MYITKYINA NINGTSING
BAWK TAWNG
2007 ning maji ta praw hta, Wunpawng hkumhpa laika ka shiaggyin hpung de Myitkyina manau sa na saw shaga laika langai du pru ai majaw, kabu kabu nga ai hta n -ga, loi mau mau mung ngu ai myit hte sara ma Hpan Ja hpe "Daining gaw ntsawm ai ni hpe mung sa shangun sai da i ?"Ngu nna sa san dat yang, sara ma mung "Rai sam nga ai! "Nga nna bai htan u ai majaw, saw shaga laika kumhpa dai hpai nna, rung du wa hpang de hkang bai sa hpyi yu yang mung, n yak ai sha hkraw ya sai. Shingrai, ningmai tu taw gaw ga-ngat nsim na zawn she ngu hkra kabu nna, saw shaga laika dai hpe lahkawng masum lang gan apup kau dat se ai. Shawoi gaw, Manau ninghtan hpung kaw nna, shinggan de manau sa na masha ni, hkum ngau galu preng tsawm ai hta n-ga, hpraw nsam mung masha ni mu yang, kalang mi naw bai nhtang gayin yu shangun lu ai ni hpe she woi sa ai nga nna, ngai gaw masha ni mu yang, gajawng si na hpe tsang ai majaw, Myitkyina manau gade sa mayu tim, nchye n na masu su let sharang lai wa kau ni ai. Ngai ngu yang, pru hkawm jarik hta yak nna madaw kun? Manau ninghtan hpung ni masha hpe lata nna sha woi hkawm nga ma ai. Bai, daining hkan gaw tsawm ai ni mung Myitkyina manau sa jin wa sam sai, shing nrai, shagawng shata zawn tsawm ai masha n law nna, anhte kaw ang wa ai rai jaw sai.
Hpa mi rai yang rai, Myitkyina manau lu sa na she ahkyak mat sai, ngai mung kabu gara hte hkyem bang wa se ai. Hkyem bang wa ai nga tim, hpa wa chye hkyem na law, kalang mi ntsawm mat sai hpraw nsam hpe gan pyin la lu na mung nrai, htunghking buhpun palawng hkyem da ai sha gaw she arai nga ai. Manau gaw Sakhkung mungdaw na ginwang shagu hta, shaning shagu ngu na nan nau nga ai. Raitim, masha law malaw gaw madu a buga kaw nna lai ai shara de nau ai manau hpe she grau nna sharawng awng nga ai. Yawng gaw ngai hte maren, tsan ai shara de pru hkawm mayu ai hta lai nna, Wunpawng Jinghpaw sha ni nga shanu ai ginra shagu hta du hkawm mayu ai krai rai sam nga ai. Shingrai, kadai hte hkrum timung, Myitkyina manau i sa na nga ai krai rai nga ai, yu yang, ngai hkrai manau ningtsing ai nai sam nga ai. 2007 ning asuya shata 1 praw 6 ya shani, Mangshi myu kaw nna rawt mat wa yang, mawdaw lau nna man she tsit mat, na mung lahpang gadu mat, pungding gumtit machyi mat ai na kra jawn yang she, shana de Yinkyang ginwang Nhkum krung Na-bang gat lawk kaw du shang wa saga ai.
Sa wa ai lam hpe nhtang myit dat dam yang gaw, nhtang wa na pyi n-gwi mat na zawn nga nga ai. Akam e sha sa yu sai ni tsun yang, Myitkyina lam gaw pyilat ga n nyep tim, hpunggaw kaba nau n-nga ai hta n-ga, hkaraw nhkap mung n-gala ra ai majaw, hkawm pyaw nga ai da. Shana na hkringsa shara hprai lajang ya ai htawm, shat sha ngut ai hte, ngai gaw nji n-gu nga myit hte Laiza hkran de sa wa mayu taw nga sai, madung gaw moi kaji ai ten hta Laiza gat sha sa sha nna kaba wa ai hta n-ga, Myen gumhpraw mung jau kaw nna sa galai tawn da mayu rai, sara ma hte du pyi Gawla-uk zawn lalam tawn nna, Laiza hkran de sa wa saga ai. "Nang a jarit pru lakmat yu yu ga! " Na-bang gat lawk hte Laiza hkran de sa wa ai mahkrai kaw jarit sin ai Miwa hpyen la ni ngai hpe hkap shingdang kau sai. "Sara ma, naw hkring yu u law, Miwa ndai ni ngai hpe lakmat hpyi nga ma ai." Mahkrai gaang du hkra hkawm lamat lai mat wa sai sara ma Hpan Ja hpe hkan shaga nhtang dat se ai. "Nang mung Jinghpaw i?" Mahkrai sin ai Miwa hpyen la ni gaw ngai shanhte na man nna nchye ga ai Jinghpaw ga ga jang, ngai hpe galaw san nga ma ai. "Ngai a lakmat manau ninghtan hpung ni kaw re, ngai n-gun tawn ai. An gumhpraw sha sa galai la nna bai nhtang wa na, chyahkring sha re." "Hpawtni Myitkyina manau sa ai masha gade daram re? Gade ya sa nga na?" "Mali manga tsa dang du na re, na dik masum ya." Ngai gaw Laiza hkran de lau shang wa shangun na hpe ra nna. hpyenla ni hpa san hpa tsun dan kau se ai.
"Shaloi gaw, anhte a du wa hpe shawng sa hpyi shawn yu su, shi awh ra kaw dung nga ai." Jarit shang chyinghka lam kaw tsap nga ai hpyenma wa makau na lahkum hku dung hpreng nga ai hpyen la ni hpang de ta ladawn madun dat sai. Jahta dung nga ai hpyen du wa mung ngai hpyen ma ni hte anya nga ai mu nna mi re, hpyenma dai wa hpe mahtang shaga la nna, dum dum di di nga in gan shaga la ai hpang, ngai hpe shang wa shangun sai. Laiza hkran de shalai bang dat ai hpe kabu dinglai kau nna, masha lai ai hku nlai ai, madaw lai ai lam kaba hku bai ningmat mat wa ai nga yang, jarit sin ai myutsaw hpyenla ni e hkap jahtau dat ai bai hkrum sai. "She! lam numbraw shade law ai wa kun e" Lam hkawm shut sai nga yang, gaya ai majaw lam numshe law ai hpe sha shatai masu nna gayin shang wa saga ai. Map map nga ai wanpu gata hta moi na Laiza gat a shingran ni hpe hkan tam hkawm yu yang, ka-ni hpe ngahkyi bum zawn di shadun dut ai, Miwa hkran de n-gu hpe naw lagu dut ai ten na gat ni hte langa lap hte galup da ai gatrai dut sha shara ni mahkra gaw, aten ladaw kaw hkan nna maumwi tai mat sam sai.
Laklai mat nga ai Laiza pa hpe pra pra mu mayu nna, Miwa hkran na wan dat sumri ni hpe garawt hkrat wa nna, grau tsaw ai bum kaw wan pu asan di shatu tawn nna, Laiza pa a shingyaw myiman hkrang ni hpe atsawm yaw yu na zawn ngu ai myit hte gatbaw de hkawm mat wa yang, kraw gata na shingran ni hte shai mat sai, gat gang de bai nhtang let, lam numshe langai kaw bai hkan nna kawng de lung wa yang mung, wan pu n-greng ai hta n-ga shata mung asi bai ang ai majaw, Laiza pa hpe yaw na matu gaw samram nhtoi htoi, u lat hpunggam goi ai hpang na mu she bai rai mat sai, mali nhkrup ai bum dumsu yan zawn gat htumpa de bai hkawm mat wa saga ai, masin salum hpe marit shamai lu shangun ai pa mi nmu sai majaw, myit gata hta ra ra sha nga let, lam makau na gumpraw galai seng kaw Myen gumhpraw hte galai abuk gun nna gayin wa yang, jarit mahkrai bai wa mu ai hte she, shang wa ai shaloi, ngai hpe hkap jahkring kau nna, sara ma Hpan Ja hpe gaw hpa sha pyi nhkap san ai, Laiza hkran de shalai dat ai lam hpe bai dum dat ni ai. Shingrai mau mau nga let sara ma hpe atsawm yaw dat yang she, an a hkum hta sumraw tawn ai buhpun palawng ni shai nga la sai. Sara ma gaw kalang praw rai yang Jinghpaw shayi re hpe yu shapraw lu ai hunghking ba-sing shakya da nga ai, bai ngai a labu gaw lahput kaw sha magap du nna, hkyepdin rai jang gaw, labawp du hkra galu ai shachya da ai hta n-ga, palawng mung hkum kaw nna lagaw lahtin du hkra galu ai hpun da ai nga yang, Jinghpaw nsam gachyi mi pyi n mu ai majaw, ngai hpe shingdang da ai lam yu shapraw dat se ai.
Ngai a daidaw buga de she sa yang, hkap shingdang da ai hpe pawt mayu ai myit rawng nna, hkringsa shara kaw du ai hte nye hkum hta kap nga ai buhpun palawng ni hpe langai mi pyi n ngam hkra raw shapyen kau nna,nhpye htumpa kaw aja wa anyin bang kau nhtawm, hpang shani buhpun na htunghking bu hpun palawng ni hpe yupra makau hku atsawm sha shapyan tawn da nna galeng nga yang, Jinghpaw buhpun palawng a alak mi rai rawng ai akyu hpe yu shapraw dat se ai. Ndai jarit makau hkan chyahkring chyahkra pru hkawm yang na lai lam lakmat gaw, Jinghpaw buhpun palawng ni nan rai nga ai. Shawngde Myen mung hkran hte Miwa ga lapran hkan Nga hpaga ga ai ni she, dingsang sang dangpai chyaje bu tawn nna, hkawm hkawm re nga ai na yang, ya daina ngai nan shi a lachyum hpe hkam sha lu ni ai. Praw 7 ya jahpawt, yawng gaw shagawng bum na byinpu ni hte tsawm shingjawng ai zawn shakya lang nna Laiza hkran shang wa saga ai. Htunghking manau chyinghka lam lahkawng maga gaw, myu tsaw shayi shadang ni nshung gatsi ai hpe pyi n nga hkra lahpawk hte pret nga in hkap tau nga ma ai. Laiza kaw manap shat jawm sha la ai hpang, Myikyina lam de bai matut hkawm mat wa sai. Manaw manang ni gaw lawu de na lam hta chyenan n hkrang ai nga nna, nta de chyenan nhtang gayet nga ma ai, ngai gaw mawdaw hkalap hku kaw nna laklai shai mat nga ai ginra ni hpe yu mau nma nga ni ai.
Shawngde Laiza gat sa yang, lamu pyi nmu mada ai maling mala gata hku she lai ai, wawt mung hpun ndung de nna she hkrat bun nga ai, daini ndai shara ni gaw bunggyi wa a baw zawn, lap run ginhtawng ten hta hkrat na hpunlap ni pyi, ganoi nnga mat ai daram hku krin mat ai hpe masin yu machyi nna, nsa kaba shaw let Janghtung krung hkran de bai mada dat yang mung, langa hpaw, jan pani, kawa lap ni sha bungsoi soi let ga-ngat nga sai, yu dat yang ngai hpe hkap gintan ai zawn mung she arai nga ai. Moi na hpunnu hpungam ni kadai a zingret hkyi tai mat sai kun? Maling sin ai Wunpawng sha ni sut su nga mai sai kun? Ngu myit chyai nga ai lapran, Laja yang kaw du pru wa sai. Munglai hka hpe marit ai majaw, Laja yang na Manmaw lam numshe mahkrai de, mawdaw gan jahkring tawn shanngun nna kagat sa wa ni ai. Goi ye! "Na yang na ngawn, mu yang mu yawn" ngu ai gaw daini nan rai sai, ngai manang ni hpe Munglai hka -nu gaw gade daram san seng tsawm ai hta n-ga, hka kaw sha shang gabye tsap timung Nga galim nna, lagaw lahpan she gaya ai ngu jahta jaw lai kau wa yu sai mi. Ya gaw, Munglai hka mung Nga -chyu hte Gahpri kabun tawn ai zawn rai mat ai hta n-ga, kadai myit nhkawn nna sa gumhtawn si mayu tim, hka marit lu na ntai mat sai, sanghpaw si tum zawn chyang gabrim tsawm ai Maubyinpau ni chyu sha she hka kau hkan jan kra let gangat chyai nga ma ai, shingran hta na Munglai hka -nu gaw, shawngde na zawn asin amun rai tsit kashaw lwi nga dawng ngu yang, ya gaw, lungdin lungja marawng ai sha mu mada mat sai. Ganing nga tim, nga Naw nga Gam ni mung jau nna n-gaw htawt mat na sai. Mau nma yawn nhpra let mawdaw kaw bai wa shanat dung nga ni ai, manaw manang ni gaw, ya yang nye a krawwang panglai hka leng hta ai hpe kadai sa chye ya ai nai.
Daini na Laja yang mung gatsi la nga sai, shawngde Laiza gat shana de, Laja yang na lam numbraw ndai hta bapa si dut ai seng ni nga ai majaw, sa-ra kaba langai mung naw rai nga ai, ahka htu shingmun bang ai ba-pa si ni hpe shingran mu let, matut hkawm mat wa yang, Shari yinwang na wa-hpu sumri hte U shari ni hpe mu mada ai shaloi, mangai ta hpe shingran bai jawm mu nna, sha hpa hkrai bai tsun bang wa saga ai: Kahkum, kumgyin, hkainu, naihpaw, nawkyu, shanam gaibyet, shinglim shingtawn ni hpe ganing di shadu, gayau, htu sha na ngu naw tsun garu nga yang, sharaw nat kau sai hkama yi bai dan pru wa ai hte, ngai gaw yi sawm ten e shingbwi matsun, nai, janghpan pu, banau gayi re si mai galaw sha ai hpe dum dat nna, mayen she ma-ut mayu wa ni ai. Laiza kaw sha sha la ai shat mi, ya lam gaang pyi rai nhkawm yang bai kaw si ai zawn sha hpa hkrai tsun taw nga saga ai. Galoi mung ndai shara hkan ndu hkawm yu ai ni gaw, ginra krai yaw nna hpa mu hpa tsun rai mawdaw gata kaw garu rawng nga saga ai, Myitkyina lam krai gahkrang ai ni gaw, hkumbai hte bya rai mahka yup nhkyeng taw nga ma ai, bai maning na Myitkyina manau sa lawm sai ni gaw, ga-nyi ga-nga nga ai mawdaw gata hta raitim, mani sumsai myi man sha hpaw tawn nna yup nga ai, ganing nga tim, Mali hka kau hkan na zaibru jang hta hkawn tsawm shayi ni hte shachyut chyai ai shingran yupmang mu jaw ai, shanhte gaw maning na ningdat ga shatup hkrat wa ai ni rai nga ma ai. "Ah..... waw, yu mu! " Shawng kaw dung nga ai num kasha langai agajawng sha jahtau dat ai majaw, yawng shi ladawn ai shara de mada dat yang, lam dung lawu lahta hkan na namsi sun ni hta makchyawk si htoi abya jawng nga la sai, ya chyawm gaw, yupnga ai ni pyi she bran hkra rai, nhtang wa ai shaloi namsi wa mari gun ga nga ai krai rai masai.
Ga-ra yang, Ja pu, Nam san, Mali yang hkan matut manoi rai si ai namsi sun ni hpe mu lu ai majaw, myit amangoi in bai nga wa ai hta n-ga, shinglam galu magwi ni mung, lam makau e gaungwi gauyang rai gangai hkawm nga ai hpe mu lu nna, sut ngai buga a numehying ni hpe yu sharawng taw nga ni ai. Lam makau hkan na shingbwi nta ni mung hpang de alam rai nga nga ta sai, nta ntawt hkan shingma lam let galeng nga ai ni hpe mu jang, yu manawn na zawn mung she rai nga ai. Laiza lung ai hpaga mawdaw hta jawn ai masha ni gaw, hpun singga hta bawng tawn ai hpun ni zawn marawng nga ai majaw, grai nan hkan yu tsang nga ni ai, lam tup ndai mu ndai tsun, wawmu waw tsun rai ai nga yang, ndum ai sha Dabak hka mahkrai du nga la sai. Dabak hka mahkrai lai kau ai hpang, grau nna dam lada ai hkauhting hkauna ni dan pru wa ai majaw, mawdaw hkalap shinggan de taugawk a du zawn shaw tawn nna: "Lama mungdan ngwipyaw rapra ai rai yang, nta ting hpe woi nna n-gaw kalang bai nhtang htawt na zawn ngu nngai." Nga nna tsun ai masha mung law law rai nga ai, grau nna la ni gaw Miwa ga de asuya mu gun ai ni hpe ma langai sha shaprat shangun ai majaw, ndai ga de num law law sa la nna nga na hpe grau myit mangoi taw nga ma ai. Nkau gaw mam hkindu hkrai amut rai tu marawng nga ai na-dap pa ni hpe mu jang, yu lahpawt dum nna: "Aga! sau chyinghkrang, hkainu, hkaulan ni amasan di hkai da mayu ai." Nga in shingran tsa -pa sha nga ma ai. Ngaleng lai wa ai mu nna yu dat yang, mawdaw lam lahkawng maga hta Ngaleng lai na lam alak mi san tawn nga ai, Ngaleng gawt ai wa gaw, anhte shi a Ngaleng lam hku nhkawm ya tim, ngaleng gang jahkring kau nu ai.
Hpang e she chye ai, dai Ngaleng gawt ai wa gaw, shanglawt hpyenla galaw nna Myen mung kaw nga nga ta ai nye Ba AWng rai nga ai, dai shani shi hkauna sa nna wa yang, hpunggaw she daw ai mawdaw mu nna hti yu yang, mawdaw matsat shi jan du ai nga, teng sha wa anhte Sakhkung de nna sa ai mawdaw mung matsat shi jan du nga ai, ndai lam gaw Ba AWng shi Mangshi de num hkungran poi lung ai shaloi tsun pru nna chye la ai re. Hkawm nga ninglen madaw hkring mat nna, na-dung pa hkan bungsoi bai woi soi la hkyem ma ai kun? Ngu myit let hkan yu nang yang, anhte a mawdaw ni gaw, sumla hkrung hta mu yu ai Japan majan rawt hkyem ai mawdaw ni zawn, shingkang shingwang rai let deng lahkawng jan galu hkra hkring taw nga sai, masha yawng mayawng shawng lam de hkrai hkawm lung wa ai majaw, ngai mung hkan nang lung wa ni ai. Gatsi bungshi ni hpwi hpwi nga in bung wa nna, labu sha galaw gayawp hpai kau rai, lam dung lahta kawng hta dung ai hpyenla ni hpe yu let lung wa yang, goi e, n-gawng latum zawn htingkun nga ai hpri mahkrai langai gaw lam kaw gram nga la sai, tsun ma yang, ndai gaw mying danhkawng dik ai Mali hka mahkrai rai nga ai da. Shingrai ngai mung, u gum jan mai ten hta, hkawn tsawm shayi ni mahkrai ntsa hkan yawn garen hkawm ai sumla hkrung ni a shingran hpe bai mu dat nna, Mali hka mahkrai hpe atsawm sha naw yaw la na ngu yang, mawdaw lung nga bai jahtau bu taw ma ai majaw, nwai nwai nga ai myit hte Mali hka mahkrai hpe lai kau da sai.
Mali hka mahkrai lai mat wa ai hpang, mare kaba de shang wa magang, asep she sep ai hta n-ga nhka mun mung lashen ai hpunnu hpungam ni lam lahkawng maga tu gangu nga la nna, Myitkyina myu shang sai pyi nchye nga nngai, makau grup yin hta nye myit gata na Myitkyina myu a shingran pyi rai nmu tam shi yang, Shata pru manau wang du bang wa sai, yawng hpe mawdaw yu bai nga nna, shani tup mawdaw dung in maidang pyi pa mat ai zawn nga nga yang she, akam e sha mawdaw yu nga ai majaw, anhte gaw wulawng na wuloi ni zawn chyinghka lam de matsut pru wa nna, hpa len len let hkawm shang wa yang, manau chyinghka lam shinggan kaw nna manau htingnu hkringsa shara du hkra, jau nna la nga sai hpunau ni gaw alum ala rai, madum sumhpa, mani sumsai lahpawk hte pret, mahkawn mangwi hte raw nga hkap tau la ma nna, mawdaw dung nna ba ai lam hpe pyi malap kau sai. "Shata pru manau wang kaba.." nga in mahkawn ai mahkawn gaw teng sha rai nga ai. Manau wang shang wa ai hte, masha unga ai rai taw gaw, aja wa jahtau let nauwang ting kagat shinggrup hkawm na zawn ngu kau se ai, shang lawang tsit tsawm dam lada nga ai manau wang ni hpe yu mangoi taw nga ni ai. Nhkap nchyap rai gyipgyeng ai shara hkan htu shara da ai Miwa ga na nauwang ni hpe bai dum dat yang, Myitkyina Shata pru na nauwang gaw, ngai mu yu ai manau wang hta na kaba dik ai rai taw nga sai.
Mali hka-nu ni mung nauwang hkinggau gata hku san tsawm ai hte lwi dumpyang nga ai majaw, gatsi bungshi ni ya n ya hpyi hpyi nga in bung wa nga ai, ndai shara yaw, masha hpe marit maroi grai nan lu shangun ai ginra nan she rai nga ai. Shingrai, ngai gaw gatsi bungli ni marawp let yupmang zawn shingran zawn nga ai myit hte nauwang ni yaw shinggrup hkawm nga ni ai. Shana de hkringsa shara hprai bang wa nna, anhte mawdaw hte mare gata hkan bai chyat hkawm nga saga ai. Hpang jahtum du yang, manau wang hte nyi ai shara hkan yup shara nman mat sai majaw, anhte hpe Myitkyina myu kaw tsaw dik nna, manu mung htat dik ai shara re nga ai Nyulai manam jarawp kaw sa lajang da ya sai. Raitim, ngai madat yu yang gaw machyut machyat nga nga ai, lakang mung ladi pyi ahkyawt la na daram gadawng ai hta n-ga gyip la nga ai, myit hta lamu ga ndai daram dam ai shara hkan me, manam jarawp hpe ndai zawn gyip nna gap da ai gaw ngu myit nhkawn nga ni ai. Yupgawk kaw sumla hkrung mu yu ai hta lai nna, hka shin shara hte namdum ni mung san da ya ai majaw, yuppa pa ai manang ni hta nga jang, ndai shara gaw hkawhkam hkaw hte bung nga sai, grau nna ahkyak ai gaw, Myitkyina nambat langai gat lawk ni gaw manam jarawp a lahta hku sha rai taw nga ai majaw, hpang jahpawt jau jau rawt nna gat shang na hpe sha jawm saku taw nga saga ai.
Nhtoi san lawan ai hta n-ga Miwa hkying hkan nna rawt man mat ai nga yang, grai jau mat sai, Jinghpaw buhpun palawng shawng sa mari ga ngu ai wa, seng rai nhpaw nna, Mali hka hkinggau ntsa hku gat ai si mai gat de shawng shang hkawm nga saga ai. Mari na nai nga tim, hpa mu hpa a manu san hkawm nga saga ai, dangpai gawai bu tawn ai Gala la ni shajoi dut hkawm ai hka kaba na nga re nga ai hpe mung, nau yu masa nna manu aging tam dara kau da sai, ngai gaw jinu hpa banau hte hkam tim lu ai jan re nga yang, lagoi hpaw hte makai dut ai banau hpe sha tam hkawm nga ni ai, gat ya hta Myen Gala ni dut ai nga gaw nampan zawn hku she galep dut chye nga ma ai, hkatsu banau ni mambum hku she dung nga ai, nga chyahkraw mung hkum dik sai, htingnyet htang mu dat ai majaw, manu pyi ndara ai htuk kaba lahkawng gan mari gun kau dat sai, ndai htingnyet htang gaw ma prat na kaba ai ni a gat lagaw rai nga ai. Gai ting gawam ma wa sayang she, Maji bum na nga hte galaw ai banau re nga ai, Jinghpaw num ni hpawgoi hte nlaw nla di matep dut ai banau hpe jawm lu mari gun saga ai. Banau nlaw dum ai majaw, jum hte chya tawn ai nga bai mari jat ai hta n-ga, nga chyahkraw, katsu banau ••. mari mayu ai rai ni ma ma mari gun saga ai. Hkausoi dut ai seng hku bai gayin pru wa hkrup nna, namdum sa yang maisau niang ai Gala num ni ta hte galaw dut ai hkausoi hpe myit hta kram kram nga let, mari sha yang she, prat tup dum nga na daram mu taw nga sai re.
Hkringsa shara de mari hpai ai rai ni wa tawn kau da nna, Jinghpaw seng de buhpun palawng bai mari mat wa saga ai. Jinghpaw buhpun palawng dut ai seng shagu hta, anhte zawn Miwa ga nna manau sa ai masha ni hkrai mawng nga la sai. Hpaga gaja dik ai nga yang, manu dara tim, "Ashawng ra jang, mun lahkawng hkying manga hte tawn da ya na yaw ! "Nga nna, Miwa ga na manap shat hka -wan mi a manu daram pyi nlu dara shayawm mat sai.Gade hpu ai nga tim, Miwa ga hkan wa hkyawt dut ai ni a manu hta shadawn dat yang naw paw nga ai, madu ra ai mari la law nna, kumhpa shatai na du hkra mari gun sai. Manau shang ten du wa nna, htunghking bu hpun palawng wa mawn sumraw la nna, manau wang de bai te mat wa saga ai. Sumsing lamu hpuntang she gadu ai manau chyingbau nsen ni gaw, nauwang shinggan garet ai ni a lahkap hpe pyi shi hkrai gayaw shamu bang wa shangun lu nga ai, gup daru chyawp ai naushawng ni, mashawt n-ga hpye nna, banbaw bumhkaw hkaw ai wala ni hte jamgaw layit shapyan hpai ai nu num ni gaw, nau wang de awam rai ganawt shang wa sai. Nau wang ting jan dingsi shara, shilam n-htu maja gala, awh ra nsen ni gachyi ai hta n-ga, baren sumraw hkrang hkrang wa, palamla awh wang wang nga, yu ai ni mung yu nhkru, nau ai ni mung nau ntsu nga sai.
Nauwang de sha yu hpa nga ai nrai, le nauwang shinggan na manau mau ai ni, ma she shamat hkra hkra manau ningtsing nna, hpa rai sharang tsap nga ai kun? Jak sanat, mawta myawk ni shachyen tawn nna, lahkrip ra ra hte tsap nga ai hpyen la ni hpe mung, matsan yu dum na zawn she rai nga ai, sailam pyi hprip hprap ma na zawn nga ai manau nsen ni hpe sharang madat let, hpundu zawn tu nga lu ai majaw, shakawn hpa langai mung rai nga ai. "Miwa ga ni nau ai manau grai tsawm ai raitim, num hte la garan nna ka ai hpe sha grai yu lahpawt dum na zawn rai nga ai."Manau hkring ai hpang, Mali hka yu-ngwi punra kaw wa la salang yan shing nga tsun pru nna," Ganing rai lahpawt dum na rai a?" ngu san yang, " Shada nmu gasawt hkat taw nga ai le." Da. Aga! Grai se ai wa la yan hte she jahta hkrum sam sai. Teng sha shani na manau hta yu yang, wa la dai yan sharawng ai hkrang hte maren, num hte la gayau nna ka nga ma ai, num a lapran kaw la matep ai kun? La a lapran kaw mahtang num matep ai kun pyi nchye yu shapraw hkra manawt nga masai. Salat hte grit raitim, hkringsa na nmyit ai hpe yu yang, num la gayau nna ka ai hpe grai myit dik na tai nga ai. Hpang shani, mungkan labau shang ai Mali Nmai zup de sa wa saga ai. Moi Mali hka (Mali'Kaw Yawng) hte Nmai hka (Nmai Lu Tawng) gaw shannau rai ma ai nga, Mali Kaw Yawng hte Nmai Lu Tawng gaw shinggyim masha nnan lat wa yang, num shawng wa ai yan rai ma ai da, Mali Kaw Yawng a num woi kasa gaw panwi rai nna, Nmai Lu Tawng a kasa gaw pahkram rai ai nga.
Mali Kaw Yawng jan gaw num wa na rai yang, shakau kumhpa rungrai hpyi nna, Nmai Lu Tawng gaw shakau galoi nhpyi chyai nga sai, num wa na she tin nga ni ai nga nna, gana hpe shingkawt kau da nna num wa mat jang, Mali Kaw Yawng gaw ngainau jan ngai hpe num wa shingkawt kau da ai gaya ni ai nga nna, num nwa sana nga in yawn nga yang, ganau Nmai Lu Tawng gaw ngai na jan e hkum yawn sa, ngai nang hpe ngai a shakau du hkra kum hpa na nngai ngu nna, pahkap nba mung ya nhtawm, njaw jaw grang ni du hkra raw kumhpa kau ai hpang, shannau lahkawng rau Ganyem layang ga de num wa masai da. Raitim, Mali Kaw Yawng a num woi kasa gaw panwi rai nna la nyan, Nmai Lu Tawng a kasa gaw pahkram rai nna chyang lawan sai da. Shingrai, mateng daini du hkra Mali hka gaw agatsi zim sha gaungwi lwi yu wa nna, Nmai hka gaw hprawhpra she shara let lwi gumtawng nga ai hta n-ga, nshung ta raitim saiwan n mawng ai gaw, num wa sa ai shani shi a pahkap nha gana hpe jaw kau ai majaw re da, bai Nmai hka kau hkan pantsun panlawng npu ai hta n-ga, hka shakau mung nru nna, Mali hka hkinggau hkan gaw pantsun panlawng ni pu abya ai hta n-ga, mahkup saiwan ni mung mawng bumhkup nga ai nga nna tsun ai maumwi ni na gun ai majaw, Mali Nmai hka hpe mu mayu ai myit ni gaw grau nna gatu nga sai.
Raiyang, Mali Nmai zup de sa wa ai lam kaw deng 26 sha ka da nna, hkrunlam tsan gang na nshadu nga ga ai. Shingna she gadun mat wa hkra hkawm kau tim, anhte hpe woi hkawm ai Manhkring na Maji Lun gaw, du wa sai sha anga nga ai, yi-nam mawru e agre lawm kau ai lam ni grau nna hkawm npyaw wa ai majaw, yawng a myit hta chyahkan a lagaw run hku run mayu wa sai raitim, kalang mi pru sa wa sai nga nna, ntsun shapraw ai sha rai nga yang, akam e sha tsit lwi gum yan tsawm nga ai Mali Nmai hka a shingni ni gaw, ya n ya mawdaw lam gata hku dan pru taw nga nga re majaw sha, anhte a hka mazup de du sa mayu ai myit ni hpe gang shalen tawn ya lu nga ai. Nmai hka gaw Tanghpre kaw gana Mali hka hpe wa tau la ai shara rai nna, daini masha yawng mayawng du chyai hkawm mayu ai ginra byin tai nga sai, mawdaw gata kaw dung nga let ngai gaw, shawngde na lai wa sai Mali yan Nmai hka a maumwi ni hpe kalang bai myit sumru kau ai hpang, hkawm nga ninglen Maji Lun lagawn lamawn nga ai nsen hte du sai nga tsun ai hia n-ga, mawdaw lam mung htum mat nna, daraiba wa gaw bum pawlaw hpunggaw ntsa kaw na hpun shingnyip gata kaw mawdaw wa jahkring dat sai. Mawdaw yu nna grup yin mada yu dat yang, lam lahta maga gaw malu masha shat seng ni hpaw da nga ai. Kawng kaw tsap nna lam dung lawu de bai mada dat yu yang, Mali yan Nmai hka a maumwi sha na yu sai ni gaw kalangta gara gaw Nmai hka, gara gaw Mali hka re hpe asan sha yu shapraw lu nga ai, hka lahkawng a krang ni hpe bum lang e kauchyen shingga kau ai raitim, dan pru nga ai daw gaw, kadai mung kadai madu a shingkang hpe yawng a man hta pya dan nga ai.
Hka kau hkan bu hkawm masha mawng jawng ai hta n -ga, Nmai hku de ja htu sa ai masha ni hpe htaw sa htaw wa rai ai paga jak wawn ni gaw, azim rai lwi nga ai pai maga na Mali hka kau hku hkring jawng nga ai, zaibru jang kawng hkan malu masha paga ga ai ni nsam amyu myu re jawng kaba htawng shachyen tawn nna, wanhkut hte mawng rai nga ai, loi lawu ai shara hkan gaw lung din lungtawng kasha ni marawng jawng nga ai, dai shara ni hta ja htu ai masha ni hte nlung hta ai masha ni mung htingkaw jawng nga ma ai. Lwi gumtawng nga ai hkra maga na Nmai hka gaw mazup lai ai hpang shara kaw nna, loi zim let Mali hka hte rau sha manyep layang ga de lwi hkrat wa nga ai. Kawng kaw nna sha hkum yaw taw nga sai, gyepdin raw lang kau rai zaini kawng hku kagat yu wa ga, Mali hkanu ni hta nang a hkiba lagaw sa tsing dat u, lagyi pyaw dik sai. Gai gai, Nmai hka de mung bai sa yaw yu ga, hta gumlawt nga ai Nmai hka gaw sumtsam nna du sa ai nang hpe hkaptau hkalum ai zawn, hpaga jak wawn ni pyi she gale galau rai wa nga ai. Ndai hka kau hkan nang ja htu chyai mayu tim mai ai, nlung hta na nga tim jawng ai. Bai nna, ndai kaw ngai laika hti sharawng ai ni pe sha tsun dan ai yaw, hka kau hkan lungseng hkye hta na nga tim n taw ai, loi chyang chyang rai ai nlung kasha hpe hta la nna jan hta shing-rau yu yu u, hkye maja rawng nga ai, grau nna ahpa lep lep rai ai gaw hkakau gata hkan ahkye rai maja gala ai pyi mu nga ai re, nang lama hka kau hkan sha hkawm chyai tim, na a lagaw lakran hta lungseng pyi matep nang chye ai re. Anhte yawng gaw kadai mung kadai ra sharawng ai nlung ni hte lungseng hkye ni hpe hta mahkawn nga saga ai nga yang, jan ja ai hpe n nga, shat kawsi ai du hkra malap kau saga ai.
Zauhkai hkai ai ni a shanhpyi zauhkai mung bawm mat sai, lagaw lata hpyi ni mung n gai hpyi she hpyi mat ma hkra lung rawk kawng hte hka kau hkan htingkaw hkawm nga saga ai. Hpang jahtum e nshang sharawt nmai, myi gabrim mat ai na ai shaloi she langai hte langai rai, jawng kaba htawng tawn ai lusha seng de hkawm pru wa dam yang gaw, ninghkawng jan mung gadang wa sai, jahpawt shat nsha ai majaw, hpa mu tim ngam na zawn n nga ai myit hte lusha seng hta dut ai lu sha ni hpe ma htet da sai. Hpawgoi hpaw hte makai dut ai shat ni, sumrawn gakang tawn ai nga utsang ni hte shan amyu myu gapung ai ni hpe hkru hkra sha la ai hpang gaw, kadai mung kadai mu hta ai nlung hte lungseng hkye ni hpe jawm shakawng dan hkat nga saga ai. Maji Naw gaw madu hta ai sha n law dum nna, Tanghpre mare hkan na hka sa gasup chyai ai ma ni hpe gumhpraw jaw nna, lungseng hkye bai woi hta nga sai. Myit hta jan pru, jan shang ten na Mali yan Nmai a shingni ni hpe grai naw yu mayu ai raitim, ahkying aten nlaw ai majaw, nja nja nga let nhtang mat wa saga ai. Nhang wa ai lam kaw Maji Lun gaw anhte hpe Jaw langchyi bum kaw bai wa woi shang sai. U gum jan ni Jaw bum ntsa hta mai hkra nga ai ten rai nna, grupyin mada dat yang, marit maroi grai nan lu jan nga ai, gatsi Mali bungshi ni wwi wwi nga bung ahpyi ai Jaw bum ntsa na nta hta tsap let, jan shang maga yawng nna yu u, Myitkyina hpe myi tum she yu dinghkren kau na daram yaw tim n yu law nga ai.
Lamu ndung dep ai nta tsaw n nga ai raitim, nyem ra gahtawng nchyawn ni hpe mada mu yang, ngwipyaw simsa la na zawn rai nga ai, Mali hka mung baren sumraw zawn lwi gum yan nga ai, mying danhkawng ai Nawngnang chyumjawng du hkra mu nga ai, dam lada ai na dung pa hta ngai nchye ai gahtawng nchyawn ni ran ra rai law nga ai, grau tsan ai shara ni hta wan numshi e ga-up tawn nna dan ndan rai mat sai. Lama manap jan gata hta ndai shara ni hpe lu yaw yang gaw, ndang tsun hkra tsawm na re ngu kam nngai. Jaw bum kaw nna bai nhtang wa ai lam hta, Maji Lun gaw lam makau hkan na gahtawng ni hpe madun let, ndai gaw Kawa hka Sama Miwa ni nga ai, Nbawn lup Li su ni nga malawng ai, Shwi zet, Man hkring, Karing naw sa -ra, Niang dung mare, Dap kawng ••• nga nna shachyen dan u ai. Gahtawng mare ndai ni gaw myu makau kaw sha de da ai hta n-ga, Mali hka hte mung ni nna, yu dat yang grai nan pyaw len na zawn rai nga ai. Hpang jahpawt manau sa ai masha ni yan she naw yan bang wa yang, Anhte Sakhkung ga de nna sa ai ni gaw wa na aten bai du mat ai majaw, yawng gaw n ja n hpra shakram htinghtang she lat nga sai, ndai hpe shakram da, awh ra hte numhtet ga tsun nma, grau nna mani a shawng shana sha chye hkat la ai hkawn tsawm shayi ni hte shabrang dingla ni gaw, n ra myi prwi Mali hka zawn she lwi na zawn nga nga ma ai. Nhtang wa ai mawdaw gata kaw ngai gaw: Aga yahte gaw manau she rau sa tim, nanhte hpe mu pyi nmu mat hkra i? Myitkyina ga da-ma sa shang mat ma sam sai ngu pyi myit kau sai le ngu la nkau hpe shatu dat yang: "Ya kaw nna, ngai hpe rung kaw dung nga nna asuya mu galaw na hkum shadu masa, la ni gaw shani shana Jinghpaw ga hte Jinghpaw laika, Myen ga ni she wa sharin mat sai.
Ndai lang ngai gaw manya ma-a na-hpang pung hte maren, hkawn tsawm mu tim, ga nhkrum nna n mu jahta, kadai hte shachyen shaga chyai na lam pyi nhku ai majaw, grai bawt mayu ai." Anhte hte mawdaw rau dung ai Zi la langai lahkum she lahtum hkra tsun n-gut taw nga ai. "E, ngai chyawm gaw n yup hkra jahta hkawm ai nga yang, ganam tsawm langai mung mu da sai, ha ha!" Hka li hkrum ai jigrawng zawn nga shaga ai, Myen mung num ni a nsen hpe na ra sharawng chyung si nga ai dinghku la langai gaw shakawng tsun nga ai. "Ngai sha ni hpe Myen mung de lamu ga dam ai lu ai da-ma tam shangun na re." Num htawt la na n myit ai la ni gaw kasha ni a matu she yaw shada bang wa nga ai. "Nanhte dinghku de sha sai ni, ngai hpe num wa hkan manawn si mu yaw, num ni mung Myen mung de lamu ga lu ai shingkra tam la nna num wa mat na sani ai." "Myen mung kaw la nlaw nna she yak nga yang, nang hkum hkan gashun lawm sa, manang num ni hpe ngam da ya ga." Nye manang jan teng na zawn nga hkra num wa ningtsing ga tsun wa nna, ngai gaw bai hkan na tsang lawm wa ni ai. "Ngai mung la kasha lu ya na num mi naw ra ai majaw, Myen mung de she myit mada nga n ngai, Nta na jan hpe naw wa tsun ginrat lawm marit." Ngai zawn num kasha sha lu ai wa-ngan langai wa mung myit numshe shang mayu ai ga tsun pru wa nna, ngai gaw lama anhte nta na wa mung, Myen mung du yang, num tam na hkrai myit mat yang ga ning di na ngu ai kaw myit du nna, htaning na Myitkyina mungdaw daidaw 60 ning hpring manau hta sa hkyem ai, nye nta na dingla wa hpe naw wa ahpyak kau na ngu mung myit gun kau ni ai. Yawng a myit gaw Myitkyina hkran hkan naw gawam nga ai raitim, dung nga ai mawdaw gaw ndum shamyi, jarit lai kau da nna Sakhkung ga de du bang mat wa sai.
