JI GA MADU LIT

Wunpawng sha ni hta moi ji woi ji wa prat kaw nna Ji Ga saw Ji Ga sa ai htung nga mali ai. Buga ginra hta hkan nna Ji Ga htung laida loi li n bung hkat ai lam nga ai. Kaga maigan amyu ni hta mung nga na malu ai.

Ji ga saw ai shaloi masha hpe sha saw ai n rai. Bungli galaw ai shaloi hkala nba n hkrum na matu Gumgun gumhpai ni hpe du hkra saw shalawm ai re nga ma ai.

Ga; ngu ai hta shawa ga; ganawng ga; garum kahtau ga ngu nna mu lu ai. Shawa ga; ngu ai gaw mare numshang jaw jau ai, Hkristmas poi galaw ai, shawa hte seng ai Poi shingra lama ma galaw ai shaloi mare masha htinggaw langai ngai a shagu hkungga, arung arai jai lang ya ai majaw, dai jai lang kau ya ai a manu hte bung pre ai hku shawa n-gun hte bai sang kapa ya ai Ga hpan hpe tsun ma ai.

Ganawng ga; ngu ai gaw bungli galaw atsam madang bung ai amyu shadang shada, amyu shayi shada jahkrup bawng la nhtawm marai langai a magam bungli htawt galaw ai, Wuhpung hku rai yang shara mi de nawng nawng hpyawng hpyawng rai amu bungli jawm galaw ai ladat hpe tsun ma ai.

Garum kahtau ga gaw saw shaga n ra ai. Chyahkrai nmai, gaida gaina, chyahten lakawn ni hpe makau grupyin e jawm pawn ba ai, magam galaw garum ai hpe tsun ma ai.

Buga ginra hte ginra laida shai ai re majaw, Mali Nmai Walawng Ga na mare kahtawng langai mi kaw lang ai Ji Ga madu ni a lit hpe loi mi tsun na nngai.

Ga saw ai shani gaw, magam bungli hpe ningpawt de hpang ai wa, ningpawt tek jum ai wa, bungli dawdan lu ai wa gaw “Madu” re ai. Bungli awngdang na matu shinggan kaw nna sa garum shingtau ai ni gaw “Ga Masha” ni rai ma ai.

Bungli madu gaw Ga masha ni a bungli ningbaw mung rai sai. Madu lit, Ningbaw lit re ai hte maren Ga garai n saw ai shawng kaw nna tau hkyen shajin ai lam galaw ma ai.

Tinang galaw mayu ai magam bungli a shangwang, ja gumhpraw, malu masha, arung arai zawn re bungli ningpawt ninghpang ni hpe myit shajin da chye ma ai. Nga dumsu gyit na rai yang n-gun atsam rawng ai La wangan ni, Hpun kran kawa wahpang bu na rai yang ladat chye ai kawa la ni; si lahpaw la na rai yang amyu shayi kanu num ni hpe jau jau kaw nna Ga saw na re ai lam shawng tsun jahkawn da da rai ma ai.

Chyaru tsa mu ai, Kung ai shajin da ai, shatmai shatmaw jum shan tam mahkawng da ai, Nhtu ningwa, Santeng shanghkawp, Lagun, Dinghkawng, Sumting ni yawng hkum hkum, ra kadawn ai mi n nga hkra tam jahkum da ai.

Madu ni gaw bungli yi ngam galaw de hpang da ma ai. Nta htingra htu hpang da ai, hpun kawa ngau shaw hpang da ai shangu shingbwi gun ga saw na rai yang shangu shabawn da ai, Tsing magang yi ngam hpang da ai, mam ting yang yi wa grup (wa yin) mam ting hpang da ai, Dum nta galaw na rai yang nta sing, shadaw nhkun ni htu shajin da ai lam galaw ma ai.

Ga masha ni bungli galaw pyaw hkra, Bungli madu ni gaw, lata tut hta mung, n-gup aga hte mung zinlum, sinlaw nna magam bungli woi galaw chye ma ai. Hkau ni hkri ni ndai bungli shawng jawm shakre kau ga. Grai pu ba na sai, aten loi naw shakut garum marit, nanhte mananng ni garum la nna sha ndai daram galaw shangut la lu ai. Annu wa ni hkrai galaw yang gaw kade na hkra she galaw ra na, Kansi na sai, Hpanggara na sai lu ga, sha ga, gan hkringsa la ga, jahta mung jahta galaw mung galaw, Grai kabu sai, ngu tinang madu ni nan azet atsang, setlasau, larau ladau rai nna Ga masha ni hpe lagawn myit n rawng hkra woi awn la ma ai.

Madu ni hpa mung tau nau shajin da ai lam n nga, bungli yi ngam hpang da ai lam mung n nga, bungli woi sinlaw galaw ai lam mung n nga jang gaw tinang a bungli gaw n ngut, n awngdang, malu masha gaw bebe shaga daw jaw kau nna madu mahtang nhtang hku sum nga ai. “Madu lagawn yang Ga yup ai, madu yup yang Ga si ai” da. Lam shagu hta Ningbaw greng yang she, hpang hkan ni mung greng na re ai.

Kumshan