MYANMAR ASUYA NI MUNGDAN SHA AMYU LAKUNG NI HPE SHAMAT KAU NA LADAT

ကချင်လူမျိုးများ။

Myenmar asuya, Hpaji Dap kaw nna ka bang da ai mabyin lawnglam hte seng nna, Mungchying mungshawa, Wunpawng amyu lakung yawng de ngai na ningmu hpe tang madun dat nngai.

Myen asuya jawng ni hta sharin lang na matu, ka shalat shapraw da ai tsang (7) (G-7) na လူမှုရေးပထဝီဝင် (Social Geography) ngu ai malawm (Lesson) kata Wunpawng amyu lakung ni a mying ningsang hpe lawu na hte maren ka bang da ai hpe mu lu ai.

ကချင်၊ တဂုံ၊ ဒလောင်၊ ဂျိန်းဖေါ၊ ဂေါ်ရီ၊ ခကူး၊ ဒုရင်း၊ မရှု (လောဂီ)၊ ရဝမ်၊ လရှီ (လာချစ်)၊ အကီး၊ လီဆူး၊ ngu nna ka bang da ai hpe mu lu ai.

ကချင် ngu ai hpe amyu lakung langai mi hku sawn bang da ai. Anhte kaw nna gaw, Wunpawng amyu lakung yawng ginhpawm ai hpe ကချင် ngu ai rai nga ai. တဂုံ၊ ဒလောင်၊ ဒုရင်း၊ ngu ai mying gaw na pyi n na yu ai mying rai nga ai. Ndai mying ni hpe amyu lakung hku jat bang da ya ai lam nga ai. Bai nna, Gauri, Minji minla, Tarung, hkahku ngu ai gaw ginra, buga hta hkan nna shamying lang wa ai re, Amyu lakung langai mi san san n re ai.

Ndai hta Maru (Lhaovo) hpe mung မရှု (လောဂီ) ngu shamying da ya ai. Myen hku လောဂီ ngu ai lachyum gaw “dinghta ga masha” ngu ai rai nga ai. Lachi (La chig) hpe mung လရှီ (လာချစ်) ngu nsen shapraw da ya ai. Azi (Zaiwa) hpe အကီး ngu ka da ya ai. Wunpawng amyu (7) sha re ai hpe lakung (12) ngu masat da ya ai.

Daini ndai zawn re kumla ni hpe mu ai majaw, tang madun mayu ai gaw, Myen ni kaw nna Myen mung kata na amyu lakung mying shamying ai hta ga nsen n shapraw chye nna, Wunpawng ni a amyu lakung mying n chye nna, Wunpawng amyu lakung kade nga ai ngu ai hpe n chye nna ka da ai n re, ngu ai hpe kam kam hte tsun mayu ai. Hpabaw rai nna n chye na lam n nga ai hpe lawu na lawng lam ni hpe madi madun mayu ai.

Chye ninglen e dasang jashut ka da ya ai re ngu mu lu ai. Anhte amyu hpe roi ai, yu kaji ai, amyu shamat ya na yaw sing ai masa re. Manya masu nga kaba kapung ai ga malai she rai nga ai. Hpa majaw nga yang;

Myen asuya magam gun salang ni, laika ka sara Wunpawng amyu lakung ni hpe galoi mung tsun shaga nga ai, hkrum katut hkat nga ai, moi Hkaw hkam prat daw chyen kaw nna matut mahkai nga lai wa sai. Democracy prat, Socialist prat, hpyen asuya prat, ကြံ့ခိုင်ရေး prat, ya NLD democracy prat ban hte ban mung, Wunpawng amyu lakung yawng hte hkau chyap kanawn mazum, tsun shaga nga ai re.

Munghpawm masat nhtoi (ပြည်ထောင်စုနေ့) poi hkan mung Myen mung kata nga ai amyu lakung yawng Yangon de sa du nna, zuphpawng ni galaw, ka manawt let hkrum zup hkat, tsun shaga hkat, lu sha jawm sha hkat rai nga ai re. Dai ten hkan amyu lakung yawng a mying ni hpe jaw hkra tsun shaga, ka lang lai wa sai re. Kaning rai ya grau na wa ai ten hta n chye tsun, n chye shamying wa ai ngu ai hpe n hkap la lu ai.

Daining 2020–2021 hpaji ladaw hta KIO jawng ni hta (Tinang a sharin matsun garai n lu ai laman) Myen hpaji dap MoE ni a new textbook (Laika buk ningnan) hpe ga sharin lang sa wa nga ai. Raitim lahta na tang madun ai (Shut ai, n teng n man ai) malawm (Lesson), lawng lam zawn re ai ni hpe lata shaw kau nhtawm, kaga htap htuk ai lawng lam ni hpe sharin sa wa na matu, jawng shagu de matsun da sai mung nga ai.

Dai majaw, Wunpawng amyusha lakung lama ni yawng, mu chye let, sharai la lu hkra shakut na hte ban hte ban shamying lang nga ai amyu mying ningsang ni hpe tut nawng agrin nga lu hkra makawp maga nga na hte, shamying lang sa wa ga ngu tang madun dat nngai rai.

La kap laika:

၂၀၂၀–၂၀၂၁ စာသင်နှစ်ထုတ်၊ သတ္တမတန်း ပထဝီဝင်စာအုပ်၊ အခန်း (၂) လူမှုရေးပထဝီဝင်၊ ၂.၃။ မြန်မာနိုင်ငံ၏ တိုင်းရင်းသားလူမျိုးများနှင့် ယဉ်ကျေးမှုဓလေ့ထုံးစံ၊ စာမျက်နှာ (၃၁)။

Umma Sau