GA TSUN GA LA LAM

“Hkrap ga mung la ra, Mani ga mung la ra.”
“Sha ga mung la ra, Galaw ga mung la ra.”

Manang kaga ni kaw tinang a atsam arang bang da ai gaw Ga La ai rai nna, Manang wa a atsam arang bai htang ya ai gaw Ga Tsun ai lam rai nga ai.

HKRAP GA LA AI.

Yawn hkyen ai aten yawn lawm ai, Hkrap ai, lu hpa sha hpa lang na arung arai ni shaw garum ai, magam bungli bungsi shang galaw ya ai. Machyi makaw ai aten gawan katsan galaw ai, sin nna gawn lajang ai, tsi mawan ja gumhpraw hte madi shadaw ai, shalan shabran n-gun jaw ga tsun shaga ai lam ni gaw hkrap ga la ai lam rai nga ai.

MANI GA LA AI.

Kabu gara ai aten hta sa du kabu shakawn ai. Num wawn num la ai shaloi hpuja hpaga shaw garum ai, nta htingshawn htingwawn poi lamang hkan kabu shaman ga tsun ya ai. Ashu ashan lu gap yu nga hkwi lu wa ai shaloi hpya la hpai la, atawk ahkak shadu kachyawng ya ai, htawm hpang de grau lu wa u ga ngu shaman ai, byin ai ram ai ndai daram kagat chyang ai hpe nang rai nna she gap hkra ai, Nrung dai daram galu ai hpe nang rai nna she n hkrit ai, ngu tsun shakawn ai. Shakau shanam jum majap chyaru tsa shaw nna kabu bawp ya ai.

Manang wa kashu kasha shangai shaprat daidaw ai shaloi, ma hte seng ai tsi mawan bu hpun nba malu masha ni kumhpa jaw ai. Ma kanu a matu n-gun rawng n-gun bai ai baw malu masha tsi mawan ni garum shingtau la ai.

Hpaga yumga sa, Ja lungseng awng ai shaloi htawm e hpang e grau grau awngdang wa na lam ni shaman shakawn hkamhkaw ga tsun ya ai.

Manaw manang wa/jan arawng aya tsaw jat, rawt jat wa ai shaloi grau grau galu kaba wa nna mung up du salang byin wa u ga, makyin jinghku jingyu kashu kahkri yawng hpe kawm lawm lu u ga, amyu mungdan ting a makam hpunnu rai wa u ga ngu shakawn hkri-awn ya ai lam ni gaw Mani Ga La ai lam rai nga ai.

SHA GA LA AI.

N law nla re ai malu masha sha mi raitim manaw manang hte rau jawm lu jawm sha yang she namchyim grau nga ai.

Anhte Wunpawng sha ni kadai raitim, tinang a nta kaw poi rung shing ra lama ma galaw ai shaloi lu sha ni daw sha chye ga ai. Poi langai mi pyaw ai n pyaw ai mung malu masha ningpawt rai nga ai. Poi sa lawm ai kaw na bai wa ai ni hpe poi n sa ai ni san yang “Hpa baw daw sha ma ta” nga nna shawng san chye ga ai.

Masha nkau mi poi sa timung kumhpa sha shaw jaw da nna lusha n sha ai wa mat chye ma ai. Saw shaga ai ni gaw masha kade saw shaga da ai tawt sawn nna malu masha hkyen ai. Lusha n sha nna wa mat ai law jang hkyen da ai lusha ni jan mat sai. Garum kumhpa shaw da ai zawn raitim maga mi de malu masha shagram kau ya ai majaw garum ai n tai mat sai. Sha ga n la ai lam rai mat ai.

Manang wa mung tinang a nta kaw “N sha Ai Ga” bai tsun na rai nga ai. Dai shaloi tinang hkyen da ai malu masha ni kalang bai sum mat na re ai.

Bai lam mi gaw tinang shawoi nau n lu sha ai ashu ashan shatmai lama ma lu yang htingbu manang ni hpe shatmai matep jaw ai (Htingbu dawn ai) lam mung shatmai matep Ga La da ai rai nga ai. Tinang maga hku htingbu dawn da ai re majaw Htingbu wa mung shi lu wa ai shaloi tinang hpe shatmai matep bai jaw (Htingbu dawn) na ra ai. Ndai gaw sha hpa Ga Tsun ai lam rai nga ai.

Masha nkau mi si moi mang taw ai shani na, mana lusha sha yang gyi ningma ni hpun wa ai, Ana ahkya ni grau sawng wa ai ngu hkam la ni nga ai. Jaw ai mi rai rai, shut ai mi rai rai hkamja lam a majaw n lu n sha ai wa hpe gaw n lu n sha Ga Tsun na matu n htap htuk nga ai. Shada chye na hkat na ahkyak nga ai.

Manaw manang wa jaw sha ai malu masha hpe grai mu ai grai htuk ai ngu shakawn nna sha ya ai lam mung lusha shakawn Ga La ai lam rai nga ai. Jaw lu jaw sha ai wa mung myit dik ai.

GALAW GA LA AI.

“Shawa lata gaw brawng” ngu ai ga nga ai. Tinang langai sha aten na na galaw ra ai amu hpe shawa n-gun hte rai yang jahkring mi sha hte galaw ngut kau lu nga ai.

Dai majaw manaw manang htingbu htingpyen hpe ga saw nna bungli jawm galaw chye ga ai.

Ga La/Ga Tsun ai hta; jasat jasa loi loi shai ai hpe mu lu ai.

- Htinggaw nta masha nawng (yawng) Ga La/ Ga Tsun ai.

- Masha hti hkum hte Ga La/ Ga Tsun ai.

- Magam bungli n ngut dingsa jawm galaw nna Ga La/ Ga Tsun galaw ai.

- La Wangan Ga, Amyu shayi num Ga, Ma kaji ramma Ga La/ Ga Tsun ai.

Htinggaw nta masha nawng ga la ai ngu ai hta, masha marai mali nga ai ni, marai kru nga ai htinggaw nta de yawng sa jang htinggaw nawng ga la ai rai sai. Ga bai tsun ai shaloi nta masha marai manga (snr) marai kru ni yawng nawng bai Ga Tsun sa ra ai.

Magam bungli n ngut dingsa jawm galaw ga la ai lam hta; Manang wa a hpun kran, Yi wa gap ai bungli shawng ngut hkra jawm galaw nna tinang a magam bungli bai ngut kre hkra jawm galaw ai lam rai nga ai.

Manaw manang ni Ga saw ai shaloi tinang gaw loi ai hpa ai amu sha lata galaw ai rai yang tinang ga saw ai shaloi manaw manang ni mung loi ai bungli ga bai tsun na rai nga ai. Ga shadawn-Gara nta de Ga sa timung pali sha sa shit dung nga yang, tinang Ga saw ai shaloi mare shawa ni yawng Pali jawm shit dung nga nna Ga bai tsun na rai nga ai. Tinang jawm galaw mayu ai amu gaw nta shangu galup ai, ngau hpai shakum kum ai raitim shara shagu Ga la da ai gaw Pali shit ga sha re majaw shawa e Pali shit Ga bai tsun ai lam rai nga ai tinang bungli n awng dang mat sai.

Kaja ai amu magam bungli, kaja ai arawn alai, kaja ai myit masa hte Ga Tsun/ Ga La nna rawt galu kaba wa na mai nga ai law.

Kumshan