WA MUN CHYANG HTE WA MUN HPRAW

WA MUN CHYANG HTE WA MUN HPRAW

Yen Len Hke

Htingra ta gaw htingta ta na bat bat ra nga ai, ga shadawn nampu naman a, tsingdu tsingman a san san nga ai sama ni wi wi nga manam lai. Shing nrai, tsit lali ai, grai htat ai nwai bat ni htawnglawng ladi ntawn nku sul swi nga, mare gaang na lauhku tsa jap bat zawn manam lai ra ai. Rai yang, ninghkawng jan shang wa ai ten hta, Wu- kya marawn na ni gaw saira bat she manam hkrup nga ma ai, ahkyeng mya mya, akahtet hpoi hpoi, nsing hkrai wawa nga ai bat ni gaw kawng marawn kawn mawng yu wa nga ai, dai mawng yu wa ai achyang amang atawng alawng rai na zawn nga ai saira bat gaw, tsit lali tsawm ai htingra ta kaw jahkran gayau nga ai mangai sabyin hpun hpa nan nga nga ai. Kadai kun tsun al, nanhte manam yu mu, hpa baw bat re? Shana shat hpe hka-wan kaw bang lang rai, shat sha dabang kaw shat sa sha nga ai masha ni yawng gaw, shat hka-wan hpai tawn, baw shadap tawn rai, ladi hte marawp dat ai hte galang ta saira bat dai manam hkrup ai hkrai ra sai. Wa sat nta Li ni wa bai sat sai. Loi zim re hpang, marai mi ning nga tsun dat ai htawm, masha yawng ahprawp ahprap nga shat bai sha bang wa masai. Hpawtni gaw shata man masum htum ai shani re hta n-ga, ndai ta hpang jahtum na gat rai nga ai hpe kadai mung dum nga ai, wa sat nta ni gat de wa sa sat dut ra chyalu rai nga ai. Raitim, shawoi na gat shani pyi jahpawt manap jau jau she wa rawt sat la nna, jan pru wa ai hte akahtet agamawt nga ai wa shan hpe gat de sa dut dut re mi? Hpa rai daina de gaw jan shang wa mahka e wa sat ai rai? Daina de na wa sai gaw hpa rai shawoi na hta grau nna manam ai kun?

Ndai lam ni hpe gahtawng hkan na masha ni kadai galoi n hkan sumru yu nga ai. Htingra ta shang ai shata mi jan mat wa ai kawn, hkaulan bawng ni nshung bran wa nna, alawn rai prut wa ai sha n rai, namlaw namlap ni du hkra kam ai hku tu galu wa nga ai. Hkaisun hkauna hkan tsing magang shawt hkyen ra ai, namhpun bang ra ai sha n rai, hkauna baw hta hka ni ai ni hka mung naw shalen bang ra rai nga ai, kadai mung kadai a mu bungli kyin taw ai majaw, kaga mu kadai ndang hkan majan hkawm nga ai. Shat sha dabang gaw mare baw kaw rai nga ai. Wa sat nta Li ni gaw marawn kaw na mawdaw lam makau kaw nga ma ai, makau kaw gaw 1 zawn re mawdaw lam numbraw nan rai nga ai. Hkaimu bungli tawn kawn hpaga yumga galaw jang gaw, marawn makau na mawdaw lam de ni yang she manu nga ai, wa sat dut ai sha re ngu tim, htaw sa htaw wa manu na tai nga ai. Makau grupyin gahtawng hkan na ni numwawn numla si poi nga yang, npye bainam, u wa zawn re ni gan sat shangun dam tim manu nga ai.

Madu mung manu, masha ni mung manu, hpaga mung kaja na matu, Li nta ni gaw mare kawn marawn de htawt lung wa mat ai re. Marawn kaw htap lahkawng re kagam nta galaw da u ai, wut tawng hte wang kaba kum tawn rai, nta htap gata kaw wa sat, gatraw gatrai ni dut let shat seng mung naw hpaw da nga ai, ntsa de nta masha ni yup ai hta lai nna, manam ni yup na gawk lahkawng naw galaw san da manu ai. Lai wa lai sa re masha ni puba jang, gata kaw wa sin wa pu wa kan ni gangau ai hte lauhku tsa jap loi sing sha la ai htawm, gading gadang rai let ntsa de na manam gawk kaw wa hkringsa la rai nga ai. Hpang jahpawt, tsa bran, puba mung mai ai htawm, yup gawk jahpu hte shat gumhpraw ni jaw kau da rai bai hkawm mat wa ma ai. Ku langai mi kaw saboi langai hte map map nga ai wanpu langai noi da, dat n nga ai shaloi gaw wan shadaw mi sha nga ai manam gawk lahkawng dai hpe, n mai yu gaji nga manu ai, ginwang mu madu wa du hkra dai manam gawk hta yup lai wa yu sai da. Isun ma yang, mawdaw ruk byin mat nna, kaning nchyum lana mi yup kau ai re nga. Rai yang, wa sat wa Li bai tsun ai gaw, ga dai tsun ai wa a ga gaw ga lahpaw re, myit mung n myit yu ai, mawdaw dareba wa mawdaw hpe ruk byin shangun gwi ai kun? Ginwang mu madu Jau shugyl wa shi a nta kaw kaning nchyum lana mi yup ai gaw, mung shawa masha ni a nta de nga sat nga sa lam san kawan hkawm let, shi hte madu mankrawn jahta ra ai majaw re nga nna tsun u ai.

Kaning mi nga tim, ginwang mu madu Jau shugyi dai kaw lana mi yup yu ai gaw teng ai lam re. Ginwang mu madu Jau shugyi yup yu ai kawn, Li nta ni a hpaga mung grau nna kaja bang wa sai. Hkawdap lahta na manam dap gawk dai yan kaw na saboi, ku, nba, hka shin jarung hte hkalep ni yawng gaw ginwang mu madu Jau shugyi lang yu sai re majaw, masat dingsat rai hku nna atsawm sha kashin gamun da nhtawm, manam ni hpe dingyang lang shangun na matu tawn da nga ma ai, đai hpang kawn yup gawk dai yan a manu yen 10 kawn yen 15 rai mat sai. Lai wa lai sa re masha ni yawng gaw gwi kyi a reng re myit rawng ai hkrai, manu rawt mat tim, ginwang mu madu Jau shugyi yup yu sai majaw, kadai mung dai gawk hta yup mayu ai hkrai rai nga ai. Htaw wa htaw sa hpaga ga ai mawdaw dareba ni lahkawng masum ya matut manoi rai, hkawdap lahta na manam dap dai hta sha wa yup mayu nna mawdaw hkrai gawt shapyen ma ai. Bai, wa sat Li nta ni a wa pu wa kan wa sin gangau hte hka n pau ai duhkang tsa a majaw mung rai nga ai. Maten daini du yang, wa sat Li a nta kaw hpa mu kaba wa mi byin tim, gahtawng na masha ni grai mau kajawng na lam n nga nga ai, ginwang mu madu du ni du hkra yup yu sai shara hta, kaga hpa mu dai marawn kaw n mai byin na rai.

Gat shani du jang, hpang jahpawt nhtoi manka e she sat sat re wa hpe shana de sat nna, htingra ta na wa nang shana de saira hkrai hkrai ngu manam shangun ai gaw hpa mun mai sawn nga ai, sat jang gaw sat sai mu, wa shan pa lahkawng hpe hpunpyen kaw kra jen tawn rai, ntsin hte sai ni ru kashin kau rai nhtawm, balasatik ahpa bai magap kau rai, hpang jahpawt sa dut tim, kadai wa shan dai gaw mana sat ai re nga yu shapraw na mung n rai nga ai. Shawa masha ni shat sha dabang kaw shat sha let, le tsun waw tsun rai nga ma ai. Masha kau mi hka-wan na shat ma mat nna, nta de shat wa bang la mat wa, lagawn nchyawn ai ni gaw ma ni hpe shangun rai nga ma ai, ma ni rai jang ya sha shat bang lang rai pru wa ai majaw, mi gaw ntsun, manang pru wa sayang she bai shangun ai nga angun taw nga jang, ma hpe nang e shade law kra bau kaba tawn yang, nta de shat sha wa bang la shangun tim n shamu ai gaw, ga shade n madat na jau chye ai rai yang, n lu tawn yang she mai sana wa nga wu bang wa sai. N kam wa bang ya ai ngu mung rai n tsun, myit sha naw gan nawnna nga ai laman, kaba ai ni e yawng a man kaw pawt bang wa ai majaw, gaya dum nna, kadai nang hpe ngai e lu tawn shangun ai rai?

Kadai nang hpe shaprat shangun ai rai? Ngu kanu yan kawa hpe san shati bang wa jang, masin brawng nga lata maidang gata kaw dung da ai zauhkai shaw kabai bun dat ai nga yang, shat sha dabang ting ninghpu hte hput rai mawng wanna, masha law malaw gaw ta lahpum hte shat hka-wan hpe ahpum magum nga ma ai. Dabang kaw ninghpu hte hput rai garu mawng jawng ai shaloi, dabang shinggan de nna, hpa nan ga-law sha ai rai? Galaw ra a ni? Tinang kanu kawa ni nanhte ma ni hpe shat hka-wan mi sha wa la shangun yang shut a ni? Nga marawn pru wa ai nga ra ai. Dabang hta galang ta zim mat sai. Yawn yawn nga let grain rai dum ai ma ni mung gatsi mat sai. Mare masha ni a shinggan myisha gaw jen nsen pru wa ai maga de tam yu wa masai, yawng gaw gahtawng lam kawn marawn de lung wa ai shara de mada dat ai hte, wa sat nta na Li Sin marawn kawn mare de nhtang wa nga al hpe mu masal. Lu Kin Bau shat sha dabang nna nta du wa ai shaloi, dam lada ai hkauna pa kawn jawnggawk de sanpoi hpye shang sa wa hkyem ai zawn rai, loi lahkyum lahkyum rai tauta nga ai. Kawa mung shat sha kau ngut rai ndaw kaw hka-tu marawp dung nga u ai, malut wan gaw wa-nang ningrim gata kaw galang chyi wa galang si mat rai gala nga ai.

Kanu gaw shat gawk kaw di hka-wan kashin rawng nga ai, di mala ankawk teng tang hkra ai nsen ni ahpraw nga lwi ai hka-wan kashin ntsin gata hta mat mat sai. Kin Bau shat gawk de shang wa nna, shat ngam hpe hka-wan hte nawng di shat shadu saboi ntsa kaw ganawng tawn kau let, lama mi tsun mayu ai zawn rai kanu hpe mada la yu rai, baw dagup da in shat gawk kawn bai pru mat wa sai. Kin Bau kawa a makau kaw sa chyingjawm dung nga nu ai. Hpa mu ra a? Hpa n ra ai. Hpa mu ra yang tsun u le. Wa, ngai hkyukhtawng sa rawng mayu ai. Kawa na kajawng mat sai. Na kajawng ai ja aja wa gan marawp dat ai malut wan kawn mada mu ai dingla wa a myiman gaw, akya nawnnawn di gayau da ai hkausoi kawn, aja tengteng re nlung hkausoi tai mat ai zawn rai nga ai. Dingla wa hka-tu hpe n-gup kawn la shapraw kawn in, kasha hpe azi yu taw nga ai nsam gaw, galoi mung n mu yu ai lam shang san ai masha tsasam hpe yu ai zawn rai nga ai. Kawa gaw, Kin Bau, nang hpa tsun a? Ngu san dat sai. Kasha Kin Bau kawa hpe galang bai mada dat nu ai. Ningsin sin ai majaw, ya yang kawa a myiman gade daram hpaw n tsawm nga ai hpe n mu mada nga nu ai, n mu mada nna, kawa hpe n mada mat ai sha, zauhkai raw la nhtawm kawa a man kaw galaw dung bang wa nu ai, ta lahpum lahkawng hpe lahput kaw mara tawn rai, ta latsang gaw naw-kyu zawn rai ai lama mi baw ai zawn di mahti hkrai mahti let kawa a ga san hpe mung alawan wan n htan ai dung gangu taw nga nu ai.

Kawa gaw, mi yat nang hpa tsun a Kin Bau ? Nga galang bai san cat sal. Wa, ngai nang hte mu lama mi bawng mayu ai, lama nu hte nan hkraw jang, ngai masha ni a matu hkyukhtawng loi ya mi sa rawng malai ya mayu ai. Kawa gaw, manya nbu wa nni? Kin Bau! Nga grang wa sai. Kin Bau gaw baw hpe grau gum tarung tawn nna, wa, ngai nang hpe mai n mai ngu bawngban san nga nngai le, ngu tsun nu ai. Loi hkring ai hpang, kawa gaw, kadai a matu sa galai ya? Ng san u ai. Gat lawk du wa a matu. Kawa baw shadap dat nna, kadai a matu daw aw? Nga bai mau nga sai. Gat lawk du wa a matu law! Kin Bau mung ga ja ja hte htan dat nu ai. Kawa ndam la ai zawn nga nsen hte, gat lawk du wa a matu nang nan sa malai ya ra ai i? Ngu mani asang let tsun u ai. Kin Bau gaw, ya ya sha shat sha dabang kaw wa sat nta na wa tsun ai le, daina de jan shang wa ai shaloi, gat lawk du wa mawdaw gawt nna marawn hku lai wa yang, Chyangjai gahtawng na sak hkun jan ning re ramma langai hpe adawt sat kau ai da. Gat lawk du wa masha adawt sat kau jang gaw shi mara hkam na gaw htung re, raitim gat lawk du wa gaw gat lawk du bai rai, kadai wa du wa hpe mara gwi hkam shangun na rai? Dai majaw, ginwang hkrunlam rung de mara sa hkam la ai masha mi nga ra nga ai, masha gaw ngai adawt sat kau ai re, ngai wa sat Li ni a nta kaw chyaru lu law kau rai, htawlaji gawt pru wa ai shaloi adawt sat kau ai re ngu sa tsun jang rai sai da. Hpang na mu gaw hpa n myit law ra sai, gat lawk du wa chye lajang sai nga ai.

Manghkang dai hpe kaning di lajang na du kra hparan kau sai nga, Chyangjai gahtawng na masha adawt sat kau ya ai nta ni hpe gumhpraw loi wa kau jang rai sai da, gumhpraw gaw gat lawk du wa pru chyalu sha re. Jahtum, jahtum e gaw, kadai wa masha gaw ngai ahtu sat kau ai re ngu tsun ai wa, pyada rung de hkyukhtawng shi hkun ya sa rawng jang rai sai. Shata jan pru wa ra ai. Wu-kya marawn gahtawng ni shata jan gata hta mare pyi n nga ai daram hku gatsi zim nga ai majaw, mare hkan hkawm ai sharat pyi asan sha na lu nga ai, bukbuk bakbak aru nga hkawm shara nga ai sat ni gaw sinna de nna sinpraw de tsem tsem nga tsan mat wa sai, jahtum e sharat dai ni gaw wa sat Li nta ni a ndaw kaw du ai hte htum mat sai. Kin Bau a kanu kasha tsun ai mu hpe chye madat htai la sam nu ai, agatsi sha ganang na ga lasi ka-htang mi hte lahkum hpe la shapraw nna, Kin Bau hkan wa a lapran kaw lahkum htit di sa tawn da nhtawm, ga lasi ka-htang hpe lahkum ntsa kaw mara tawn da rai, shi mung ga lasi ka-htang makau kaw majoi mi dung dat in, kasha hpe mada yu, madu wa hpe bai azi yu rai, nsa kaba shaw let agatsi sha hkan dung nang nga nu ai. sun ga nga yang, Kin Bau sak 29 ning rai sai, sak 29 ning du tim num n mu tam nna dinghku rai nde ai gaw ndai Wukya gahtawng marawn kaw shanhte Lu nta ni hkrai sha rai sai. Hpa majaw nga yang, nta dinghku matsan ai hta lai nna, ya daini sha n rai, shawng de kawn ndai gahtawng na ni nta shagu ngu na wut nta gap rawng ai hkrai rai mat masai, shannu wa ni chyu sha shangu nta kaw naw rawng nga ma ai, bai nna, Kin Bau myit masin gaji ji ai gaw, madu a hkauhting hkauna na naimam hpe nga gumra e kam ai hku dingsa sha ya nga tim, nachye sharawt dat ai hte nga gumra mung madu nga ai hkrai re ngu bai dum dat ai hte, ta n du gwi mat nna, sharawt tawn ai nachye hpe bai dawm la kau kau rai u ai. Ndai zawn re masha kaw kadai num jan wa gwi na rai. Lai wa sai ten hta, num lahkawng masum lang gaw matut ya yu masai, raitim, num kasha a nta na ni Kin Bau hkannu wa ni a nta kaw sa mu ai hte ga lahkun mi pyi n tsun ai nhtang wa mat mat rai ma ai. Ndum ai nga yang daini na gumgun asak du mat in, num wa yu sai gaida pyi n gatut hkraw nga nu ai. Shata kru a shawng e, jinghku ni shi hpe num langai shachyan ya ma ai, tsawm n tsawm hpe rai n tsun ga, num dai sak 26 ning sha naw re, ma lahkawng woi ai. Nnan e Kin Bau chyawm n hkraw ai re, jinghku jan e shawng hkrum yu nna bai tsun ga ngu chyu shagwi ai gata hta hkrum hkat masai. N myit madawm da ai num dai hkrum ai hte galang ta Kin Bau hpe lawu na zawn nga san bang wa sai: Ganau gana mung n lu ai nang chyu sha i?

Ngai la sha shingtai re. Bawsang mying bung ai gahtawng kaw law ai kun? Anhte nta ni hkrai re. Jinghku jingyu ni gahtawng nhtawn rung hkan asuya magam gun al masha yi nga a? Kin Bau du ganga dan nu ai. Num dai galang ta lahkum kawn rawt tsap dat grai pawt let, nang hpa majaw ngai hpe deng shi jan hkawm shangun nna, nang hte sa hkrum shangun ai rai? Na jinghku ni nang hpe ngai a shawng na la wa gaw masha ni hte hkauna hka gashun n dang ai majaw, masha ni e abyen tawn ai hkrum nhtawm, nta du wa ai hpang shi hkrai noi si mat ai lam n tsun dan ai kun? Ngai ja gumhpraw hpe mung n ngu ai, masha ni hpe roirip lu ai mi n nga tim, masha ni e roirip ai n hkrum ai, ngai hpe makawp maga lu ai, dinghku kaba ai, ga tsun n-gun lu ai la she tam na ngu myit da nngai, nga tsun let Kin Bau ni a nta nhku kawn pawt lahpre pru mat wa ai, nhka kadun shingkra lai, ndaw ya kaw du ai hte pai hkra gayin gaye mada yu nhtawm, yin rai bai nhtang shang wa nna Kin Bau hpe wa yu shati tawn nhtawm, daini gat shani re, ngai deng shi jan hkawm kau nna nang hte sa hkrum ai ngu, ngai a ten lani mi tup lahpawt kau sai, lama ngai gat kaw namlaw namlap simaw simai sa tam dut dam tim, gumhpraw hkoi sanit matsat shi sha gaw apyaw sha lu tam ai, daini, nang e lahpawt kau ya sai, ngai nang hpe gumhpraw sanit matsat shi wa rit n ngu al, kaning nga tim manga shi sha gaw wa na tai a dawng? Ngu tsun dat nu ai. Kin Bau na mau ai lata, hpa tsun ai re nang? Ngu san dat nu ai.

Num dai gaw, nang ngai a ten lani mi ting lahpawt kau ya ai majaw, ngai hpe gumhpraw manga shi wa ra ai, ngu bai tsun sai. Kin Bau wa wutik kau let yat sha, nang hpa rai shade myiman htat ai re ngu tsun dat nu ai. Ngai gaw myiman htat ai num re, lama nang ngai hpe adup shing nrai, ngai hpe gumhpraw manga shi wa ai hte ngai ndai kawn hkawm mat wa na nngai, lama nang ngai hpe gumhpraw sha wa nna, n adup jang, ngai ndai ndaw kaw nang ngai hpe masawp ai, ngai hpe gang ai ngu jahtau tsap nga na, ngu tsun tsap nga u ai. Kaning n chye di ai Kin Bau gaw, nhku de shang wa nhtawm, gumhpraw manga shi wa shaw la rai, num dai a ta kaw sa matsut bang ya let, hkawm sanu, hpang de ndai Wu-kya marawn hkan hkum lai hkawm ngu gawt nu ai. Num dai gumhpraw hkap la yu rai, nang lama ngai hpe shabyi galang mi bye ya gwi yang gaw, ngai nang kaw wa na ngu bai tsun sai. Kin Bau num dai hpe, hkawm u, gumhpraw mung ya sai, ndai kawn lau pru mat wa sanu! Ngu shachyut bang wa sai. Num dai Kin Bau hpe, nang lama ngai hpe adup ai hte ahtawng ai hte di gwi jang, ngai ma lahkawng hpe manang ni e ya kau nna, nang kaw wa na, ngu bai tsun sanu ai. Kin Bau gaw, nang ana lu ai kun? Nang sai hten ana lu yang, ginwang tsirung de sa yu na tai ai, ngu tsun jaw dat nu ai. Num dai gumhpraw manga shi hpe Kin Bau a man kaw kabai bun kau da nhtawm lahpre mat wa sai. Lahkam lahkawng dang hkawm ai hte yin rai bai nhtang wa nhtawm, la pyi n re, kadai nang kaw wa gwi na kun, kadai nang zawn re kaw wa yang, prat tup masha ni e roirip ai hkrum sha chyalu sha re, ngu tsun bun kau da nna bai lahkat pru mat wa sai.

Teng sha tsun ga nga tim, Kin Bau hkannu wa ni hpe kadai n roirip yu nga ai, mare kaw shanhte nta ni hte bawsang bung ai kaga n nga ai majaw, lawu lahta jinghku jingyu n lum ai nhkan e, numma langai sha pyi n lu hpyi hkungran la nga ai. 29 ning rai sai, gade n re ai nga yang sumshi ning du na chyu sha rai sai, masha a prat chyen mi ngu na rai hkyem sai, sumshi du wa tim kun dinghku nde sha Iu ai majaw, Kin Bau gahtawng mare kaw myiman n nga ai zawn ngu ai hta n-ga, kanu kawa tai nga ai ni mung myit n pyaw nga ai sha n rai, galoi mung kasha hpe lama mi shut hpyit ra taw ai zawn chyu ngu shangun nga ai. Kin Bau a kawa lutsoi hpe hka-tu kaw galai bang la rai, n nat shachyi ai lagaw nhpang kaw tawn kau nna, ka-htang na ga lasi sa magra baw bang wa nu ai. Ga lasi b sha hky sam ai ngu yang gaw, ta kaw baw latup lang tawn nha n sha ai, shata jan shingna gata kaw baw dagup tawn rai zauhkai kaw dung taru taw nga ai kasha hpe yu dat ai shaloi, kasha gaw ga kaw mara tawn ai akya re rai makai zawn rai nga ai, gade lang galai galup na ngu tim, gumhpraw hta dang nna, n lu galai ai shangu nta gaw dupdup byakbyak rai ai hta n-ga, nta ntsa kaw na tsam byak mat ai shangu lahkyawn mung, shata jan gata kawn yu dat yang, marai mi e lagu htu malawng tawn ai lupba nhkun zawn rai nga ai. Bai nna hkalap n rawng ai shat gawk hte chyinghka lam kaw yeye rai dung ai hka yam ni ma hkra hpe shata jan gata hta asan sha mu nga ai. Makau na walawng shakum, chyinghka, nlung wa-kang ni chyawm tingting hkanghkang rai taw nga ai, rai yang, hpa majaw rai kun, wa n mai yaw kaba hkraw nga ai, wa yaw yang wa si, bainam rem yang bainam si rai, hpang e gaw ulawng mahtang shatai kau sai, u ni chyawm grai brat kaba kam nga ai, raitim, u kanu ni masum mali ya rai jang she udi langai dang di di rai nga ai, yinam udi di ladaw hta tim lahkawng masum ya rai jang she langai dang di tawn ya rai nga ai, masha ni a nta na u kanu zawn lani mi langai langai di, shing nrai, u kanu langai lani mi udi lahkawng masum di ai ngu ai gaw galoi mung n nga yu nga ai.

Ndai gaw Lu nta ni a nga pra mabyin masa nan rai taw nga sai. Kin Bau a kawa gaw shannu wa ni a nga pra masa hpe yu jin yu lau ai zawn rai, shata jan gata hta shara shagu yu hkawm nga ai myisha hpe dawm la kau in, ta na ga lasi sha dat ai hte, nau hkraw mat, n sau sai, nga tsun u ai. Madu jan gaw, sha mu sha mu, ndai mung Kin Bau a gatsa wa daini shagun jaw dat ai sha re nga jang, Kin Bau a kawa ga lasi galang bai sa magra la nhtawm, ta kaw hpikhpik hpawkhpawk nga baw let, yawng sha mu le, Kin Bau, nga kasha hpe tsun u ai. Kin Bau gaw, ngai n sha ai, nga htan sai. Nang kaning rai gat lawk du wa a mara sa malai ya yang, dik htum hkyukhtawng shi hkun ya sha sa rawng ra al hpe chye da ai rai? Wa sat Li tsun ai re. Shi kadai tsun ai kaw na na la ai re da i? Kin Bau a kawa akri akraw nga san wa jang kasha gaw, shi n chye ai hpa? Gat lawk du wa masha adawt sat ai gaw shi chyinghka lam kaw she re, ginwang mu madu wa du hkra shi a nta kaw yup yu ai, ngu tsun dan dat nu ai. Kanu mung, masha ni a htawng sa malai rawng kre ngut ya jang, gara hku bai ngu? Nga san u al. Rai sai, rai sai, num ni nsi me, rawng ngut nna kaning di? Kaning rai kam yang kaning rai le, shi hpe gat lawk du kadai galaw shangun ai rai, shi hpe kadai e anhte a ma hpe htawng sa rawng malai shangun ai rai. Kin Bau a kawa madu jan hpe abyik dat nu ai. Hpang e, kawa gayin wa nhtawm kasha hpe yu let, Kin Bau, nang teng sha sa mayu jang gaw sa su, htaw wa sat Li hpe gat lawk du wa a malai nang htawng sa rawng ya na ngu wa tsun dan su. Wa sat wa a mying gaw Li Sin ngu ai re, matsing da u, wa di ngu shaga yaw, masha ni a man kaw wa sat wa, wa sat wanga n shaga ma ai. Kin Bau a kawa kasha pe matsun dat sai.

Shata jan grai tsaw sai, ndaw yang wang ting asan awan nga nga ai, ga hkan ba ai katawn ni singkaw ahpraw hpraw rai galap let krik ai pyi mu mada nga ai. Kin Bau ga kawn rawt ngoi rai shinggan de pru mat wa ai shaloi, kanu gaw shingdu hku nna ga lasi latup mi gan magra lang rai hkan shachyut pru wa nhtawm, hkawm let sha u, grai naw sau mu ai, nga hkan tsun u ai. Kin Bau kanu a ta hpe ahpre ganawng kau da let, ngai n sha ai law nga sumtsan hkawm mat wa ai zawn shingdu pyi n gayin ai pru mat wa sai. Shingdu n gayin ai nga tim, shi a hpang kaw ga lasi baw ai nsen hpe asan sha na nga nu ai, shata jan gata kaw marai mi hka kaw rai kashin al zawn prawhpraw hprahpra nga shara nga ta ai sharat dai ni masha hpe loi nja nja nga ai myit pyi rawng shangun nga ai. Wa sat Li nta ni kyin taw nga ma ai. Ndaw ya wang gata kaw wanpu kaba lankawng bai matut shachyi jat tawn rai, sansan nga mai nga ai shata jan hpe shingna pyi n mu hkra wanpu e tu shinggang kau sai. Gara kaw na maw nhkun hpaw ai nta masha ni hpa hkalum hkyem ai kun, akajawng sha ya ju ya hkye nga dai shana nan wa gan sat shangun ai majaw, wa sat Li gaw shi hpe garum na masha marai lahkawng mung saw shaga jat la hkra, ndaw kaw wa sat hpunpyen langai bai shayu jat la hkra rai, wa sat kyin nga u ai, hpang shani gat bai ang nga ai, gat de shan n sa dut ngu yang gaw, shawawl galoi mung shi kaw shan sa mari ri re manang ni hpe la gawm kau shangun bai n mai rai, nchyang saw la hkra rai shana de kawn wa sất bang wa nu ai, wa sat garum ai yan hpe wa langai sat yang gumhpraw hkoi shi shi jaw u ai.

Wang ting masha hkrai mawng jawng nga ai, maw nhkun de na mu galaw masha ni, sa yu chyai ai mare na ma ni, htingbu gahtawng hkan na wa sa dut ya ai masha ni gaw rim garawt hkrat wa ai wa hpe nta madu ni, jang kaw hkap gang shen la ya na matu la taw nga ai. Kin Bau mare kawn pru wa ai shaloi, hpunpyen ntsa kaw sai hte pyun rai galawp ye nga ai nsen na dat ai hte, nshung si hprwi nga hte hkum pyi ashun gari dat nu ai, masin hpe shaja la let hkum hpe aja wa ari kau rai, myit ja ja hte matut hkawm lung wa nu ai. Tsun ga nga yang, masha sat ai gaw n rai, wa she sat ai me, hpa krit na lam n nga nga ai. Mawdaw pyi gawt shang wa mai ai wa sat nta ni a wang gata de du bang wa yang, hkum hte nawng re wa shan pa kaba lahkawng chyinghkyi hkai kaw noi nga sai, shingma akrin rai palawng n hpun ai wa sat Li gaw shingdu yawn rai, hpyau hte ntsin gamai la la rai, wa shan ru kashin taw nga ai, ahkye hkye rai lwi yu wa ai wa sai gaw, pyilat ga kawn hka hkawng hku lwi lai mat wa in, wa sat Li nta ni a nta shingdu de lwi pru mat wa sai. Mungkan ting akahtet hpoihpoi nga saira bat hkrai rai nga sai. Sa garum ai la kasha lahkawng hta na langai wa gaw, wang shingjut kaw di ndam hta ntsin shadu tawn ai makau kaw wa mun ahkut ahkyen nga ai, langai gaw chyinghkyi hkai kaw noi tawn ai wa shan hkan ntsai ai wa mun ni hpe hpri pa mi hte hkan ahkut shatsai nga u ai.

Wa mun ningsing gaw ju jahkat kau ai dusat hpyi zawn nga manam n pyaw la nga ai. Wa sat Li a nta kaw shaning ting ting ndai zawn nga bat manam nga u ai. Ndai zawn nga bat manam ai shara kaw ginwang mu madu du wa kaning rai lana mi yup shalai lu ai hpe Kin Bau mau nma taw nga ai, ginwang mu madu du wa lana mi yup ai gaw teng nga ai. Htap lahkawng na manam gawk chyinghka lam ntsa kaw: Ginwang mu madu Jau shugyi ndai kaw yup yu ai, nga laika ka shakap da nga ai. Wanpu gata kaw Kin Bau laika dai yu nga yang, makau na manam gawk langai hta na chyinghka lam ntsa kaw mung: Ginwang du ma ndai kaw yup yu ai, nga bai ka shakap tawn ai hpe mu nu ai majaw, galoi na lapran ginwang du wa du hkra ndai kaw yup lai wa yu sai kun? Ngu shi hkrai yu mau nga nu ai, tim, n yup yu ai hpe nta madu ni yup yu sai ngu gaw n ka shakap da na ma ai ngu bai myit la nu ai. Ka shakap tawn ai laika hpe yu let, Kin Bau masha maling hku gale matep shang wa nhtawm, gahpa shan chyen kaba mi kashin lajang shatsawm ngut wa ai nta madu wa hpe wa di ngu yat sha galang mi shaga dat nu ai. Wa sat Li du pyi n gayin al, lahpum hkan na wa sai ntsin hpe ahpre kau let, ta lahpum hte gahtan na salat ni bai gatsut kau rai, sai hkrai hkrai naw lajang ra ai wa shan gahpa chyen mi hta hka chyagawt ka-mai hte ntsin ja jaw bang wa nu ai. Du n gayin ai nga tim, shi hpe shaga ai na dat sai majaw, Kin Bau n rai? Nga san dat sai. Kin Bau gaw, oi, ngai re wa di, ngu htan dat sai.

Wa sat Li ka-mai hte wa kan de ntsin gamai bun let, nang gat lawk du wa a matu htawng sa rawng ya mayu ai nrai i? Gade she kaja ai ginjang re, masha ni yahpau gade nat tim n mu tam ai ginjang rai nga ai, nga tsun u ai. Kin Bau a man de wa sai gahtan hkra wa jang, shingdu de loi nawt rai sit mat nna, nu yan wa hte mung bawng yu sai, ngai sa malai na hku dawdan da saga ai ngu tsun dan nu ai. Wa sat Li gaw, ka-mai hte ntsin galang bai jaw bun dat nna, Nang sha kam jang sa mai malai ai n rai, htaw nhku de naw wa la nga su, ngu tsun nu ai. Kin Bau shawoi nta madu ni manam ni hpe shat sha shangun ai gawk de du bang wa yu yang she, dai kaw rau gahtawng mare na masha marai masum dung nga la ai hpe shang mu nu ai. Langai gaw mare htumpa na sak mali shi jan re Wu Ju Zi rai nga ai, shi madu jan gaw ma mung woi rai masha ni kaw hprawng nang mat wa sai, htingbu gahtawng na nhtawn rung kaw asuya magam gun ai wa a ganau a nta kaw sa hprawng rawng nga ai, kaning ngu tim nta n wa kraw mat rai, Wu Ju Zi gaw nta kaw shi hkrai hkraw mau rawng nga nu ai; bai langai gaw mare dingda maga na Gawng Yawt wa Jau rai nga ai, dinghku grai nga pyaw ai re, wut ju ai wut nhkun daw agrawp yu wa ai kawn, lagaw mung layawt labye mat sai, jamjau jamhkaw hkrum sha ai sha n rai, nhtawn gumhpraw dum kaw hkoi la ai gumhpraw hka sumpum sumpam mung naw kap nga ai. Naw ngam ai langai gaw mare na Li Hkyin rai nga ai, shi gaw gat lawk kaw hpaga yumga kasha ga sha ai hta n-ga, mawdaw hte rai garawt sha rai gumhpraw tam u ai. Ju Zi hte Gawng Yawt wa gaw Kin Bau hte maren, gat lawk du wa a htawng loi ya mi sa malai rawng ya mayu ai hkrai rai nga ai, Ju Zi gat lawk du wa hpe shi a madu jan hpe sa woi wa ya na myit mada nga ai, bai Gawng Yawt wa gaw lama shi du wa a htawng sa rawng ya jang, ginwang daw nhtawn gumhpraw dum na hka shi n wa ra na shadu nga u ai. Li Hkyin hpa a majaw, a sha rai Ju Zi yan Gawng Yawt hte saboi langai kaw rau dung nga la ai hpe Kin Bau n chye nga nu ai. Shing rai, Kin Bau shang wa ai hte, dung nga ai marai masum mung shi hpe hkap yu, shi mung shi hta sak laning mi gaji ai Li Hkyin hpe azi taw nga nu ai.

Li Hkyin gaw marai mi a lama mi gashun la kau shut ya ai wa zawn rai baw hpe dagup tawn nna, ngai a ganau daining sara jawng kawn pru hkyem sai, gat lawk du wa hpe ganau e gat lawk kaw laika wa sharin na matu garum hpyi mayu ai, nga tsun shapraw dat sai. Ju Zi gaw Li Hkyin hpe myida de galang mi yu dat nhtawm, nang gaw shade nga pyaw sayang, grau naw kaja mayu i? Ngu dat jang, Li Hkyin a du grau nna gum tarung mat wa nu al, myiman mung chyinghka lam shinggan ga hkan na wa sai zawn hkye wa nu ai. Dai shaloi, Gawng Yawt wa gaw Li Hkyin a du sa gang sharawt ya nna, nang hkawm mat sanu, Ju Zi an Kin Bau hte ginjang ndai gasnun yang chyawm mahkoi rai kun, ngu bai tsun dat nu ai. Li Hkyin n hkawm mat wa ai, hkumbai gaw pya pya rai du sharawt dat let mani dat nu ai. Kin Bau man nga ai lahkum kaw sa dung dat nu ai. Saboi dai gaw jut mali re saboi rai nga ai, shawng de na ni ba-sen saboi nga ma ai, ya daini she myu ga na ni kaw hkan nna shat saboi ngu kau nga ai, nhku hpe mung shat gawk ngu kau, shanhte jawm dung nga ai nhku hta n-gu naimam, shadung, sau re hte rai marai tawn kau jang, shinggan de man nga ai shara kaw saboi ndai sha shang nga sai. Gumhpraw daw nna shat sa sha ai n re majaw, saboi kaw hpalap tsing ai dannu hkaya langai mi taw ai raitim, kadai shanhte hpe hpalap ntsin n sa du jaw nga ai. Saboi ntsa de na wanpu hta jinu hte hkabwi ni pyen gaboi jawng nga ai, ka gayin ba jang hkabwi chyawm gaw wanpu kaw wa dung hkring gwi nga ai, jinu ni gaw masha hkum hte sau gaw nya nya re saboi ntsa hkan sha nsa kaba shaw let hkring nga ma ai.

Shinggan de wa bai nye wa sai, ahkraw nga ye madai ai nsen hpe na yang hkrit na zawn nga nga ai, bum shinggan wanleng lam na wanleng bahtau nsen zawn gaw nga wa, raitim, wanleng bahtau nsen daram gaw bai nsam al hta n-ga, garu gachyaw ai nsen mung naw lawm nga ai. Ashawk nga shaw ai wa a nsen hte masha a garu gachyaw shaga ai nsen ni gayau gaya nga nga ai. Loi garu ai htawm, zim bai nga mat sai, tsun n ra kaning nga tim, dai la ai nhkyi hpe wa a jahkraw kawn masin salum de abraw bang dat ya sai rai nga ai. Matut nna wa sat Li kawn hparan ai nsen hkrai rai sai, ndai hpe hpai malu kashin mat wa mu, wawra hpe lawan wan ga lajang na di mu nga ai kaw lai nhtawm, ndai grai hpum ai, wawra lasi la ai nga shawa masha ni tsun garu nga ma ai. Gumhpraw tam kyin nga ai wa sat Li gaw, kahtet saup nga ai nhku de gan shang wa nna, marai mi hpe ta layung hte madi tawn rai , e, nang gat lawk du wa a matu htawng sa rawng na di u, nanhte masum gaw yau sai nga shang tsun na ten pyi n lu da nu ai. Shing nrai, shi kadai hpe sa shangun na hpe n lu dawdan nna mi re, nhku kaw dung nga ai Kin Bau, Ju Zi, Gawng Yawt wa hte Li Hkyin ni hpe dung shadun tawn nga shangun nhtawm, shi gaw wa sha sat kyin taw nga sai. Wa sat Li a madu jan ni hte ma ni gaw ntsa de dat sumla hkrung yu nga ma ai, sumla hkrung kawn hkrat yu wa ai kagam tawng hte wut chyen ni gaw abung nga nta ntsa hkumpyen hkan hkrat yu wa ai nsen na dat nna, Kin Bau ntsa de mada dat jang, kaga marai masum mung hkan mada nang nga masai. Li Hkyin gaw, yuptung rai sai, nga tsun dat nu ai. Ju Li rai jang, nang tin yang nang shawng hkawm su, ngu sai. Li Hkyin bai, ngai n tin ai, nhtoi htoi hkra la ga nga tim la lu ai, ngu galaw dung ganyet nga nu ai.

Gawng Yawt wa Li Hkyin hpe mada yu, Kin Bau hpe bai yu rai, tsun ga nga yang, nang anhte zawn n rai ra ai, num mung rain la, laika nga tim chye ai wa she rai, teng sha gat lawk du wa a htawng sa malai rawng ya nha, mying hten mat jang, hpang de kadai jan nang hte dinghku de gwi na rai? Ngu nu ai. Kin Bau lama mi tsun mayu ai re, chyahkring na lapran hpa gan tsun dat yang she jaw na re n chye mat nna naw mau taw nga ai shaloi, Li Hkyin shi a matu htan ya nu ai, lama teng sha du wa a htawng sa lu malai rawng ya yang gaw, dinghku mung de sha mat lu sai. Kin Bau gaw Li Hkyin hpe loi chyeju dum ai nsam hte yu dat jang, Li Hkyin mung shi hpang de man yawng let du ngat di ganga dat sai. Li Hkyin hte wa sat Li gaw bawsang bung ai majaw, nta hkum mi zawn Li Hkyin chyu sha wa sat ni a nta kaw pru pru shang shang, le yu waw yu rai hkawm manu nga ai, ntsa de sumla hkrung chyahkring mi wa yu la rai, nhtang yu wa ai shaloi, wa sat kyin nga ai ni hpang de gayin hkrat wa nhtawm, kawa di hpe hpawtde kadai wa gat lawk du wa a matu htawng sa malai ya na hpe lawan wa dawdan na da ngu sa shadut da nu ai. Rai yang, shi grai na hkra ningwan hkawm la nna nhtang shang wa ai shaloi rai jang gaw, wa di shi anhte mali hpe madu hkrai marai mi hpe lata shapraw na re da nga bai wa tsun sai. Madu hkrai lata? Kadai hpe lata na rai?

Tsun ga nga yang kaning di nan n mai lata nga ai, kadai mung manang wa hpe myit hkrum lawm na n rai nga ai. Matut nna shanhte marai mali gaw shada bai jawm yu azi hkat nga sai, kadai hpe yu yang mung hkawm shamu hkyem wa mat na myit n myit ai zawn re hkrai rai jang, kadai mung kadai shingdu yawn yawn rai bai dung mau nga masai. Hkying ten gaw nga lahkru sharat zawn htihti htahta nga lai mat wa sai. Ningsin yuptung mung htumpa n mu ai hkahtung ningsa zawn she sin nga ai. Shanhte mali shing dai hku dung la taw nga ma ai, ntsa de na sumla hkrung bang ai nsen mung n ngoi mat al htawm, wa sat Li matut manoi wa manga bai sat nga ai laman, Ju Zi yan Gawng Yawt gaw saboi matu hkan galang mi bai yup hkru la masai, Kin Bau rai jang wa sat Li shanhte dung nga al hpe malap kau jaw sai ngu, nta madu wa hpe gat lawk du wa a malai shi hpe htawng i sa rawng shangun hkyem ai kun ngu sa san yu na re, sa shangun jang gaw sa, n sa shangun jang mung apyaw sha nta de wa yup nga na ngu myit taw nga ai ten hta, akajawng sha shat gawk chyinghka hpe marai mi e agung ngu wa akawk dat sai. Shanhte yawng rawt kajawng ai ja chyinghka lam de hkrai jawm mada nga masai. Shanhte hpe agung sharawt dat ai gaw nta madu wa n rai nga ai, wa sat garum ai la kasha langai she rai taw nga ai. Shi gaw wa sat nshi nhtu nhku hte chyinghka wa akawk ai re, nshi hkan na saitum saipa ni gaw adawt ganan hkra ai majaw, nawhpu pa zawn chyinghka lam na ga hkan ahte apya rai hkrat taw nga sai.

Yawng hprang ai zawn re hte, la kasha dai gaw jau kawn lajang manat latup hpai tawn ai ta na maisau majaw tawng mali hpe saboi kaw kabai tawn nna, shana hkying langai rai wa sai, nta madu wa nanhte hpe hkum la nga sa da, ndai maisau majaw mali kaw langai mi hta wa mun chyang makai bang dã ai, kaga masum kaw wa mun hpraw bang da ai, wa mun chyang kadai lu magra yang kadai gat lawk du wa a chyeju madu tai lu na re da, wa mun hpraw magra la ai ni gaw htawng n lu sa malai rawng ai nga tsun ma ai hte, la kasha dai wanpu gata kaw tsap nga let maisau majaw mali hte shanhte mali hpe yu nga nu ai. Chyahkring na lapran shanhte mali yawng yup bran mat manu ai. Kadai wa gat lawk du wa a chyeju madu tai nna hkyukhtawng sa malai rawng ya na mu kaba gaw maisau majaw mali gata kaw jau kawn makai bang tawn kau nga sanka. Maisau majaw gaw hpaw dat yang mali brang re salik kawp rai nga ai, hkyehkye kaka rai nsam grai tsawm nga ai, raitim majaw mali hta na majaw masum kaw bang da ai gaw wa mun hpraw hkrai rai nga ai. Shanhte yawng myi shagan tawn rai, maisau majaw mali hpe azi yu tawn tim, kadai mung maisau majaw shawng n wam sa magra hta dat nga ma ai. La kasha dal gaw, magra mu le, magra ma ai hte wa yup mai sai. Nanhte gaw maisau magra na akam naw rawng nga madai, ngai nta madu wa hte mana ting bawngban hpyishawn yu tim, ngai Wu-kya mare na masha n re ai nga, n sa shangun ai hta n-ga, maisau majaw du hkra pyi n magra shangun ai, nga tsun dat sai. Li Hkyin la kasha hpe mada let, nang anhte hpe shala chyai ai wa n rai? Ngu nu ai.

La kasha gaw, ngai nanhte hpe shala ai rai yang gaw, nanhte a gashu rai u ga. Ngai gat lawk kaw seng hpaw na nta gawk lahkawng mi shap la mayu ai re, kaning rai tim anhte bum ga na masha ni kawn ang hkraw ai, ngai lama du wa a matu shata chyen mi dang htawng sa lu malai rawng ya yang, gat lawk kaw ngai hpa hpaga n mai ga na rai? Gat kawk hta ai masha ni hpe mu jang, woi wunawng ni zawn shara magup naw hprawng makoi hkawm ra na kun? Nanhte lau magra mu law, ngai mu naw ra ai, nanhte magra ngut jang ngai wa sat mat wa na rai nga ai, nga tsun shadut nga sai. Li Hkyin ga n shaga ai sha saboi na maisau majaw langai shawng sa magra la nu ai. Matut nna yawng magra la masai. Kin Bau mung jahtum e ngam nga ai maisau majaw langai mi hpe sa hta magra la nu ai. Hpaw yu na ngu ai, ta loi gari ai majaw, ta salat bai pru rai, loi hpaw lanyan nga u ai ngu yang, ma hkra rai n lu hpyan dat ai laman, Ju Zi mani mahka dat let ngai a ndai kaw wa mun chyang rai nga ai, nye madu jan hte ma gaw ngai kaw bai nhtang wa na sha rai sai, nga tsun ngut ai hte maisau majaw hpe saboi gaang kaw tawn dat nu ai, yawng praw di yu dat yang, kaja sha wa mun chyang rai nga ai, gumdun mi daram galu ai wa mun zinghkat dai gaw hkaulan ju zawn rawng rawng rai maisau kaw rawng nga ai shan rai, ningsing wawa nga naw manam nga ai. La kasha dal chyinghka lam kaw tsap nga nhtawm, madu nga sai, nang gat lawk du wa a chyeju madu sa galaw su, yawng wa yup nga manu, ngu tsun dat sai.

Gawng Yawt wa gaw ta lahpan na wa mun praw hpe yu taw nga nna, gwichyit sha min rai yang gaw, jau na wa yup nga tim rai sa nga pawt let maisau majaw hte wa mun hpe kabal kau dat nu al. Li Hkyin saboi na wa mun chyang hpe galang mi yu la nhtawm, agatsi sha shi shawng rawt mat wa sai, pru wa ai shaloi chyinghka lam kadun kaw ma-ja galang mi ahtawng da nu ai. Matut nna yawng bra sai. Kin Bau wa sat Li nta kawn pru wa ai shaloi, htap lahkawng de na ginwang du, ginwang mu madu ndai kaw yup yu ai nga ka shakap tawn ai laika pa hpe galang bai mada yu u ai, nta madu wa hpe tsun da na ngu yang, nta madu wa gaw wa pu wa kan shaw lajang kyin nga ai hta n-ga, shat gawk maga de shingdu yawn rai bai rai nga jang, agatsi sha pru mat wa sal. Shinggan de na marawn hta bungshi hpwi hpwi nga bung taw nga ai. Tsan tsan de nna nbung hte swiswi nga manam pru wa ai hkaulan nlap bat hpe Kin Bau aja wa galang mi marawp dat nu ai, hkum ting azet atsang yup mayu ai bat gachyi mi pyi n rawng mat sai. Nta du wa ai shaloi, kanu yan kawa n nga nga la ai. Kin Bau ndaw ya kaw shang wa ai hte bapa gangau ai sangau manam hkrup sai. Dawdap na saboi ntsa hta lamu tsit sumpan hte rai makai langai gayawp mara da nga ai. Shi nhku de shang wa ai hte saboi na rai makai dai shawng wa hpyan dat nu ai, teng sha shi tak da ai hte maren rai nga la sai, kanu gaw shi hpe hpawtde manap e gat lawk du wa a matu htawng malai rawng mat wa yang, shata numra n lu pru wa na hpe myit du ai majaw, bu hpun na labu palawng hte mawza, kahtet ai shaloi hpun na hpahkai lawng, bu dawt ni du hkra hta lajang bang da ya nga sai.

Bai nna buhpun palawng makai kaw sumpan hte chywi ai zauhkai zum mi hte kaifang hkai zum masum mung naw rawng nga ai, hpa majaw kanu zauhkai dai daram bang lajang da ya ai hpe Kin Bau n chye nga u ai, hkyukhtawng n lu sa malai rawng ya mat sal, lama akam rawng nna sa lu malai rawng ya tim, shi hkun ya rai jang bai pru wa sal, zaunkai shade n hkai ra nga ai. Ningsin yuptung tung sai. Marawn de wa sat Li ni a nta kawn ngoi pru wa ai wa ye nsen kaw lai nna, mare hkan hpa sharat pyi n na sai. Rai makai kaw na buhpun palawng dingsa hkan na sabya bat hte zauhkai shakap ai nawlkrat magyep bat ni gaw nhku ting manam nga ai. Kin Bau rai makai makau kaw chyahkring mi tsap la rai, nhku kawn bai pru wa mat nhtawm, shat gawk na saboi makau kaw sa tsap nan nga nu ai. Kanu gaw shi hkawm mat wa yang na malu masha ma hkra lajang da ya nga sai re, sau hte gangau ai bapa, gaubawng, chyinghkrang sau ni a sangau bat gaw shat gawk ting manam nga ai. Chyaw di hte maren ren pa nna gangau tawn ai bapa pye mi hpe gaang kaw dingdung dingda brak di mali brang bai ga da nga ai, bapa pye shi lahkawng hpe saboi gaang kaw gahtap mara tawn da ya nga sai. Sau hte gangau tawn ai bapa hpe yu nna, Kin Bau krap mat nu ai. Shat gawk kawn ndaw ya kaw bai sa tsap nga let, Ju Zi nga ai mare htumpa maga de grai na hkra yu nga nu ai, yup mat ma sai Wu-kya mare na nnan galaw ai nta ntsa na kagam ni shata jan lagaw gata e lamu tsit nsam hkrai hprwi rai gala nga ai, Kin Bau hkannu wa ni a nta gaw tsit lali tsawm ai nam maling gata na nam ninghpawng chyahkraw mi zawn mare na nta kaba dai ni a gaang kaw up rawng nga ai.

Kin Bau a kraw hta ahkri nga hkam sha nga ai, mare na marawn de mada nga ai shinggan myisha dawm la dat ai hte, htingbu na garat jaw ang ai jan, yuptung yuphka e tin shapun rai gahprup shang wa nhtawm, Kin Bau hpe arat e ngai nta kawn ndai de shara ai na nna sa wa ai re, kahtet gamawt wa she rai sai, na nu yan wa mung anhte a nta kaw naw re, anhte yawng nang kam hpuwang kaja ai lam jawm tsun jahta chyai rai ga ai, ang shaa daini nye kaning jan ngai hpe wa kawan u ai, shi mung madu wa hte hka mat sai, nang gat lawk du wa a matu htawng sa malai rawng ya hkyem ai lam na ai hta n-ga, nang num rain la ai chye ai hte, nang hpe shi myit grai mada nga ai. An lahkawng na nta kaw yuptung du hkra sa la nga ai re, nang lau n pru wa nna, an wa mat ai hte nang bai du wa, ningnu yan ningwa gaw ngaining jan hpe sa sa ai nga nha, anhte a nta kaw naw jahta chyai nma nga ma ai, nang alawan she anhte nta de nye kaning jan hpe sa hkrum shaga yu su, nye kaning jan tsawm tsawm ai gaw manti tim baw na zawn re hkawnji kasha daram tsawm ai nga Kin Bau hpe lau hkawm le Kin Bau, ya mung lawan u law, hpa rai mau tsap taw nga a? Nga sa shadut taw nga sai. Htingbu garat ang ai jan gaw deng mali shi jan gang ai gat lawk na masha re, hkumgawng siKsiK rai tsawm mung tsawm ai, shi a madu wa gaw paga yumga chye galaw ai majaw, gat lawk mare kawn Wu-kya bum gahtawng de num wa ai rai nu ai.

Shi gaw laili laika hpaji chye ai sha n rai, ga chye shaga ai hta lai nna, n tsawm ai buhpun palawng ni shi a hkum kaw du jang tsawm mat lu nga ai. Wu-kya marawn na ni shi daram kungzet tsawm ai masha n nga ai hpe shi chye da ai kawn, manang hte ga shaga yang galoi mung bawngban yu ai lam n nga ai, jawng gaji hkan na jawngma ni hpe sharin shapan ai sara ni zawn rai nga ai. Shata jan marawn wawra hkran maga de gale mat wa ai hte ndaw ting sumpan chyamut e dagup tawn ai zawn nga nga ai. Shata jan mapmap nga ai gata kaw Kin Bau htingbu jan a myiman hpe asan sha n mu ai raitim, shi a matut manoi nga tsun shaga nga ai nsen hte nbung hkat kaw alang rai ningwut gaye nang nga ai hka numri hkinlang zawn mawng nga ai ta lahkawng hpe sha mu nga nu ai. Ningsin yuptung e htingbu jan tsun ma ai hte Kin Bau a ta kaw gra rai shi a nta de dun mat wa hkyem sai, alum akya nga htingbu jan a ta gaw wawpwawp nga basi zawn shi a ta latsang kaw manat da ya nga ai. Htingbu jan a samram kara na bat gaw nshung ta e akajawng sha poi wa ai lanam ladaw na hkaulan nngawt zawn nga sama hpe manam hkrup dat ai hte hkum ting akahtet hprwi hprwi nga gumtawng lung ai nsa gaw laring gumra wuhpung zawn chyahkring na lapran pungding de du mat wa sai. Baw chyipchyip nga wu mat ai hpe na ai Kin Bau gaw htingbu jan e gang tawn ai lata hpe gang htingnut ahke shaw la let, ngai gat lawk du wa a matu htawng n lu sa malai rawng ya sai, Ju Li kaw she ang mat sai ngu tsun dat mayu ai re gaw, arat, nang ngai ngai hpe hkum gang taw nga law, ngu tsun shapraw kau dat sai. Kaning rai a? Ngaining jan hpe n ra ai kun? Ngai gaw hkyukhtawng sa rawng ai she re, hpa arawng satang mung n rai. Nang gaw gat lawk du wa a matu sa rawng ai hpe ngai chye da nga ai. Shi hkun ya sha sa rawng ai mung n rai, masha pyl adawt sat kau sai gaw, laning lam hku rawng wa na re. Htingbu jan asin nga ai ndaw ya kaw tsap mani nga let, sumpan makai gata na zauhkai zum masum hpe nang mu sai n raii? Dai gaw ngaining jan ningsin e satut seng de sa gan mari wa ai re, shi tsun ai htawng rawng ai masha ni yawng gaw gana ju ai mu sa galaw ai, grau nna jak rung hkan mu galaw ai ni chyahtam grau zauhkai ma ai nga, htawng sha rawng jang gaw yawm htum laning numrang nga sa rawng ra ai da. Lama lahkawng masum ning rawng ra yang kaning di? Ngu Kin Bau bai san dat sai.

Htingbu jan gaw nye ning sumnum sumdi myit masin dinghpring ai jan re, shi madu wa myu de shawa num chyu tam hkawm ai majaw she madu wa hte hka bra mat ai re, nye ning gaw la ni htawng rawng mat tim myit n daw ai, la ni gumhpraw lu jang myu shang nna manam jarawp hkan chyu yup hkawm, hpaze gawk chyu shang hkawm na hpe sha hkrit tsang u ai, nga bai tsun shali nga ai. Rat, nang pyi shing nga jang gaw, ngai na nta du ai hte ningning jan hpe kaning ngu sa tsun na rai? Kin Bau san dat sai. Htingbu jan gaw nang ningnu gangau tawn ai bapa pye lahkawng mi hta lang rai, yuptung tung sai, kan kawsi na masai ngu sa jaw su ngu matsun dat nu ai. Htingbu jan wa mat sai. Atsang rai htawt ai sat gaw tsingdu ntsa kaw gumhtawn hkawm ai bainam zawn rai nga ai. Kin Bau ndaw ya kaw htingbu jan pru mat wa ai hkan yu taw nga yang, shi hpe lau u lu, dai kaw gabyin gabyu rai chyai nga nna nhtoi htoi mat na, nga nhtang shadut kau da ai tawm, ningsing maling kaw mat mat wa nu ai. Kin Bau htingbu jan tsun ai zawn shat gawk de shang wa nna, bapa n wa la u ai, ndaw ya kaw grai na hkra tsap la yu rai, myit dinglik hkut ai hte, shinggan de pru mat wa nu ai. Shi htingbu jan a nta lam de n yawng ai, hkra maga na numshe de yin rai mare htumpa kaw nga ai Ju Zi ni a nta de sa wa nu ai. Ju Zi ni a nta mung kagam nta rai nga ai, chyinghka lam shang wa ai kaw na tsaw tsaw rap rap re nta du nkra wut kagam rai nga ai, yu yang tingting hkanghkang alum ala re dinghku raitim, madu jan masha ni kaw hprawng nang mat nga ai. Madu jan hprawng nang mat wa ai la dai gaw dum nta galaw chye ai ta hpaji masha re hta n-ga, ninghtawn rung chyare wa a ganau naw rai nga nu ai. Kin Bau Ju Zi ni a nta makau hkawm du wa ai shaloi, mare na gwi wau bang wa sai, wut kagam hte galaw galup da ai chyinghka lam kaw du ai hte, gwi wau nsen mung hkring mat sai. Chyinghka lam hku kawn Kin Bau nhku gata de wan naw tu ai hpe mu nga nu ai, Ju Zi rai n yup mat nga ai. Hpawtde manap shat sha la rai, wa sat Li hte gat lawk du wa kaw sa wa nhtawm, du wa hte hkrum la ai htawm gaw mawdaw dung rai balik dap de sa wa ra nga ai. Matut nna hkap rawng tawn, mara jaw, hkyukhtawng rawng mat wa ai kawn gaw aloi sha nta n lu pru wa sai.

Shing rai, Ju Zi htawng rawng al laman lang ra ai rai hpe shana e lajang da ra nga u ai. Kin Bau yat yat sha chyinghka lahkawng masum lang akawk dat nu ai. Chyinghka gaw yu hpun hte galaw ai majaw, ta latsang hte akawk dat yang nlung kaw akawk hkra ai zawn nga nga ai, kawk kawk nga ngoi ai nsen ni lungding kasha zawn mare gat lam nta sharem ngaugum gata hkan pyen hkawm mat wa sai. Rai yang, Ju Zi a nhku de shamu shamawt sharat ai n na nga ai, mare de na gwi wau ai nsen chyawm hpungtang hte sham nga taw nga ai. Kin Bau loi shaja nna bai akawk dat sanu al. Kadai re? Ngai re, Kin Bau law, ahpu Ju Zi. Kin Bau yi, hpa mu ra a? Ju Zi nhku kawn pru wa nhtawm chyinghka lam makau na wan dat shawng sa gang shachyi dat rai nna she chyinghka kaba lahkawng hpe hpawng di sa gang hpaw dat nu ai. Chyinghka hpawng rai hpaw ai hte Kin Bau gaw Ju Zi a man kaw hpuk rai naw hpuba nga sai. Ju Li kajawng ai ja hpang de lahkam mi she htingnut wat wa hkra rai, Kin Bau, hpa galaw ai ga re? Nang dai hpa rai ai ga re? Nga san kajawng nga sai. Kin Bau gaw, ahpu Ju Zi e, gat lawk du wa ai matu nang ngai hpe htawng sa malai rawng shangun rit, nang gaw kaning nga tim galang mi num la nna, dinghku shang sha yu sai, ngai Kin Bau gaw sumshi ning lau du wa tim, la tai ai a namta machyim pyi rai n chye nga nngai le e. Nang ngai hpe htawng sa rawng shangun jang, du wa ngai hpe nta dinghku de hpa mayak lam nga a ni nga san ai shaloi, nang a num jan hte ma hpe sa woi wa ya rit ngu shawng tsun na nngai, i mai a? Ngu hpyi shawn nga u ai. Ju Zi gaw ga lahkun mi mung n shaga ai wanpu gata na Kin Bau hpeazi yu taw nga nu ai.

Kin Bau gaw ahpu Ju Zi ngai nang hpe hpyi nyem ai yaw nga let Ju Li hpang de yawng nna galang bai naw dat sai. Ngai nang hpe sa shangun jang, nang teng sha du wa a man kaw ngai a matu ga tsun ya na kun? Nga Ju Zi gaw Kin Bau hpe san jahkrup nga ai. Kin Bau gaw, ngai lama nang a mayak mahkak lam shawng n tsun shapraw ai, du wa hpe nang a num jan hte ma hpe n sa woi wa shangun sayang gaw, ngai Kin Bau gaw nang Ju Zi a shu mashi rai u ga, nga hkra dagam bang wa sai. Dai shaloi Ju Zi gaw Kin Bau hpe nang rawt wa nu ngu tsun u ai. Kin Bau masum lang Ju Zi hpe naw la nna she rawt wa sanu al. Shatin shapun rai lana mi lai mat wa sai. Sawmrawm manap na htingra jan lagaw gaw shagawng lapran hkan na hkauhting hkauna, bumlang marawn, hpun maling, mare ninghtawn gahtawng ni hpe ja hka lwi ai zawn re ningja gata kaw gabrin gala rai hkra htawng jahtoi da nga ai. Wu-kya mare ni ndai zawn re htingra manap e dum wa ai shaloi, kadai mung Kin Bau ni a nta kaw gabu hpa mu pru ai hpe chye da ai hkrai rai nga masai, Kin Bau gat lawk du wa a matu htawng sa malai rawng ya na sha rai sai. Lang ra ai hpun nba hte buhpun palawng ni hpe atsawm sha gahtap shabawn shajup da nhtawm, lu sha ni hpe mung nhpye kaw hkyem lajang bang da sai. Kin Bau gat lawk du wa a chyeju madu tai na sha rai sai. Kin Bau shagyi hpa shawn hka-wan mi lu la, bapa pye mi hte hkranghkri gachyi mi hta sha la rai, hpun nba shabawn hta hpai rai pru wa yang, chyinghka lam shinggan de mare na masha ni sumpum sumpam tsap nga la ai hpe sa mu nu ai. Li Hkyin, Gawng Yawt, Ju Zi, htingbu nta na garat jan hte shi a kaning jan mung lawm nga ai. Mana shanhte Kin Bau a mayaw htinggaw de na matu num mung gan shagrin ya kau manu ai, num dai gaw Kin Bau hpe nang htawng laning mi rawng rawng, lahkawng ning mi rawng rawng, ngai myit dinghpring let la nga na ngu mahtai jaw nu ai. Shing rai, grai jau nna shi mung kaning jan hte rau Kin Bau hpe hkan sa dat nga ai, mare na ni gaw num dai Kin Bau a num jan rai sai hpe kadai n chye nga ma ai, shi hpe mung masha garu ai hkan yu chyai hkawm ai masha she shadu nga ma ai. Kawa gaw Kin Bau a hpang kaw ma ni shinggan de mu kaba mi sa galaw hkrat wa hkyem ai shaloi na zawn grai gabu rai dum ai myiman nsam hte hkan nang nga ai, Kin Bau a kawa dai hpawt gaw shawoi hpai lu hkawm hkawm re hka-tu hpe nta kaw tawn kau da nna, n-gup kAW salit shachyi makrang da rai, lu gaw n lu ai majoi sha man hkan malut nhkut alun di shamawng tawn masu nga u ai. Kanu ta kaw lu sha makai hta lang rai pru wa ai hte htingbu jan a kaning jan hpe mu mada dat ai hte mani sha saisai rai hkawm hkrat wa nu ai. Kanu htingbu jan a kaning hte hpa tsun ai hpe Kin Bau n na tim, ga lahkun lahkawng mi dang shaga hkat ai hpe mu dat nu ai, htingbu jan a kaning dai gaw kanu a ta kaw na lu sha makai hkap la hpai kau ya nna, mahkrai lai hkyem ai shaloi na zawn rai kanu hpe bai dun let hkawm nang nga masai.

Kin Bau hpe hkan sa ai masha wuhpung kaw num dai gaw yinam ladaw na bum marawn hta pu hpaw nga ai nampan zawn rai nga ai, shi gaw gat lawk kaw nga kaba wa ai sha n rai , nta hte gat lawk rung shakum langai sha din ai majaw, gaji ai ten shat hka- wan hpai sha let rung wang gata de hkrai shang chyai ai hta n-ga, shi a kaning jan hte shan gaw mu ai law, bu hpun ai, tsun shaga ai, lai kyang ni Wu- kya marawn na ni hte shai taw nga ai, shing rai, shi Kin Bau a kanu a ta kaw dun taw nga al hpe mu ai hte shawa masha ni chye yu shapraw nha, grai nan yu manawn ai zawn rai nga ma ai. Chyinghka lam shinggan hkan na masha ni nnan e marai shi jan sha re ngu ai wa, Kin Bau hkannu wa ni pru wa nna masha dai ni hte gan shaga ai lapran masha gaw wunawng mi bai rai nga la sai. Mu galaw mat wa sai ni du hkra, Kin Bau gat lawk du wa a matu htawng rawng malai mat wa na re nga na lu ai hte bai nhtang gayin wa hkra rai hkan shaga sa dat nga ma ai. Kin Bau e, nang chyawm mu kaja galaw mat wa lu sai, hpang de ngai ninghpu wa hpe hkum malap kau lu e nga hkan shaga ai na dat jang, Kin Bau gaw mana sha gan chye la ai htingbu jan a kaning hpe yu nlaw taw nga ai myisha hpe dawm la kau let, hpa mu kaja tam rai na law, masha ni a matu htawng she sa rawng ya yang me ngu htan dat nu ai. Kadai a matu zawn wa nawn a ni? Gat lawk du wa a malai rai nga ai le, nang gaw gat lawk du wa a chyeju madu nan re mu, e ngai ninghpu wa hpe hpa n chye na hkum shadu, nang a shawng lam ya kawn dam lada mat wa hkyem nga sai law nga bai tsun shagrau dat ai mung nga nga ai.

Kin Bau mani sumsum sha rai nga u ai. Kin Bau shi hpe hkan sa ai masha wunawng hpung ni kaw gaungwi sha hkan hkawm nang nga sai. Shawng de mung masha, hpang de mung masha hkrai rai nga ai, hkawm ai sat lagaw hte ga shaga mani garu ai nsen ni gaw htingra nbung e gawut jahkrat dat ai namlaw namlap ni zawn nga hkra shara nga ai. Kawa shi a hpang kaw hkan hkawm nang nga ai, kadai kun shi a ta na rai shabawn hkan la hpai ya hkyem ai shaloi, Kin Bau n-gup hta gaw n ra ai n ra ai nga tim, rai shabawn manat nga ai ta hpe hpyan kau dat let, labu sumbu na salik htuk mi shaw mahti baw la nna, salik hpe langai hte langai e gam ya nga nu ai, manang ni n ra sai n ra sai nga tim, masha ni a n-gup kaw du hkra hkan shanawng bang ya nga nu ai. Kin Bai gaw Ju Zi kaw grai ni hkrat wa mayu ai re, shingdu aman masha hkrai chyat ai hta n-ga, ndai mung nang hte ga shaga, wawra mung nang hte ga shaga mayu rai, tsan tsan kawn sha Ju Li hte ta dingsi hkat du ganga let chyeju dum myiman madun u ai. Ju Zi, Li Hkyin, Gawng Yawt ni mana sha shi hte gashun gashe rai myit n pyaw hkat yu ai zawn mung n rai ai, hpa mi n ra ai zawn rai masha wunawng kaw hkan tsap nang let shi hpe hkan sa dat nga ma ai. Gahtawng kaw gade ning rai tim ndai zawn gabu gara hte masha hkan sa ai lam n nga yu sai, galang numrang kadai nta na ma hpyen shang sa wa ai shaloi rai tim pyi ndai daram masha law malaw rai n hkan sa yu nga ai.

Maten daini Kin Bau gat lawk du wa a hkyukhtawng sa rawng malai ya hkyem ai shani chyawm mare ting ngu na hkan sa ai majaw, myiman pa ai sha n rai, arawng mung grai lu dum nga nu ai. Shing rai Kin Bau myit ngwi myit pyaw hte hkawm nga nu ai, shat sha dabang kaw du ai shaloi, Kin Bau gaw yawng hpe nhtang wa manu, n hkan sa ra sai, ngai gaw htawng sa rawng ai she re, hpyen shang sa wa ai mung n rai ngu tsun tim, mare masha ni shi tsun ai ga hpe kadai mung n madat ya ai dingyang hkan hkawm nang nga sai. Mare masha ni yawng Kin Bau kaw hkan gumbawm nang let wa sat Li a nta de lung wa nga ma al. Manap jan mai gara nga ai marawn kawng hta wa sat Li Sin gaw masha wunawng hpung maga de man yawng let ta dingsi nga u ai. Shi ta dingsi dat ai hte Kin Bau a sat mung ahkat amat rai chyang bang wa sai, Kin Bau chyang magang Li Sin ta grau lawan nna dingsi nga ai hta n-ga, ta lahkawng hpe n-gup kaw htawng mahka zawn lagra tawn in hpa kun jahtau tsun nga ai, tsan nna hpa tsun ai hpe atsawm n na lu ai majaw, shawa masha ni gaw Kin Bau hpe lawan u ngu ai shadu nga ai. Kin Bau gaw wa sat Li Sin hpe marawn kaw grai na hkra n wam la tsap nga shangun ai myit rawng nna, rai shabawn hpai let gagat lung wa nu ai. Masha wunawng hpe tawn da kau nhtawm marawn de gagat lung wa ai shaloi, Li Sin a makau na wa sat garum shangun ai la sha langai marawn kawn gagat yu wa ra ai. Langai gaw gagat lung wa, langai gaw gagat yu wa rai, marai lahkawng hkrum hkyem ai hte la sha dai lam makau na lungbyen ntsa kaw tsap let, Kin Bau, ningwa di Li Sin da nga yang nang hpe hkum lung wa sa da, gat lawk du wa danpawt jaujau gat kawn ga htet dat al, shi a matu mara n sa malai hkam ya ra sai da, nga marawn tsun dan nga u ai.

Kin Bau a sat loi lanyan mat sai, wandat shadaw zawn lam gaang kaw tsap nan nga nna, la kasha dal hpe yu let marawn san dat sai, hpa daw aw? garai e, nang hpa tsun ai re? Nga na mau taw nga nu ai. Nang n sa ra sai da law, nga la kasha dai aja wa bai marawn tsun dat sai, du wa adawt sat kau ai masha dai ni a nta na kanu kawa ni ga grai shaga pyaw al nta ni re nga, du wa hpe n shara ai hta n-ga, du wa hpe mung n sa shawk ai sha n rai, hpa gumhpraw mung n wa ra ai da, si mat sai wa a ganau hpe gat lawk du wa kasha sha yin la ya jang rai sai da. Ya chyawm, la sha dai tsun ai ga hpe Kin Bau asan atsawm sha chye madat na la nu ai. Lam gaang kaw tsap nga ai Kin Bau a lahkap gaw akya wat wat nga kya wa nna, akajawng sha galau agrawp mat wa na hpe tsang ai majaw, hkum ting na n-gun hpe labawp kaw da-ting shaja da let, marawn de mada dat yu yang, wa sat Li Sin masha kau mi hpe mana sat ai wa shan dai hpe mawdaw langai kaw hpai bang shangun na matu, Kin Bau hpang de shingdu yawn rai ta hte mawng, gahpa ladu hte shawn rai hparan kyin nga ai, n-gun rawng la na zawn re Li Sin a jawmrawm gahpa gaw chyinghka lam hkumpyen zawn dam ai hpe sha mu mada nga nu ai. Kin Bau hpe hkan sa ai mare na masha wunawng ni hkan dep nang ra ai, tsap hpawng jawng nga ai masha dai ni hpe tsan tsan kaw yu dat yang, mawdaw kaba langai hpe marai mi e marawn hpatwat kaw wa garawt tawn da ai zawn rai nga ai. Kin Bau gaw wa sat Li Sin shing nrai shi shangun dat ai la kasha dai hpe mi shan tsun ai ga hpe mare masha ni hpe galang mi bai dung kawn npawt hkren asan sha tsun dan shangun mayu ai majaw, abwi sha rai marawn de bai hkawm lung wa nu ai. Ahkye asan re ninghkawng ja jan loi bai tsaw wa sai.

Gale ai: Bawk Tawng