachyau Gam hpe sha shakram kau da rai yawng mat wa masai.

DAW (3)

Nampan sun de du shang wa ai hte rau, Lachyau Gam gaw, Ja Li Awng e hkap ahkre ai katut nu ai. "Lachyau - e - nang gaw Na a mying hte nan shabung nna, Lachyau a hka tau" nga ai hpa, shara shagu manghkang hkrai shapraw nu ai. Dai numsha yan hpe hpadi ngai hpang de dat dat ai rai. Nye lam n chye ai mung n rai. Nye ga n kam madat yang pru wa u.” "Hkau Awng - ndai lang mara raw ya rit. Yakhkak hkrum ai ni hpe garum ai gaw, akyu lu ai ngu nna rai nga ai.” "Shanhte hpa byin byin nang hte hpa seng ai. Nang hpe gara hku ritkawp jahkrat da ai. Malap sai i?" "Hkau Awng - Hpang de galoi n galaw sana. Shana shat naw shadu na yaw! Hkau Awng” nga nna, Lachyau Gam gaw, lawan ladan rai rawt mat wa sai.

DAW (4)

Sarama Hpraw Sha langai, shana tup shani byin ai lam ni hpe nau sumru kau ai nga yang jahpawt yup rawt loi hpang hkrat wu ai. Shi rawt yu yang, shi hte rau nga ai jawngma nkau mi pyi Sunday school sa ai de na du wa mara ai. Sarama Hpraw Sha mung, shajin la nna, nawku jawng de sa mat wa sai. Nawku jawng de na, Sarama Ja Seng Zin hte du wa nna, jahta bu nga ma ai. Jawngma ni mung, Sanpoi ni wa sai majaw, laika sha kut nga ma ai. "Seng Zin! Mani na mahkrum madup hpe grai nan n rai dum ai." "Hpraw Sha, dai hpe hkum myit nga sa, hpadi na hpang de bai hkrum na mung n rai sai mi." "N re ngai gaw hkrum nan hkrum hkra di na, hpawt ni jawng pat ai. Bai sa ga" "Sa ga-law na i?” “Ngai gaw hkrit ai. La hkrai nga ai de wa mi, N hkan ai yaw" "Seng Zin- Ngai hpe hkum akrai, dai wa hte hkrum hkra sa na, jinghku byin yang byin, dai n rai jang majan byin yang byin. Hpyen tai yang tai." "E-Nampan n dut jaw na nga ai wa hpe nampan kumhpa jaw rit ngu na i?" "Hparai rai law. Sa nan sa na, tinang yak ai shaloi garum ai hpe gaw chyeju dum ra ai n rai i?" "E-law- chye na ya sai. Nang hkrai sa su yaw" nga jahta nna, nau n na yang Ja Seng Zin gaw wa mat wa sai.

DAW (5)

Sarama langai jahpawt jau jau rawt nna, nbaw shat kabaw sihtu shatmai sipa ni makai jahtuk la rai nna, sengke hte den mat wa sai. Modaw lam kaw nna, numshe de shang wa ai hte rau, Lachyau Gam hpe mu dat nu ai. Sengke hpe jahkring la nna: "He! gara de law"- "Taw! Ah hkri nang mahtang gara de sa na ndai de hpa sa galaw ai." "E-Nang tsun ai Ja Li Awng ngu ai wa kaw, Nampan kumhpa sa hpyi na ngu sa ai le-Nampan sa hpyi na ngu sa ai le- Nampan n dut ai nga ai majaw, majoi sa hpyi la na ngu ai le"- Dai ga na ai hte Lachyau Gam hkrit mat nu ai. Shi sa na de sa mat wa sai. Sarama Hpraw Sha mung lai mat wa sai. SUT SHALAT NAMPAN SUN nga ai Nban Jun (Pyendau jun) da ai kaw du ai hte Sengke hpe jahkring nna, wang chyinghka de kanawng sa wa wu ai. Masha nga ai n mu ai majaw, chyinghka hpe hpaw na hkyen dat ai hte rau "He! Kanang sa na? Kadai hte hkrum mayu ai?" "A lu- grai kajawng kau sai." Sarama Hpraw Sha n myit mada ai maga de nna, Ja Li Awng pru wa ra ai. “Tinang hpang maga myit magaw rawng ai majaw, kajawng ai rai na re.” "Myit magaw gaw n rawng ai law. San seng dingman ai myit hte sa ai she re." "Gara de sa na" "Sut shalat nampan sun de" "Sun kata de shang ahkang n jaw lu ai" "Kata de n shang lu tim, hpa n ra ai. Ja Li Awng ngu ai wa hte shaga lu jang rai sai." "Oh-Nang gaw, nye a mying hpe pyi chye nga ndai le-i! Nang hte ngai tsun chyai na lam hpa n nga ai." "Hku hkau ai hpang gaw, tsun chyai she n ma na rai nga ai le-i!" "Ngai nang hpe n hkau mayu ai.

Nang hte hkau nna hpadi na" "Dai nga jang mung Ga-law hkat ga le" "Ga law ai, gasat hkat ai ngu ai hpe ngai grai n ju ai n kam ga-law ai" Sarama Hpraw Sha - myit hpe awai la let, "Oh - ngai hpe mara naw ya rit yaw. Ngai gaw ma ni hpe ahkre man ai majaw, ga ja ai she re. Dai hpe chye na ya na kam ai." "Oh-Nang mung, ngai hpe sagawn taw ai hku i?" "Nang jawng Sarama re ngai chye ai." Ja Li Awng gara hku ngu na myit yak sai. Grai zai ai sat lawat hte gawt kau nga yang mung, masha gawt ai shingna n nga ai. Gwi gawt ai shingna she nga ai nga ai bai rai. Tinang kaw shagrit shanem na sa ai masha hpe n hkap tau la ai gaw, Shinggyim lai bai rai na n tai nga ai. Ja Li Awng dai hku jahkring mi mau nga yang, Hpraw Sha gaw, Sengke kaw na (Ka tawng)/ (Ka shingkra) langai lang nna, rai wa ra ai. "Ndai hpe gaw, hkap la ya rit yaw. Mani an Seng Zin hpe garum dat ai majaw, Chyeju dum ai shat lit hku mung, Jinghpaw shadang langai madang dep ai Nampan sun galaw shakut nga ai hpe shagrau sha-a ai hku nna mung, shagrau ai chyeju dum kumhpa hte shachyen shaga shat kada re." nga nna, shi baw gun ai shat shingkra (ka tawng) hpe ap ya nga ai. Ja Li Awng gaw, n hkap la ya yang mung, kaya mat na hpe mung matsan dum rai nna, ga hte hpawn ngu hkap la ya nu ai. "Hpa baw hpe yaw shatawng shada gyam mayu nna, ndai zawn galaw ai rai ta?" "Shatawng shada ai lam hpa n nga ai.

Gyam ai mung n re. N tsen yang gaw, ndai shat kada hpe ngai shawng sha dan nga tim, sha dan lu ai. Kaja wa tsun ga nga yang rau sha na matu, ngai nan shadu nna la sa ai re. Anhte Wunpawng sha ni gaw, gun sa ai magun shat lit hpe rau sha jawm hpya sha ai lam gaw, dai shatlit kaw, si wa ai baw, hten wa ai baw n lawm ai. San seng tsawra myit majing hpe madun ai lachyum re da le" "Um ya gaw, magun shat kada hte htinglu htinglai lam galaw sai majaw, sun kata de shang ga ngu na mung yi wa kata la langai sha nga ai. N hkrit yang gaw hkan nang rit le" "Kadai wa n hkrit ya dam ai" Hpraw Sha langai, Ja Li Awng a hpang hkan nna, Nampan Sun yi wa de sa wa nga ma ai. Yi wa kaw du ai hte Hpraw Sha mau mat sai. Shi shaga ai lai kyang hte yi wa kata galaw da ai lam ni gaw, kaga ga rai nga ai. Grai madang tsaw ai, grai si mani ai hku hte Ja Li Awng a tsang madang gaw, shi n tsun tim, chye ya lu nga sai. Ja Li Awng gaw, chyeju dum shagrau kumhpa shat kada hpe sha ku (shat sha saboi) ntsa kaw atsawm sha tawn dat wu ai. Dai hpe Hpraw Sha gaw, Ja Li Awng hpa pyi n tsun ai. Lajang bang wa sai. Dai hpe yu nna yu mau nga ai. N chye shamying mat nga wu ai. "Lajang ngut sai. Shat sha ga." "Um - Nta madu gaw, Nang i?" "Dai hku mung n re ra ai hpe ra ai hku lajang ai she re." "E - e rai sai. Shat garai n sha yang, galaw ra ai langai naw nga ai" "Hpa baw galaw ya ra na kun? Shum agam yaw" "Hpa agam na lam n nga ai. An lahkawng Jinghpaw ga shaga ai yan hkrai re majaw, shachyen shaga ai lam naw galaw ra ai." "Dai nga yang, shat ni hpe ji-nu sha wa na rai nga" "Tsang n ra ai ji-nu n nga ai.

Aten la mung n ra ai. Akyu shawng hpyi ga". Shat sha akyu hpyi ngut ai hte:- "Uhm - Ya hkri hte gaw, kaning ngu shaga ai baw rai kun Ngai gaw, Maran Nmwi kasha re. Htinggaw mying mung Maran ni sha re. Nye a mying gaw, Ja Li Awng nga ma ai." "Ngai gaw, lahpai kasha re. Htinggaw mying gaw, Hpunggan ni nga ma ai. Shaga mying gaw, Hpraw Sha Ninghkawng ngu nu yan wa jahtawng htu nna shamying da ai re nga ma ai." “Uhm- dai rai yang gaw, Nu a amyu ru sai ni she rai re nga ai. Nu a amyu ni re majaw, mayu kasha ngu ai baw rai nga ai, Ah Gu ngu rit yaw." "E - e - Ah Gu Awng ngu ga i! Bai nna Ah Gu nang hpe naw san na. Kanu amyu ni hpe gaw, mayu rai sai. Dai rai yang, kawa amyu ni hpe gaw taw?" "Kawa amyu ni hpe gaw, Kahpu kanau, kagu amyu ni hpe gaw, da-ma da" "Oh - dai rai yang, Ah Gu Awng ni gaw, dama rai nga ai i?" "Re- Ah Gu Awng gaw, da-ma nan rai sai. Gai - gai shat sha saga." "Ah Gu Awng ngai hpe n tsen ai zawn nga ai. Ngai shawng chyam na she Ah Gu Awng sha u yaw." "N ra ai. N ra ai Ah Gu Awng kanam Hpraw Sha Ninghkawng hpe shala ai she re.” "Ah Gu Awng! Kanam ngu ai hkum shalawm le- Hpraw Sha ngu yang ram sai" "Shat, shat mai grai mu nga ai. Ndai zawn mu ai n sha yu ai grai na sai" "Mu tim n mu tim, chyeju madu langai hpe chyeju dum let, rau sha na ngu, Hpraw Sha nan shadu ai re." "Grai chye shadu nga ai le" "Nau rai hkum shakawn yaw.

Shakawn yang latsawn ai da. Nau Hkawng yang adawng a ngang re ai da lu" "Shakawn ai n re teng ai hpe tsun ai she re." Shan lahkawng shat sha ngut nna, Sun de wamhkawm ai kaw na Yiwa de bai du wa yang, Lachyau Gam garai n du wa ai hpe mu nna; "GaLachyau Gam ndai ya mung n du wa. Hpraw Sha lama n sa yang, daini gaw shat n gatut ai baw she rai sai. Grai chyeju dum ai yaw" "N ra ai gaw e, kaja wa - Ah Gu Awng - Ngai hpe ahkang naw jaw rit- Ngai naw sana." "Mai nga ai le-Oh-garai naw jahkring mi dung u." nga nna Ja Li Awng rawt mat wa sai. Hkring mi rai jang, grai grai tsawm ai nampan shabawn lang nna, pru wa ra ai. "Hpraw Sha! manu n dan tim, ndai nampan kumhpa hpe hkap la ya rit yaw." "Grai chyeju kaba sai" Kaja wa nga yang Hpraw Sha gaw, nampan kumhpa hpyi mayu ai rai nga lu ai. Ya chyawm n hpyi ai sha lu la ai majaw, n chye tsun hkra kabu mat nga sai." "Ah - Gu Awng naw wa sana yaw." "Chyeju kaba sai. Gwi yang gaw, bai sa chyai yaw." Hpraw Sha langai, Gwi yang gaw, ngu ai gasi hpe n na ra nga wu ai. "N gwi tim, sa chyai na yaw" ngu tsun let, wa mat wa sai. Ja Li Awng mung, n yu masu let, hkan yu dat nga ai.

DAW (6)

Hpraw Sha langai, shi nga ai shara de du wa ai hte, hka shin la nna, Ja Seng Zin hpang de sa mat wa sai. Nampan kumhpa shakawng mayu nna rai nga ai. "He! Seng Zin"- "Share shagan Hpraw Sha! shang wa rit" Seng Zin gaw, shi a manang ni hte jahta nga yang, Hpraw Sha du shang wa ra ai. Manang ni nga ai majaw, grai shakawng mayu raitim, Saranum sari lang let, zim rai sha dung nga ai. Manang ni mung, Hpraw Sha du ai nau n na yang, wa mat masai. Hpraw Sha shakawng na ten du sai. "He- Seng Zin! Nang n hkan ai grai sum sai." "Hpa baw sum ai." "Ja Li Awng ngu ai Ah Gu hte atsawm sha hkrum sai. Padang mung dip la sai. Nampan kumhpa mung lu sai. Nang lama sa yang mung, nampan kumhpa sha gaw lu na wa." "N sharawng dam ai. Dai zawn nga ai la kaw na gaw, hpa mung n ra ai." "He-Seng Zin! dai hku n re! mani anhkrum ai Ja Li Awng hte daini ngai hkrum ai Ja Li Awng gaw, n bung la mat ai le." "Hpraw Sha- Hpraw Sha- Ngai n kam tsun ai yaw." "N re law. Grai shai ai. Bai na Shi a nampan Sun kata de le grai pyaw ai she re gaw, Shi a sum yi wa mung, nta kaba law, Hka n-gun hte galaw da ai myihprap wan lu ai. Nampan hpan mung grai law. Shi hkai ai gaw, Nampan sha n re. Hkai n mai grai hkum ai." "Hpraw Sha- nau wa n lai wa ai i?" "N re law teng ai hpe tsun ai, kaja wa-ya na bat (6) ya shani chyawm dai de sa chyai ga i!" "Mai ai law. Manang tai hkan nang ra yawng gaw, sa ga le," ngu nna, yau la nu ai. Ndai zawn, Hpraw Sha gaw, sut shalat nampan sun de Ja Seng Zin hte rau sa dat. Shi hkrai sa dat. Shi hte rau nga ai jawng ma ni hpe woi nna sa dat rai nga ai gaw, shata kawn shaning de rai wa sai.

Kadung pu wai nna, lamungpan ni kalang bai pu wa ra ai. Sut Shalat Nampan Sun madu Shd. Maran Ja Li Awng hte Sarama Hpunggan Hpraw Sha Ninghkawng mung, n ju masu su shata chyai ai kaw nna, kaja wa, wa la kun dinghku de na madang de du mat wa masai." Hpraw Sha gaw, Ginhtawng jawng dat ai hte kalang ta nta buga de wa mat sai. Nta du wa ai shaloi, kawa sadi jaw da sai hte maren, kawa hpe tsun na n wam nga nu ai. Kanu hpe ngu yang mung, kanu grau nna n kaja ai re majaw, n tsun wam nga wu ai. Dai majaw, shi grau myit kap la ai kawa a kanau, kamoi shawng Ningmwi jan hpe share grau na myit dawdan nu ai. Kamoi Ningmwi jan mung, kanam Hpraw Sha sa jahkrum ai hpe grai kabu nu ai. Dai majaw, kayung wa hpang de lung wa nna, Hpraw Sha myit da ai lam hpe hpaw tsun dat wu ai. Shaloi: Kahpu ba Hpunggan Seng Du gaw, ndai lam hte seng nna, lai wa sai lahkawng ning hta, shanhte ma ni hpe lam madun lit jaw chyalu re. Dai hte maren, galaw na lam sha nga ai." "Hpuba gara hku tsun da ai hpe mung n chye ai wa ni gaw" "E- Nnam ni hpe san yu mu. Gai gai- Ma ni numwawn num la, num wa num sa lam hte seng nna, moi Wa tsun ai hpe nanhte naw dum ai i?" "Dum ai wa" nga nna, Hpraw Sha htan wu ai." "E dum yang gaw, nmoi hpe tsun dat yu mu" "A moi shawng - moi Wa tsun ai gaw ndai hku re:” "Oh. Dai rai yang gaw, Hpu Ba lajang tawn da ai lam grai kaja nga ai le." "E dai re majaw, Nang Bang nang gaw, Dama maga de lit la u. Mayu maga de gaw ngai lajang na.

Anhte amyu ni a numwawn numla htunghking hta byin nga ai masa gaw, Kanu Kawa ni hte Gawkdung Salang ni, Kasa ni a lapran kaw, shada da myit tau hkat shalai kau ai majaw, yak ai she re. Lang nga ai Hpu ja mying ni gaw, n mai shamat kau ai. Ndai Hpu ja ni gaw, moi anhte.myu sha ni lang yu sai. Lu yu sai ngu ai kumla hpe madun ai re majaw, tuphkrak lang nna, manu jahpu hpe sawn sang htap htuk ai hku lang ra sai. Nang Bang e- Dama de gaw na lit rai sai:" "Lit la sai. Hpu Ba. Ndai Ja Li Awng mi gaw, Nhkau a kawa ji, Ma Naw a kasha she rai yang mi." "Dai hpe ngai chye ai. Dai majaw, Ndai Hpraw Sha hpe Ja Li Awng Sun galaw ai buga de bungli ang na matu, Hpaji du kaw ngai sa tsun la ai she rai yang wa mi." "Oh aw- Hpu ba chye na sai. Dama maga lit la sai. Nhtoi jahtuk na sa na ga ai." Nga nna, bungli garan let, shanhte a bawngban hpawng shangut la masai." Oh- Jinghpaw Wunpawng chyum jawng hpaw lu ai (100) ning hpring Jaw Masat hpang na, Wunpawng amyu sha ni a Htunghking hte makam masham hta lak lai bawngring rawtjat wa na hpe ala nga let, Ja Li Awng yan Hpraw Sha Ninghkawng gaw, shan lahkawng myitdik tsawra nga sai hpe kade nde maga na kanu kawa Jinghku ni myit hkrum lawm nna, ngwi pyaw ai kun dinghku de na hpe ala nga na masai rai.