WUNPAWNG MUNGDAN SHANGLAWT HPUNG

KIO mying shingteng byin pru dan dawng wa ai (57) ning rai nga sai. Shinggyim masha amyu hpan law law nga pra shajang ai hta amyu hpan kau mi lam shagu hta rawt jat galu kaba lam tsun shadawn n lu hkra hkikhkam sut su ningngai nga ma ai zawn amyu hpan kau mi lam shagu hta hpang hkrat kaji kadun matsan jam jau ai hte kaga amyu ni e dip up sha hkrum ai ni ngu nga shajang ai mungkan rai nga ai.

Rawt jat galu kaba ai hkikhkam ai shinggyim masha ni hpa majaw kaga masha ni hta jan nna hkikhkam galu kaba shajang nga ma ai kun? Npawt nhpang tam sagawn alun yu ai shaloi “amyu sha mungmasa bungli” hpe shawng myi hpaw galaw chye ai mahtai gaw madung rai nga ai.

Prat hpang hkrat kaji kadun ai amyu ni a mahtai mung amyu sha mungmasa lam hpe n mu mada n chye galaw gyip gyeng ai shingwang kaji hku hkrai nga pra hkrat wa ai majaw kaga amyu ni e dip up da hkrum ai lam ni rai nga ai.

Sumpawng yawng (shapawng yawng) amyu mying lu hkrat wa ai B.C prat maga na rai wa na sai. Prat ladaw kau mi hta gyip gyeng ai wuhpung wuhpawng hku hkrai utsut tsut nna nga pra shalai lahpawt kau ai prat ladaw ni rai na sai.

Ningbaw, du magam ngu buga, kahtawng ningchyawng ninghtawn ningngat shadip jahpang lamu ga madu magam uphkang nga pra wa lu ai prat madang du sai shaloi gumchying gumsa du magam ni lamu ga law law hpe madu magam uphkang jum hpajang da lu ai gaw gumchying gumsa du magam lamu “ga” 1000 ( hkying lam) hku nna hpaw maden da lu sai.

Raitim gumchying gumsa du magam lamu “ga” 10 (shi) daram hpe hpaw shabawn nna n-gun rawng kahkyin gumdin sharing da lu ai mungdan kaji hku sha pyi nlu galaw da ai lam gaw gumchying gumsa du magam lailen hte mungdan ngu ai hpe n lu gaw gap ai lam rai nga sai.

Gumchying gumsa du magam ni tinggyeng akyu ara kaji hku hkrai mu jasat la, hkan sa wa ai gaw amyu sha shada ginhka ginrang, lachyen lahka, manawn masham myit jasat a majaw amyu sha myit hkrum lam hpe dingbai dingna lagaw gang ai lai len gaw kata na jebat hpyen tai ai lam grai sawng nga ai prat byin wa sai.

Amyu baw sang mying, dinghku ru (or) roi sai law law shamying ginhka nna nga pra nga ai amyu sha ni hpe myitmang jahkrum kahkyin gumdin ai hte amyu hpe rawt jat galu kaba wa na lam pat da nga ai htunghking lailen hpe dawm kabai kau nna tawt lai dip up sha nga ai Myen amyu kaba a lata na lawt lu na matu KIO mungmasa hpung hpe 1960 ning October (25) ya hta hpaw shabawn nna rawt malan ai hpung hpaw dat sai.

KIO gaw wunpawng amyu hte mungdan sha ni yawng hpe myit jasu sharawt kahkyin gumdin, lam woi ningbaw ai, akyu ara gun hpai ai, gawng malai tai ai, rawt malan ai hpung rai nga ai.

Mungmasa bungli gaw grai ahkyak nna hprai kau yit kau n mai ai bungli kaba mung rai nga ai. Raitim mungmasa bungli hpe madi madun n lu ai myi hte n mu lu ai, masawp jum hkra n lu ai bungli mung rai nga ai. Kadai ni, gara hku, kaning di, galaw ai baw rai ta? ngu ai hpe gaw amyu sha, mungdan sha shagu shanglawm ai hte myit marai hta gawgap da nna galaw ra ai ta tut magam bungli ni hpe myit su myitrawt, kangka sadi dung ai hte jawm gun hpai shakut shaja ai bungli rai nga ai.

Hkikhkam galu kaba nga sai amyu mungdan ni a mungmasa hpung ni shaning tsa lam hkying lam grin nga, shakut nga ma ai zawn Wunpawng amyu hte mungdan sha ni mung KIO a mungmasa hpung hpe n hkring n sa, n hki n ba mat ai matut shakut sa wa na hpe n’gun jaw shatsam dat nngai

Loi Jau Lang Ji