HTAWNG BAU SHUPSHENG DUM HPANG WA AI LABAU

HTAWNG BAU SHUPSHENG DUM HPANG WA AI LABAU

LA SAN

Moi Chyanun yan Woishun kasha Ninggawn wa Magam hpe matsun da ai lam gaw htawm hpang prat hta mungkan ga nga nna chying wa ai shani, htawng bau shup sheng ngu ai nga na re nga nna matsun da sai. Ngai sha Ninggawn Magam e ngai ningwa a yu hkraw hpe yu nna Chying gap mu, htawng gaw, ngai ningwa a mayat shadaw hpe yu nna htawng daw mu. Shup sheng bau ni gaw ningnu a mayat chyinghka lam hte madoi chyu hkawng hpe yu nna bau ju shup sheng dup mu, bau a nsen gaw shingbai koi yeng ni a mahku hpe la nna bau dum mu, ngu matsun da sai, dai hpang kaw nna gaw Chyunun madat ga hte raw, Woi shun madat ga hte chyaw rai htawng bau shup sheng ni, daini du hkra grin nga ai re. Shadang la sha ni a mayat shadaw hkrang gaw htawng. Shayi numsha ni a mayat chyinghka lam hte madoi chyu hkawng a hkrang gaw bau hte shup sheng ni rai nga ai.

Ndai htawng bau shup sheng ni a kumla gaw shinggyim masha a hkrang hku nna galaw shagrin da ai rai nga mali ai. Matut nna htawngka ka hpang wa ai labau hpe bai tsun hkai yu ga. Moi, Ka-ang La Ntu gaw asak kaba ram wa ai ten hta Shingra Htu Bu hpe la wu ai. Shan a kasha ni gaw Ji nat jaw jau ai shara kaw na Nga a shabawng hte Wa a shabawng hpe la wa nna gawut shabawng la rai, lagaw hte htawng chyai nga yang, dai shabawng hpe htawng baw kau manu ai da, dai hpang kawa ndum hpe htawng a hkrang hku magap la rai nna dum chyai ka chyai ma ai da, rai yang, manau manau ai mung nrai mang makoi si poi mung nrai, shanhte ma ni hkrai dum shinggrup ka shinggrup chyai nga ai hpe mying gaw shamying ra sai nga nna, "Nta dingshawn htawng ka maka" ngu nna htawng ka ka hpang wa sai nga nna dep hkap ai ji wa ni tsun matsun dan da ma ai.

Lahta na htawng bau shup sheng a labau hpe gaw share hkum sumdu labau sawk ka shinggyin ai shaloi, shara shagu na htunghking labau chyechyang ai myit su Salang law malaw ni hte hkrum nna ka shinggyin da ai re. Dai ten hta, hka hku ga shara law malaw hkan share hkum sumdu a labau hte amyu labau hte seng nna hkan sawk sagawn lai wa sai. Ra rawng ai lam law malaw naw nga na re, shada hpaji jaw madi shadaw la hkat na hpe mung myit mada dat ungai law. Wunpawng sha ni a htawng bau shup sheng labau tut e grin nga u ga!

Tsun htai sang lang dan ai dumsa jai wa hkring wa kaba salang Labang Nahkang Gam(Mali nmai wa lawng, Hkahku ga Share machyang buga kaw shangai daidaw ai rai nna ya nga ai Myitkyina, Shatapru, lawk 1)