MATSAW GA HTE MATSAW NINGTSA GA

MATSAW GA HTE MATSAW NINGTSA GA A LAM

PUNGGA JA LI

Wunpawng sha ni gaw Matsaw ga, Matsaw ningtsa ga, Jan ga, Lamu madai ga ngu ai ga hpe lang nna dai shara ni gaw shanhte a matu grai hkik hkam ai shara, hkrit hkungga ai shara hku nna tsun shamying shagrau tawn da nga ma ai. Dai shara de nga ai ni hpe mung Matsaw ningtsa ni, Lamu madai ni, Mahtum mahta ni, Jan shata ni ngu nna hkungga shagrau nga ma ai. Dai ni hte matut mahkai shada gun jaw gun ya lu ai rai yang, dai masha wa gaw shinggyim masha sa tai ai shadaw shadang hpring ai wa hku hkan la ai rai nna arawng lu ai wa tai nga ma ai. Dai zawn rai nga lu ai wa hpe gaw shinggyim masha shada da rai timung, hkungga shagrau shaa chye nga ma ai. Dai Matsaw ningtsa ni hte ga shaga, mung jahta lu ai wa hpe mung Hkringwa, Jaiwa ngu nna alak mi mying jaw shagrau nga ma ai. Dai re ai rai yang dai Matsaw Ningtsa ga hte dai kaw nga ai ni a lam hpe anhte chye da ra na rai nga ga ai. Matsaw ga ngu ai nga nna dai shara kaw nga ai ni hpe gaw Matsaw ningtsa ngu tsun shamying ai rai nga ai.

Dai rai nna Matsaw ga ngu ai hpe shawng nnan bawngban tang dan mayu ai. Nga yawng nga pra ai shing-ra hta nan tsaw ai hte nem ai, lawu hte lahta ngu ai nga nga ai. Dai ga ni hpe tsun mayu ai hte lawa ngu ai gaw gaji gadun ai, grit nem ai hpe tsun mayu ai. Lahta shing nrai tsaw ai ngu ai gaw grau reng ai, grau kaja ai, grau chyoipra ai hpe ngu mayu nga ai. Chyoipra ai chyum laika hta Karai Kasang gaw tsaw ai shara kaw, lamu ningtsa kaw nga ai ngu nna tsun ai. Dai ni shinggyim masha ni hpaji kunghpan wa nna lamu ganghkau de sa du yu yang, Karai Kasang hpe nmu ai majaw, Karai Kasang gaw lamu kaw nga ai wa sha n rai, sumsing de mahtang she nga ai ngu nna bai tsun nga ai. Hkalup Hkrisa- tan ni a mahkawn buk dingsa hta lamu na yu wa kadai nga nna rawng ai raitim, mahkawn buk ningnan hta sumsing na yu wa kadai nga nna she rawng sai. Dai rai nna Wunpawng sha ni mung lamu hte sum- sing a lam chye na ai ngu tsun mai nga ai. Dai lamu hte sumsing hpe Matsaw ga ngu nna shamying ai. Dai Matsaw ga gaw sumsing kaw nan gaw n rai nga ai. Raiti mung, sumsing kaw sa wa ai lam kaw rai nga ai. Shing rai lamu, sumsing, Matsaw ga shing nrai, Jan ga nga ai hpe chye ai amyu rai nna dai shara kaw nga ai wa, nga ai ni hpe mung Matsaw ningtsa ni, Lamu madai ni, Jan shata ni, Karai Kasang ni nga nna chye ai amyu rai nga ai.

Gadun dawk hku tsun ga nga yang, Chyoi pra ai chyum laika hta madun da ai sumsing lamu hte Karai Kasang hpe Wunpawng sha ni chye ai ngu tsun mai nga ai. Dai majaw Matsaw ga ngu ai gara hku byin wa ai, ga- ra hku shamying hpang wa ai lam ni hpe npawt gawn dan ra nga mali ai. Yuda Chyum laika hta Yawdan hka waw ra hkran, Zi-um bum, Hka nan mung ngu ai gaw Palasatina mung kaw teng sha nga ai lamu ga ni re. Raiti mung, galang lang Zi-um bum shing nrai Yawdan hka waw ra hkran shing nai Hka nan mung nga nna tsun ai shaloi, dai Palasatina mung- dan na lamu ga hpe tsun ai n re ai sha, Karai Kasang nga ai shara, Karai Kasang a mungdan, sumsing lamu hpe tsun mayu yang mung tsun shamying chye nga ma ai. Dai hte maren Wunpawng sha ni mung Majoi shing-ra bum ga kaw na yu hkrat wa ai shaloi, ginru ginsa chying hpang ai shara langai mi kaw bum shagawng maga de tsang hte tsang lamu ga lam, lamu ga tsang ni nga ai kaw nga lai wa ai lam nga sai. Ginru ginsa masha ni nga ai kaw na tsang langai mi lung ai bum kaw sha grai manu nna grai nga pyaw ai shara langai mi nga ai. Dai tsang kaw na gadawng lung mat wa yang, gadawng nga ai shara kaw lamu ga shara grai manu ai langai mi bai nga ai. Dai hte maren bai matut lung yang, tsang langai bai nga ai. Dai zawn tsang law law nga ai jahtum na tsang gaw tsang hkun ngu na wa rai nga ai. Tsang hkun ngu na wa gaw tsaw dik ai bum ningchyan rai sai. Dai bum nchyan kaw lamu garap mara taw nga ngu kam ai. Shing rai lamu gaw Kindawn hkun kaw mara nga ai, lamu kaw gaw Hpan da Madu Karai Kasang nga ai. Dai Hpan da Madu Karai Kasang nga ai lamu hte mungkan ga gaw mungkan ga na Matsaw tsang, Matsaw Kindawn hkun ngu na kaw matut taw nga ai. Shing rai dai Kindawn hkun kaw Hpan Ningsang Chye ningehyang ngu ai wa nga ai.

Shi gaw Ga- rai Gasang hte shinggyim masha a lapran matut da ai hpaji wa rai nga ai. Lawu de na Matsaw tsang ni gaw dai shara de shinggyim masha ni du lung wa na matu hkrun lam lajang ya ai ni rai nga ai. S- hing rai Matsaw ga ngu ai gaw ginru ginsa masha ni nga ai shara hta Hpan wa Ning- sang nga ai shara hte lapran kaw na shara ni hpe shamying nga ma ai. Dai Matsaw tsang ni hta na ginru ginsa masha ni hpang de jahtum ai tsang gaw ginru ginsa masha ni hte masha masum mali tup daram ninggam ginlawt rai nga ai. Dai gindawt kaw gaw lung lung yu yu, lai mayu yang lakang htan nna lai ra ai. Dai lakang hpe Mahtum lakang ngu nha tsun ai. Hpang na daw de dai lakang hpe dawm kau ai rai nna ginru ginsa masha ni mung Matsaw ga de n lu lung ai. Matsaw ga na ni mung ginru ginsa masha ni kaw n lu yu mat ai. Dai hpe Mahtum lakang dawm kau ai ngu nna tsun ai. Mahtum Mahta lakang garai ndawm ai shaloi gaw Matsaw ga na Jan masha ni, ginru ginsa ni kaw mang- bru poi ni sa lawm ai lam nga ai. Shata ga na ni mung ginru ginsa masha ni hte pyaw chyai hkrum shaga chyai ai lam nga ai. Dai hpe shata mahkawn shayu ai ngu tsun ai. Ginru ginsa masha ni hku nna shanhte hta grau tsaw ai shara hpe Matsaw ga nga nna shamying ai. Dai Matsaw ga ni gaw gin- ru ginsa masha ni e sharawt mada dat yang, sumsing lamu hte matut nga ai rai nna sumsing lamu hte Matsaw ga ni matut hkat ai ngu nna kam ai. Dai hte maren sumsing lamu kaw nga ni hte Matsaw ga kaw nga ai ni mung matut hkat ai ngu kam ai.

Shing rai Matsaw ga na ni hpe hkung- ga daw jau lam gaw sumsing lamu de nga ai ni hpe hkungga ai hte bung ai hku hkap la nga ma ai. Shing rai Wunpawng sha ni manau dum ai gaw Matsaw Ningtsa ni hpe hkungga ai lam rai nna Matsaw Ningtsa hpe hkungga ai lam mung, sumsing lamu na ni hpe hkungga ai hku myit la nga ma ai. Shing rai manau dum lu ai lam gaw Ga- rai Gasang hpe shagrau sha a ai madang hku sawn la nga ma ai. Matsaw ga a lam tsun ngut jang, dai kaw nga ai Matsaw Ningtsa ni a lam hpe mung anhte tsun ra nga ga ai. Dai kaw nga ai ni gaw ginru ginsa masha ni hta nga sat nga sa madang grau tsaw ai ni rai nga ai. Shanhte gaw ginru ginsa ni n lu ai shinggy- im masha ni hta ra ai arung arai lu nga ma ai. Tsi mawan ni, mam ni, wan zawn re ai ni, shanhte kaw na sa la ra nga ai, num du hkra shanhte kaw na la ai lam nga ai. Mahtum Kaw Tsalat, Madai ma Ja Nga, Jan ma Hpraw Nga, Mudi shayi zawn re ai ni gaw Matsaw Ningtsa de na la ai num ni rai nga ma ai. Shing rai ginru ginsa masha ni hku nna shanhte hta nga sat nga sa tsaw ai, machye machyang hpaji grau nga ai, grau lu grau su ai rai nna shinggyim shing ra maka hku tsawra hkungga chyalu rai nga ai. Dai hta n-ga num jaw, num ya ai ma- jaw, grau tsawra hkungga mayu nga ai. Shing rai Wunpawng sha ni a htunghking hta mayu hpe hkungga ai htunghking pru wa sai.

Dai Matsaw Kindawn tsang hte tsang kaw nga ai ni gaw shanhte a mying ni hpe shanhte hkrai shamying shagrau ai sha- loi, nga yawng nga pra ni hpe la kap nna shamying la chye ma ai. Nkau mi Jan hte shabung nna Jan wa rai nngai, shing nrai, Jan ni rai ga ai nga nna shamying la chye ma ai. Dai ni hpe Wunpawng sha ni a maumwi hta Jan masha ni ngu nna mu lu ai. Ginru ginsa masha ni la ai num gaw Jan ma Hpraw Nga ngu ai rai nga ai, Jan shayi sha Nang Koi hte Shata wa Zau Doi gaw ginru ginsa masha ni a manau poi de sa ai. Dai rai nna dai ni du hkra manau shani Jan dum- sa yang, Jan wa Nang Koi, Shata wa Zau Doi ngu na dumsa ai. Matsaw tsang kaw nga ai nkau mi, shing nai, langai ngai gaw tinang a mying hpe Myihprap wa ngu nna shamying ai. Dai Myihprap wa ngu nna shamying ai wa hpe ginru ginsa ni e gaw Mu sheng wa ngu nna tsun ai. Mu achye ai shaloi, myihprap hte rau achye ai majaw Lashe wa hpe Mu achye ai wa ngu nna tsun ai. Matsaw Kindawn na nkau mi shing nrai, marai langai ngai gaw shi gaw Nbung wa re ngu nna shi hkum shi shamying la ai. Dai zawn re shanhte mying gumhkawng nga ai ten hta shingkang shingna hte nga lai wa ai ni rai ma ai. Raiti mung, hpang na daw de gaji ga- dun wa ai, shing rai, dai atsam rawng ai wa asak kaba gumgai dingla wa ai ginru ginsa ni a maumwi hta Mahtum Mahta dingla ngu nna dingla langai hku sha hkai mat wa nga ai. Ginru ginsa ni hku nna yu gaji na lam ni nga wa ai, shing nrai, Matsaw Ningtsa ni hku nna Ginru ginsa ni hpang de yu sa n ngut, n jin wa ai majaw, shanhte a lapran na Mahtum lakang hpe dawm kau ai lam rai nga ai.

Ginru ginsa masha ni a maumwi hta dai Matsaw Ningtsa ni a lam n mat mat ai sha tut e adum nga ma ai. Dai rai nna Nbung mying mying ai wa a numla wa hpe Nbungnat ( Bunghpoi ) ngu nna jaw jau ai, Myihprap mying mying ai wa a numla hpe Lasheng nat ngu nna jaw jau ai. Jan mying mying ai wa a numla hpe Jan nat ngu jaw jau ai. Marang mying mying ai wa a numla hpe Matsaw nat ngu jaw jau ai. Mahtum Mahta mying mying ai wa a numla hpe Sinlap ngu jaw jau ai. Ginru ginsa masha ni kaw na Matsaw ga de si ai wa hpe Kindawn nat ngu nna jaw jau ai. Ndai Kindawn wa gaw Ginru ginsa ni hte Matsaw Ningtsa ni a lapran na gasa wa rai nga ai. Ndai zawn Ginru ginsa ni hta Mat- saw Ningtsa nat jaw jau ai lam byin wa sai. Dai rai nna Jan nat ngu ai hpe jaw jau ai shaloi gaw Jan wa mung Karai Kasang hpan da ai majaw, Karai Kasang hpe hkungga ai zawn byin wa ai. Nbung lamu Marang mying mying ai wa a numla hpe jaw jau yang mung, dai ni gaw Karai Kasang shinggyim masha a matu hpan da ya sai rai nna Karai Kasang hpe hkungga ai lam tai wa ai. Numla n re ai sha shawng shawng kaw nna Karai Kasang rai nga chyalu gaw Hpan wa Ningsang, Chye wa Ningchyang rai nga ai. Dai wa gaw Karai Kasang rai nna mungkan maga de na Kindawn hkun ngu na kaw dung ai wa rai sai. Matsaw ga hte Matsaw Ningtsa ni a lam npawt nhpang hku nna tang dan bawngban ai lam rai nga mali ai.