JINGHPAW GA SI GA NGAU (Shachyaw Daw (6))

Ngai tsawra ai, nye a “Jinghpaw ga si ga ngau” hpe hkap hti nga ai laika hti shawa masha ni hpang de (Daw Shachyaw - 7) hta kalang bai Jinghpaw ga si ga ngau, ga hkaw ka bang mara dat nngai.

1. GABAWK GANAI

Ndai “Gabawk Ganai” ngu ai ga si gaw, masha langai hte langai, Wuhpung langai hte langai bungli lama ma jahkrup jahkrum sa wa ai shaloi, lahkawng maga na masha ni krawdung shawang tsawra myit tawn let adan apra, n dut n dang, wanglu wanglang hkut hkut nai nai tsun jahta bawngban jahkrup ai hpe tsun da ai re lam chye lu ai.

2. GAWAW GAWAN

Ndai “Gawaw Gawan” ngu ai ga si gaw, ngam da ai lam n nga hkra, ra rawng ai lam n nga hkra, yawng hkap la hkra, lahkawng maga sum machyi hkrum ai lam n nga hkra, jahta jahkrup tsun shaga ai hpe ngu ai re lam chye lu ai.

3. GINDAI (TI)

Ndai “Gindai (Ti) ngu ai gaw, namsi namsaw gindai (ti) hpe tsun ai. “Gindai” ngu ai labau kaba, maumwi mausa kaba, Amyu bawsang ni prat pra hpan ai shara ginra zawn re ai hpe mung shamying da ai lam chye lu ai.

4. GA RAWNG AI

Ndai “Ga Rawng Ai” ngu ai ga si lachyum gaw, manang langai ngai hte masha langai ngai, amyu rusai langai ngai a lapran kaga Du Salang ni dung nna tsun shanyem masit htingram jahpra kau ra ai manghkang / mangut lama ma nga ai hpe tsun da ai re lam chye lu ai.

5. GA AP AI

Ndai “Ga Ap Ai” ngu ai ga si, ga hkaw lachyum gaw, Asuya wuhpung wuhpawng ni rai rai, amyu rusai lam kaw mi rai rai, ndai bungli hpe nang lit la woi awn ya rit, madu tai ya rit, kanu kawa tai ya rit. Asuya bungli hta raitim, dai hte maren lit jaw shatsam ai lachyum re. Ga ap lit jaw shatsam da ai bungli n mai byin mat ai majaw “Ga n htang ap ai” lachyum mung re ai lam chye lu ai.

6. GA SAT AI.

Ndai “Ga Sat Ai” ngu ai ga si gaw, mayu dama, mayu shayi lam hta rai yang, num la na matu, mayu kasha shayi sha langai ngai hpe la na matu “ga sat ai” n-gup aga hte shawng ga san jahkrup yu ai hpe ngu ai.

Mungdan langai hte langai, hpaga yumga Co.Ltd langai hte langai, tinang dut jaw, dut bang mayu ai arung arai lama ma nga ai majaw gat lawk tam ai rai yang, “ga sat ai” lam shawng galaw ai zawn re ai hpe ngu ai.

7. GINSANG

Ndai “Ginsang” ngu ai ga si gaw, ra ai nga tim, garai nchye ai, nga ai nga tim, garai n mu mada ai, Na hte na yu tim myi chyaw garai n hkrum ai, galaw ra ai bungli raitim garai n galaw ai masa hpe tsun ai re.

Ndai ga si gaw yawng nau n lang ai ga si re hta n-ga, htingnai ga masha ni kalang lang lata kahtam hkra hku sha jai lang ai re.

8. GA DIM AI

Ndai “ga dim ai” ngu ai ga si gaw, laika ka ai kaw mung “ga dim ai” lang mai ai. Ga shaga ninggun bu ai, ga shaga shangut shakre ai hpe “ga dim ai” ngu lang mai ai. Madung gaw “ ga hpungdim dat ai” ngu ai laika yan / ga yan kaw nna byin wa ai re lam chye lu ai.

9. GINRA

Ndai “Ginra” ngu ai ga si gaw, lamuga ginra, buga ginra hte ginra Wa Lawng / lamuga Wa Lawng, Mungnawk Hkawng ngu ai hkan lang mai ai. Ga Shadawn:Hugawng ga ginra, Htingnai ga ginra, Mungmyit Sinli ga ginra, Hkrang Wa Lawng ginra, Nmai Wa Lawng ginra ngu nna ga si, ga hkaw jahkum shatsup la ra ai ga si / ga hkaw, ga ngau langai re lam chye lu ai.

10. GA AW RAM

Ndai “Ga Aw Ram” ngu ai ga hkaw masum lawm ga hkaw gaw, ta tut garai n galaw ai ten, awngdang hkra / lu la hkra galaw na, dai hte lu hkra, dai madang du hkra galaw na; shi hpe, shanhte hpe dang hkra / grau hkra galaw na ngu ai zawn re hpe ngu ai lam chye lu ai.

11. GINRU

Ndai “Ginru” ngu ai ga si gaw, “Ginru Ginsa” ngu ai ga si ga ngau kaw nna sa wa re. Ginru ginsa labau, ginru ginsa ngang kang / ngang grin ai amyu, ginru ginsa chying ai amyu hte ginru chying ginsa ring ai labau lara hpum ai amyu ngu ai lamyi laman hkan jai lang ai ga si re.

12. GIT GU HPUN

Ndai “Git Gu Hpun” ngu ai gaw, lamu ga ntsa na tu jung hpun “Lagat Hpun” hpan re. Moi prat kaw nna Jinghpaw amyu ni gaw, ahkyak ahkya masat masa galaw ra ai shara, masat dingsat da shagrau shareng ra ai shara, jarit masat ai lamang ni hta ndai Lagat Hpun hpan “ Git Gu Hpun” hpe hkai shatut da nhtawm labau sakse masat dingsat galaw lai wa ai hpe chye lu ai.

13. GA PU BAW AI

Ndai “Ga Pu Baw Ai” ngu ai ga ngau gaw, Jinghpaw amyu ni moi kaw nna jai lang hkrat wa ai ga ngau langai rai nga ai. Ndai ga ngau hpe ga lachyum san ai, dan leng ai, myit yu mau ung ang dinglun chyai nga n rai ai, lachyum hta la nhtawm ndai ga gaw, Pu shup / pu baw kashin kau ai hte bung ai ga ngau lachyum langai re lam chye lu ai.

Dai majaw, ndai ga ngau gaw, masha a lam tsun ai rai yang, masha a lam rai na, Dusat a lam tsun yang dusat ai lam asan rai na, lamuga a lam tsun yang lamuga a lam asan sha chye na hkawn hkrang lu ai ga ngau hpe tsun ai re lam chye lu ai.

14. GA PU N BAW AI

Ndai “Ga Pu N baw Ai” ngu ai ga ngau gaw, tsun shaga ai ga a ntsa lachyum madung asan sha hta la lu na yak ai “ga ngau” hpe tsun ai re. Pu n baw ai, pu n shup ai ngu ai gaw, asan aseng, asan apra garai n byin ai ga hpe la kap da ai, ga shadawn jaw ai re lam chye lu ai.

Shawng de, Pa Jau Bum kaw Shanglawt Du Kaba langai “Sama Cha Hau Pa na Miwa ni Gumra Wuli shalun la mayu yang, ngai kaw wa shalun la ma ai” nga nna tsun shaga lai wa ai. Dai zawn nga ai hpe “Ga Pu N baw Ai” ngu ai re. Dai gaw nye a Gumra kaw Wuli shalun la ma ai ngu tsun ra ai ga rai nga ai.

15. GA TAWN GA DA

Ndai “Ga Tawn Ga Da” ngu ai lachyum gaw, ga hkaw mali rawng ai ga yan rai nga ai. Laili laika hku ka ai mi rai rai, n-gup aga hku tsun shaga ai mi rai rai, prat asak grau kaba ai ni hte shaga nga nngai kun? Asuya Du Salang ni hte tsun shaga ai rai kun? Makam Masham, Htunghking Sara ni hte shaga ai rai kun? Jinghku / Jasam hte shaga ai rai kun? Kanu Kawa, Kahpu Kanau, Kajan Kana ni hte shaga ai rai kun? ngu ai hpe shawng sawn maram kau nhtawm, hkungga ai, tsawra ai, kamhpa ai, tang madun ai, bawngban ai, san jahkrup ai, hte hpyi lajin ai ngu ai hku ka nna, hkungga ai nsen, kamhpa ai nsen, hkuhkau tsawra ai nsen hte myit manoi ai nsen ni hpe shara hte shara shi hte shi jai lang ai hpe ngu ai rai nga ai.

16. GA NDAW N RA AI

Ndai “Ga Ndaw N ra Ai” ngu ai ga hkaw a lachyum gaw, manang wa / jan a na hta “madat pyaw shingni / madat ra shingni” nga hkra n chye tsun shaga ai hpe tsun ai. Daring darut, agut agat, achyaw anyaw, adawt adat nga nna shaga ai. Ga shadaw;- Hka gawm kaw hka ka-ang sha rawng ai hpe “Ka-ang hkup naw rawng ai” ngu na malai “daw mi sha rawng mat sai” “Kachyi sha ngam mat sai” “Htingpa kram naw rawng ai” ngu na malai “Htingnye sha ngam sai” ngu ai zawn re ni hpe tsun ai lachyum re lam chye lu ai.

Loi Yang Hkru ji