SI WAI WA AI SHALOI JAI LANG AI JINGHPAW GA NI

Moi na Ji Wa ni a prat hta Jinghpaw ga jai lang, shaga lang ai hpe lawng lam hta hkan nna, san san jai lang shaga lang ai hpe mu lu ai. Masha Si wai wa ai shaloi tsun shaga jai lang ai gaw Kabu gara lam hta jai lang ai ga hte n shabung ai hpe mu lu ai. Jinghpaw ga hpe manu namnak tawn ai lam mung rai nga ai. Raitim ya na prat hta sharin ya ai lam, yu la mu la na lam, woi jai lang ai lam nau n nga ai. Dai majaw gau ngwi ngwi mat wa, n chye jai lang nna kaja ai hte n kaja ai, kabu gara lam hte yawnhkyen lam hpe kayau kaya jai lang ai hpe mu lu nga ai. ( Zaiwa hta mung Jinghpaw ga zawn n shabung ai hpe mu lu ai)

Lasu Su Laika. (Shî shit laiká)

Masha Si wai wa ai shaloi yawng hpe shana shabra ai shaloi Lasu Su dat ai (laika) ngu jai lang ai. Kabu gara poi hta rai jang Saw Shaga dat ai ngu lang ai raitim Si wai wa ai yawnhkyen lam hta Saw Shaga ai ngu n lang ai.

Tsu Htat Sa Ai. (Shî hpù e é)

Masha Si wai wa ai makoi mayang ai hta sa lawm ai hpe Tsu htat sa ai ngu shaga ai.

Makoi Mayang Ai. (Màng yhûm é)

Asak kaba sai ni shing nrai machyi makaw byin nna Si wai wa ai ni hpe lup makoi mayang ai hpe tsun ai.

Shawawn Ai. (Mo wâ dé é)

Jinghpaw Wunpawng amyu ni hta Si wai wa sai ni a Tsu myinla, Wenyi hpe tinang Dinghku masha ni, amyu matu ni yawng shara mi hta sha shabawn ai, shawawn ai htung nga ai. Tsu Wawn shara bung ai ni yawng gaw amyu bung ai, Kahpu Kanau ni re ngu shachyen shaga ma ai.

Dai majaw Jinghpaw Wunpawng amyu ni gaw tinang a Tsu ga, Tsu shabawn ai shara chye da ra ma ai. Si wai wa ai shaloi Tsu myinla hpe dai tsu ga de shabawn ai hpe tsun ai.

Shatsim Shalim Ai.(Pûn pyâm é)

Shalim Shatsim ai ga gaw kadaw kadan byin nna n nga mat ai shaloi, dai zawn re ai lam hpang de bai n byin, bai n hkrum n hkra na matu shalim shatsim kau ai hta tsun shaga jai lang ma ai. Asak kaba machyi makaw byin nna Si wai mat ai ni hpe makoi mayang ai hta (akyu hpyi ai shaloi) “shalim shatsim” ai ngu jai lang ai gaw n jaw n-ang ai lam rai nga ai.

Mana Shat. (Wè zoshuq)

Malu masha hkrai raitim Si hkrung Si htan re ai kaw jaw sha ai hpe gaw malu masha daw sha ai ngu n jai lang ai sha mana shat, mana si ngu jai lang ma ai.

Jahpu Ai. ( Û tu é)

Si hkrung Si htan byin ai shaloi sat sha ai, Dumsu, Nga, U, Wa ni hpe Shagu hkungga ngu n lang ai, Jahpu nga, jahpu Wa ngu jai lang ma ai.

BungHkaw Lit.( Wè dé zang wô)

Makoi mayang ai Poi hta gun sa ai, Si shat lit ni hpe, Magun lit, Si shat lit ngu n jai lang ai, Bunghkaw lit, Tsu htat lit ngu she shamying ai.

Majip Nba.(Màng gyang mè)

Si ai moi mang hpe jahpun magap ai nba hpe majip nba ngu shamying ai, makoi mayang poi hta Bunghkaw lit hte du sa ai, Jinghku Jing yu ni hpe nba jaw ai shaloi majip nba jaw ai ngu lang ai, hpu nba, pawn ba nba ngu n lang ai.

Mari Mana. (Wè sho gam é)

Dinggai Dingla wai wa ai shaloi, Kahpu Kanau Mayu Dauma ni hpe, Yawnhkyen ai lam shana ai, myit dum ai lam shadu ai kumhpa hpe “mari mana” jaw ai ngu lang ai. Dai shani sat sha ai mana shan jahkraw jaw ai, Num labu, La labu lama ma arung arai ni garan jaw ai, n du n pru ai ni hpe shagun jaw ai hta jai lang ai.

Kabung Dum ai. (Gabùn bàt é)

Yawnhkyen Kadang gara hkrum ai ten shalan shabran, shangwi shapyaw ai lamang re. Dingshawn htingwawn, Num wawn, Num la ai ten shangwi shapyaw ai hte n mai shabung ai re majaw Kabung dum ai ngu jai lang ai.

Hkanghpoi Ga, Likpyan Sa Ai. (Mo ming shut htô dé kat é pú dang)

Jinghpaw Wunpawng amyu sha ni a kamsham ai lam hta Si wai wa ai ni a Tsu myinla (Wenyi) gaw tinang amyu ni a “Tsu wawn shara” Kaji Kawa ni nga ai shara de du ra ai ngu kamsham ma ai. Hkristan makam hku nga jang Wenyi gaw sumsing mungdan de du ra ai ngu kamsham ai hte bung ai. Dai majaw Asak naw hkrung ai ten n kaja ai lam n mai galaw ai, mara lu jang tinang Tsu myinla (Wenyi) ni Tsu wawn ga de n du nna wam wam dam dam, jam jau hkawm na hpe tsang ma ai, Tsu wawn ga de n du ai myinla ni gaw, Nat tai nna masha hpe jahten sharun hpyi lu hpyi sha nga ai ngu myit sawn kam sham ma ai.

Dai majaw, Asak kaba ai ni Si wai wa ai shaloi shi a Tsu Myinla (Wenyi) hpe Tsu wawn ga de sa ai lamang gaw “hkanghpoi ga, likpyan sa” ai nga ma ai, likpyan sa ai lamang hpe gaw, labau chye ai Asak kaba, myitsu salang langai woi ningbaw nna Si wa ai wa a nta yup ra kaw nna shanhte a Tsu wawn ga de du hkra sa dat ai. Si ai hka raw waw ra hkran de nga ai Kaji Kawa ni a Tsu myinla ni de si ai wa a myinla hpe ap da ya ai masa re, grai pyaw ai nsen hte, masha law law hpe woi ngoi marawn let sa dat ai gaw lana mi tup aten jaw ai hpe mu lu ai.

Maran Ga Ai. (Byò kâng é)

Si wai wa ai wa hte naw hkrung nga ai ni a lapran shada myit dun ai lam n nga na matu, jahka hkat, jahka dat ai lam re, U, Wa ni sat nna Tsun jahka ma ai dai shaloi sat sha ai U, Wa ni hpe maran ‘U’ maran ‘Wa’ ngu shamying ai.

Myinla Htang Ai. (Numla) (Byò dú é)

Si wai wa ai masha a Tsu myinla ni Sanit ya du ai shani dum nta de bai nhtang kayin chye ai ngu myit la kamsham ma ai majaw Sanit ya shana nat jaw htung hta gaw U, Wa sat nna, numla ni hpe nhtang shabawn ai lam galaw ai. Hkristan htung hta numla htang akyu hpyi shalan shabran n-gun la ai lam galaw ai.

Kashun Magyi.

Manau shadung kaw ka shakap soi da ai, kashun magyi ngu ai shadung maka gaw lahkra hku magyi ai hta e lapai hku gawan magyi ai ngu hpan lahkawng nga ai, lahkra hku magyi ai hpe gaw manau shadung kaw soi nna manau nau ai shadoi nau shawng ni dai kashun magyi zawn kazu manau woi nau ai re. Raitim lapai hku magyi gawan da ai gaw, moi ji jaw nat jaw prat hta si ai wa a Di u (Du u) hte kaga lup wa lup grawng ni kaw soi da ai hta sha jai lang ma ai re, ya daini gaw lapai lahkra n ginhka ai sha htunghking maka sha rai jang rai sai ngu jai lang ai hpe mu lu ai.

Htunghking Bawhkaw.

Wunpawng Shadang (La) ni hkaw lang ai htunghking Bawhkaw hta, Hkahku Bawhkaw hte Manmaw Sa ba Bawhkaw hpan lahkawng nga ai. Gara Bawhkaw hpe raitim, Bawhkaw matu shingman hpe lahkra maga da nna hkaw lang ra ai. Raitim masha Si wai wa ai ni hpe jahkaw ya ai shaloi gaw, Bawhkaw matu shingman , (maihtawng) hpe lapai maga da nna hkaw ya ra ai re.

Lahta de tang madun ai lam ni gaw, Nat jaw prat hta jai lang ai re majaw nat jaw htung nat htung hku shadu kau, chye na kau ai majaw, Hkristan prat hta n jai lang ai mung rai na re. Kaja wa gaw Wunpawng amyu ni a, htung lai masa she rai nga ai.

Bum Chyangau