SHADAN KRUNG

SHADAN KRUNG

HPAN JA

Naw kaji yang kaba ai ni Shadan krung ga gaw nat ga re, Karai Kasang hte tsan gang la ai ga re, htunghking li nak dik ai ga re, nga nna hkrai tsun dan ma ai majaw, nye myit hta Shadan krung de gaw nat ni alam rai hkawm nga ma dawng ngu pyi myit du yu sai. 1981 ning e, Myithkrum shi laika rung na shi sawk masha hku Yingkyang ginwang de du yu wa ai shaloi, ginwang sharin shapan dap na sara ma Hpautsen Tawng ngai hpe Shadan krung de maumwi hkan sawk hkawm ga nga nna woi mat wa u ai. Amying Shadan krung nga ai hte shabung in, Munglung lai mat wa ai kawn, grup grup yin yin hpunnu hpun gam gangu, utu chyangngau kukdwi koirawng ni gasu, lamu de mada yu tim, lamu pyi di htumpa mate law ai sha mu nga ai, jan pyi gaw hpunlap lapran hkan akau achyen rai gabrim ai sha mu mat sai. Lam hkawm gade ba tim gatsi pyaw ai nbung ni masin salum kata de du hkra hkawn bang wa nna, gahtet ai salat hpe lagyi ai nbung e hkrai gut shamai kau ya nna, azet tsang n gun n yawm chye nga ai. Shadan krung de nnan du bang wa ai shana, Npri de dingshawn langai nga ai, anwoi dwi dai nta dingshawn kaw shat wa sha lawm nna, shana gaw dumsa kaba langai mi ( mying malap kau sai) a nta kaw wa manam nna, maumwi mausa ni jahta rai ga ai.

Dai shana dumsa kaba wa hkai ai maumwi hta, Lawhkum Ja Dim gumrawng gumtsa hyen woi nna Shadan krung ga e n-kawn magyi wa dan ai lam na lu nna, grai shagrau kau ni ai. Anhte ga na ai Lawhkum Ja Dim a maumwi gaw, shi nau tsawm nna nau bai rai dum, nta gawk shi hkun re galaw tawn nna, lana mi shabrang langai mi hte gawk mi kaw bai yup yup re, nga ai sha na yu ai. Shadan krung ga du bang wa ai kaw, nat hkinrawng hte jan hkinri hpe grai grai tsaw, grai grai tsawm nna galaw tawn shajang nga ma ai, dai hte maren, Myhtoi ( jaiwa) kaba Kumhtoi Gam a myhtoi numla gaw, Yawngba Tang ngu ai shabrang langai kaw shang sai, dai wa gaw chyaga byap ntsa hkan majoi mi hkawm, nga rem tim langa hpungkung hkan sha gau chyai, hpun ndung de lung yang lagaw hte hkawm nna lung wa ai, hpun ndung hkan woi lagang zawn majoi mi noi goi tsat hkawm ai, nga nna tsun garu nga ma ai. Sharaw kawng hte Gumlau lam lapran kaw shangu nta gachyi law ai mi gap tawn ai, dai kata kaw maibau hpun hte lahkum langai mi tawk shadun tawn ma ai, andwi hpe woi hkawm ai la (kadai rai sai kun, nchye mat sai) langai tsun dan ai, dai gaw Yawngba Tang hpe masat tawn ya ai myihtoi nta re da. Dwi ngai hpe Sharaw kawng jawng de jawng up Lasang Yaw ni hpe naw sa gawan ga nga nna, sa wa yang, mare shang ai hte Maran la wa hte hkrum nna shanhte nta de woi mat wa sai, shachyan shaga ngut ndawt, nta madu jan tsa jahkrat bang wa nu ai.

Nta madu jan hkai tsin hte tsa htik bang wa ai shaloi, gasha ni marai manga gaw hka gawm ni lang nna ganu kaw aput apai nga hpagang hpyi lu bang wa ai hpe grai naw yu mau kau ni ai. Anhte nta gaw hkrisatan dinghku re nga nna, dinghku kata hta tsa chyaru ngu ai kadai nlu, nu yan wa gaw ma ni tsa pa re sha yang baw nu chyat ai nga nna, tsa pa sha pyi n sha shangun ai re majaw, yu mau mat ai hku rai nga ai. Uhpa hte hpagang lu sha la re hpang, sara ma hte an Sharaw kawng jawng de sa wa sai, jawng up Lasang Yaw gaw Hpuntai yang jawng de rai mat wa sai nga, ngam nga ai sara Chyang Yin Sin yan sara ma Nhkum Ma Zet gaw, sara ma Hpautsen Tawng mare salang ni hte shaga nga ai laman, ngai hpe Hkauna hka de woi sa chyai ma ai. Maling kata hku na lungrawk lungrak lapran hku lwi hpungshaw ai Hkauna hka gaw, nlung hkan tu ai hka kara ni pyi masit shayu tawn ai kara singtsin zawn rai hkra waw hpungyawt nga ai, hka kata na wurat wutsang ni a ningnyeng gade tu ai pyi mu hkra nan san tsawm ai, htingra bungshi hpyi nga jang hka de hkrat run bang ai nampan hkyep ni mung, hka kau hpunggaw hkan lwi gaboi nga ai hka ntsa hta run hkrat bang ai nampan shingrun ni wa mung, kri gaboi nga ai hka la-ing kaw hkyawm rai nna, hka kata de nna nampan langai bai pu pru wa ai zawn rai hkra yu tsawm nga sai. Panlawng ni gaw, tu shara nlata kam ai zawn, zainyi jang, zaibru jang, nlung lapran, hka la-ing, hka hkinggau, hkumpup, tsingdu maling hkan du hkra tu ahpra at nga ai, da-sang hkai tawn ai hta grau tu tsawm nna, pu an ai nampan gaw law malawng san hkye re law ai, dai kaw hpraw ai hte loi hkye mang ai ni bai bunghkran re kaw grau yu tsawm nga ai.

Hkakau hpunggaw zainyi dabang hku tu ai Panlawng pan ntsa hkan, ma langai mi hpe galeng dat tim hkrat yu wa lu na zawn nrai hkra hkra chyip nga ai. Sara yan nampan maling de shang hkawm nga yang, myit ngwi myit pyaw, gabu mani ai myi man nsam mung nampan zawn rai tsawm mat nna, gara gaw nampan, gara gaw masha n gup re pyi n lu hpaga mat sai. Htingra nbung swi nga jang, Niawng pan sama san san nga ai sha marawp let, shan hpe datbung dem ya na ngu yang, nampan tsaw nna myi man gachyi chyi sha kra ai majaw, bai ashim pru wa nna, lawu nawt re de htawt sa saga ai. Dai shara hta hkauna hka lahkawng bra rai zinlawng langai mi wa byin ai lawu e, hka dai yan bai wanggrup rai wa lwi hkrum ai gaang kaw, lungpa langai gaw sa dung chyai grai manu na hku hpum taw nga ai. Ngai sara Chyang Yin Sin yan sara ma Nhkum Ma Zet hpe, nan dai nlung hta sa dung mu, ngai datbung langai gayat ya made, ngu tsun jang, shan lahkawng yep sha sa dung nga ai kaw, datbung langai gayat ya sai. Datbung dai gaw shan a sumtsaw sakse tai mat sai hta n ga, Hkauna hka zawn galu ai, shan dung ai lungpa zawn ngang grin ai dinghku langai lu de nna, ningrum ningtau rai nga ngwi nga pyaw mat masai. Ndai lam hpe ngai pyi malap kau sayang, Mangshi ga e du wa galaw mat sai du kaba Chyang Yin Sin gaw, ngai hpe nang hkauna hka kau e dat bung dem ya ai hte maren, an htinggaw mi na masha tai lu ai hpe, grai chyeju dum ai nga nna, shawa hpawng hkan loi nhkring ai tsun jahta dan dan rai nga nu ai.

Sharaw kawng hte Shalaw hkran hkan naw gawam hkawm nga ai laman, Npri hte Maitawng gahtawng na mahkawn shabrang ni gaw, an woi dwi hpe Npri bum de lung chyai na matu, shan chyaru ma hkra lajang tawn nna saw nga masai. Hkauna hka na hkrai noi hku lai nna Maitawng hku, Npri bum de yan mat wa saga ai, bum lam hkan wuraw hpra rai nna lam loi lai yak ai, nye shawng kaw shabrang langai mi lam hkyen ya nna, apyaw sha lai mat wa lu ni ai. Npri bum pungding e du lung wa yang, Shadan krung ting hpe apyaw sha mu mada ai, Shadan krung ting gaw bum hte bum matut shinggrup hkat ai shara rai nna, yu dat yang magwi gau gahkyin tawn ai zawn she rai nga ai. Mangai ta hta Npri bum kaw nna Myitkyina myu mu mada ai nga ma ai, dai shani gaw htingra ta na wan numshi e shingga nna nmu mada ai, mangai ta hta galang mi du lu yang Jinghpaw mungdaw a ginjaw rai nga ai Myitkyina hpe sha pyi mu mada yang, ngu ai marit myit gaw kraw kata kaw nan matsing bang da sai. Npri bum pungding kaw lunghtawn langai hpum nga ai, lunghtawn kaw nna lawu maga de, manang ni a ta e dun tawn nna, maidang pyi kyawm kyawm nga let chyan mada yu yang, lung hkap hku lungbra shanam hte gatkung pa ni gahtap gala rai tu noi kajang nga ai, pantsun mung ngai she grau ai nga ai zawn, ninghpawng hte ninghpawng rai tu nna, apu pu an nga ai, nbung hpyi nga jang manam ngawn ban gya wai wai nga pru wa wa re majaw, pyaw len taw nga na zawn she nga mat sai.

Anhte nlang dai lungpa ntsa e jawm majaw nna datbung langai gayat ngut ai hpang, mare masha ni hkyem gun ai udi nbaw shat, u shan ni hpe shat jam hku jam sha, aya hpagang jahkraw kaw nna lai bang mat wa ai, lagaw ndung e du, lasaw lasa lamyi laman hkan chyam bra wa nna kya mat ai, langai mi kaw shanat mat na zawn nga ai sharang let, Myitkyina hpe nmu yu ai nwai myit magawn gun nna bai yu wa mat saga ai. Ya daini datbung dai ni hpe bai nhtang yu ai shani, dwi Hpautsen Tawng gaw si mat sai, datbung na masha nkau mi hpe ngai nchye mat ma sai, agu Dinrin Yaw Yin hpe sha matsing mat sai, rai tim ngai hpe Npri bum de woi lung ai ni yawng hpe prat tup nye kraw kata hta matsing gun dingyang rai nga ai. Npri bum kaw nna Hpuntai yang de bai du wa ai shaloi, Gumhpraw yang de Langan nta ni dingshawn shang bai shaga masai. Gumhpraw yang gaw Jinghpaw hte Lisu ni nga ai shara re, Lisu ni grau law ma ai. Dingshawn shana, ndaw de gaw Jinghpaw ni htawngka ka, nhku de gaw Lisu dagaw gaw rai, nhtoi le shapyaw masai ngu jang, hpang jahpawt Langan ni a hpun pyen nta pyi chyahpung de yawt hkyeng rai mat manu ai. Dwi Hpautsen Tawng gaw Gumhpraw yang kaw nna Wuhpai jawng de, shi hte grai hkau ai sara ma Marip Roi kaw bai woi lung wa sai. Sara ma Marip Roi gasha Ma Hkawn yan Ma Bawk hpe shangai ai shaloi, shi she gawa tai nna hkang ai re nga nna tsun dan ai.

Sara ma Marip Roi an woi dwi hpe udi gangau hte hkrangku shadu ai simai hte shat woi sha ai hpe, grai mu dum kau sai. Dai shani ang shaa Magwi Tu ni a nta dingshawn rai nna, dingshawn lawm na hku bai rai sai. Dingshawn sa ai mare masha ni hpe, dingla ni gaw pali shit, hpawmi num ni shangu jinghtawng, ramma ni gaw lahpaw htat, hpun hta, hka ja rai, htingchying nnan chyahpung shachya masha gamawng ai sha mu mat sai. Nta ningnan gaw hpunpyen hte shachyaw ai re, kagam galup na hku rai malu ai. Raiyang kagam nlu mari ai majaw, hpun lapa pa da ai ntsa kaw, Kawa share lapa bai pa la rai, shangu jinghtawng grai grai htat hkra galup nna, magum pyi mambum zawn rai hkra htat nna bu da manu ai. Dawdap e, kaba ai ni maumwi hkai at ma ai, ngai grai myit lawm ai maumwi gaw Sengdawn Myi htoi ugut gu mat wa na shawng e, shi ga madat tsun ai, ngai sanit ya naw hkawm na, sanit ya laman ngai hpe hkum shamawt mu, nga nna yup nan mat wa ai lata, nsa nkap mat sai. Nta masha ni hte mare masha ni shi tsun ai hku nan sin nga ai, sanit ya du ai shani shi bai shaga pru wa ai shaloi, ndaw de magawn hkum sa mu lu, ngai a hkyima dun tawn da ai lu nga tsun ai da, masha ni myi htoi wa a hkyi ma gaw ganing re rai kun ngu sa chyan yu yang, ndaw e sharaw kaba hpum ai sa mu gajawng rai ma ai nga nna tsun hkai ai.

Hpagang jau ai shaloi lahpaw shawng gam ya ma ai, masha ni gaw hpaw-hkyawn grai grai tsawm ai hkyawn la nna hpagang ja lu, ngai gaw hpagang nlu ra ai hta n ga, hpaw-hkyawn nchye hkyawn ai majaw, hpagang n lu ai ngu ningdang nga yang, nye pai maga e dung ai loi mi hpumhpum re shabrang langai lahpaw la nna ngai hpe hpaw-hkyawn hkyawn sharin nna, hpagang bai ja jaw rai nga ai. Bu ren kaw bu ren, bu gawt kaw bu gawt nga ai hte maren, ramma ni nau shagwi jaw ai majaw, hpagang lu ai baw pyi yin yin she nga wa sai. Shat bai hkan jaw wa ai shaloi, shat gaw ma hkra lahpaw hte makai la nna gam jaw ma ai, si mai ntsin hkap la na matu lahpaw bai gam ya masai, dai hpaw -hkyawn hpe ngai garai nchye hkyawn ai, shaloi hkra maga de dung ai shabrang langai rawt ngoi rai mat wa sai ngu jang, kawa lawtawk lahkawng gan gawan la nna shang wa ra ai, wanmang makau ngai a man de wa tawn nna, hkri nang lahpaw nchye lang jang ndai kaw bang sha ga, nga nna tawn ya ai. Ngai pyi grai lagu mani mayu sai, nta ga ndai zawn re lawtawk kaw gaw gwi gasha ni hpe shat jaw ai shaloi she lang ai wa, ngai gaw nai hte shapre wa nra shamyaw ai simai ntsin she ja sha kau sai re. Anhte nta gaw gat hte ni ai sha nrai, wa Htingnai ga de hpaga ga sa sa rai nna, shawun hkawan re grai gun dut sai da, dai majaw nta kaw mung shawun hkawan hte bagan gaman ze, mare hkan poi galaw tim lahpaw hte kadai ndaw sha mat sai rai nna, lahpaw nchye lang ai re.

Shat sha ngut nngut rai yang ndaw ya de htawngbau shupsheng ngoi garu wa sai, an woi dwi gaw dawdap kaw maumwi madat ai ngu dung nga ai ten hta, salang langai mi tsun ai: Lawhkum Ja dim gaw num rai tim majan gasat byin ai re nga nna, myit hta grai shagrau taw nga ni ai. Hpang jahpawt anhte ramma ni jahka dap kaw magup sumhpa jahta chyai nga ga yang, shinggan de nna la langai mi shang wa ra ai, ngai hte yep sha dung nga ai, dai hpum hpum re shabrang hpe: " Myihtoi wa e, Gumsha ni num hpyi sa na matu nang hpe le nta de Myihtoi naw sa shayu ya nga nna shaga nga ma ai." Nga nna wa shaga dat jang, shabrang wa ngai hpe naw dung u yaw, nga nna tsun kau da let rawt mat wa sai. Shi rai mat wa ai hpang kadai re ngu san yang, shanhte grai hkungga ai hku nna myi htoi Yawngba Tang re nga tsun dan ma ai. Masha ni tsun ai, Myihtoi kaba Kumhtoi Gam a myihtoi htawt shang ai, nga nna tsun garu ai Yawngba Tang gaw, shawng shani kaw nna ngai hte rau yep sha dung ai shabrang dai she rai nga hka, myit kajawng ai lata, hkum ting ningshung si pyi hprwi nga hkra shagrau mat ni ai. Rau dung manang ni hpe shi myihtoi htoi ai sa yu ga, ngu jawm sa wa yang, Gumsha ni a nta ndaw kaw du ai shaloi, nhku de chyinghkyen rak she nga ngoi ai sa na dat jang, anhte nlang myihtoi daw daw mat na tsang nna nshang yu kau ai lam hpe, daini du hkra myit malai taw nga ni ai. Masha ni hpe ganing rai htoi ai kun ngu san jang, myihtoi lahkum kaw shadun ai hte, ntsin hpyi ai, ntsin nhtung laman lahkawng kaw tup re wa hpai ya jang, ma hkra gadawng lu kau ai hpang she, myihtoi htoi bang wa ai re nga nna tsun dan ai kaw nna, masha dai hpe shaga na pyi hkrit mat ni ai.

Gade ning a hpang she Dingga Tang ka dat ai( Myihtoi angawk)) nga ai laika hkap mu hti ai shaloi she, ngai mu yu ai myihtoi Yawngba Tang gaw, sak naw kaji kaw nna myihtoi htoi hkawm ai re, masha ni nau hkungga nna tsa pyi tsa pat sha hkrai gun jaw ai nga yang, tsa pup pup mat nna myi htoi angawk tai mat ai, jahtum daw de gaw jit tat ai pyi nchye mat hkra mana mat nna, Hpuntai yang gat kaw si tarung mat sai, nga jang she, grai nan na lahpawt dum kau nngai. Lama shi pe masha ni e tsa machyan hte hkrai n hkungga jaw ai rai yang, shi gaw daini du hkra myihtoi naw htoi lu na sha re, shi sak gade n kaba ai, ya ten du tim manga shi jan ning dang she naw rai na re. 1997 ning hta ngai Shadan krung Hpuntai yang kaw laika ka hpaji sharin shapan zuphpawng laban bat mi wa woi hpaw ai shaloi, Hpuntai yang ngu shamying ai shara re, gara kaw hpuntai tu ai kun ngu hkan tam mat wa saga ai, sinna maga de tsawmra hkawm mat wa nna hkauna pa de bai rai mat wa ai bum lagaw kaw yi wa langai galaw da ai, dai yi wa ndaw e, lunghpraw kaba masum hkrum rai majaw tu ai lapran kaw, hpuntai langai mi sak grai kaba sai zawn rai tu taw nga la ai, hpun dai hpe mu jang she, masha ni hpun ndai hpe yu nna shamying ai rai kun ngu san jang, lam woi hkawm ai ni mung rai na re nga nna tsun ma ai. Dai ten na Hpuntai yang gat hta hpun hpaga ga ai masha gaman re, lam dingdung hpun ngau gaman gawng tawn da ma ai, gat ya de na dut lu dut sha lam gaw ngai nnan sa du ai ten na hta nga yang grai hkanu mat sai, lusha seng, buhpun seng, lang rai seng kaw lai nna, hkum dip seng, hpaida wang, hpaze dap du hkra hpaw nga la ai hpe yu mau na daram rai mat sai.

Ngai nnan du sa yang ndai gat hta Jinghpaw ni hkrai re wa mi nngu tim, Jinghpaw ga ga ai ni hkrai gat baw kaw nna gat mai du hkra nga ma ai, raitim dai ten hta gaw Jinghpaw ga nchye ga ai ni gat shang sha ai grai law mat sai. Ginwang daw rung hta Sau Hpaga Tang a hpun hte nan krawk la ai manau shadung hpe majoi mi gahtap gawng tawn nna gabye kaba rai daw kau ai pyi rawng sai. Manau shadung dai gaw, Jinghpaw labau hta manu dan dik ai, hpun hta nan manau maka krawk shakap ai re, shi a sama maka grai si mani hkra nrai tim, shi gaw Jinghpaw labau hta krawk shapraw ai sha n rai, Jinghpaw ni a labau maka hpe wugawn hte nan tawk da ai sakse lu madun ai rai nga ai, shingrai dai rung sin ai masha ni hpe manau shadung dai hpe gabye kaba ndi ai sha, shara mi atsawm sha hta gahtap hkawng da mu ngu nna, gahtap gala tsun ni ai. Daining shata 4 hta, Magwi ni nta dingshawn shang shaga masai. Moi na lang nshaga ai kaw pyi sa sai re majaw, ndai lang gaw krak sha naw sa na ngu sharawng let, Laiza de nna lung wa ai lata Wuhpai gahtawng de ngai nau Maji Htu Lung hte hkan lung wa saga ai. Laklai shai mat ai lam gaw, moi gaw lam hkawm nna kying hkum gade she hkawm kau ai, ndai lang gaw hkying hkum mi jan kaw Magwi ni a nta ndaw e nan le rai hkra loi mat sai. Daining na Magwi ni a htingchying nan gaw htap lahkawng re wutdek nta rai nna, shannau ni la marai kru rai yang, ntsa htap hta gawk kru di galaw tawn nna, dama gasha ni gaw kata dap hkan wa manam yup na matu shara ntaw nma shang lawang rai galaw tawn nga ma ai.

Ndaw ya mung moi na zawn htingra htu yang masha hpe sha kam sai n rai, jak hpe kam nna dam lada di htu shapa tawn ai kaw, mawdaw pyi gade shi mai jahkring nga ai. Hka mung pyun hte nhku de shalen bang tawn sai, dingshawn manam daw ai ni shat shadu tim n tsin pyun sha gang la nna gara kaw lang ra yang gara kaw madi rai loi dik mat sai. Shat daw jau ai lam hta moi na zawn lahpaw hte n re ai sha, hkawan gade kaw bang nna dam jaw jau mat sai, simai ni hpe matep ai hku nrai sai, ma hkra gaw hkawan hkan alaw alam rai hkan jaw mat masai. Datwan shatu la lu sai rai nna, nsin nhtoi pyi n masat mat sai. Namdum galaw tawn ai madang kaw du sai majaw, namhkawm na lam hpe nmyit ru mat sai. Salang kaba Magwi Tu gaw Shadan krung ga e "Magwi lawan wa" ngu ai mying gun ai wa rai nna, gasha ni hpe sharin shaga du ai majaw, Magwi Brang Nu hpyen shang ai ten hta( Myit hkrum shi laika) hte ( Wunpawng) laika kaw laika amyu myu ka bang lai wa yu sai. Bai nna Mungding Kinma ga hpyenla la la ai ten, dai ga na Jinghpaw ni hte nnan sa shachyan matut hkat wa ai mung shi rai nga ai. 1995 ning yinam ta hta ngai Mungding Kinma ga na Jinghpaw gahtawng hkan sa gawan hkawm ai shaloi, dai ga na hpawmi num ni gaw, ngai hpe Marip Brang Nu hte nchye kun, shi gaw grai tsawm ai shabrang re nga nna, grai hkap san ma ai, shi hte sumtsaw gamung mung yu sai ni chyahtam shi a lam chye mayu nna, ngai hpe kumshu yi de woi hkrat wa nna shi a lam ni ja ji san rai ma ai, ngai shanhte hpe Marip Brang Nu gaw hpyen kawn pru ai hpang asuya bungli galaw nna, ya ten gaw lungseng hpaga lauban ban nga ai ngu shachyan ya jang, marit ningtsing ga-un nna, kumshu yi e bai shangawn dan re hpe, daini du hkra shingran pra pra naw mu nga ni ai.

Magwi Naw Ja gaw Sakhkung laika shapraw dap na jakrung Ningbaw kaba galaw ai hta n ga, Miwa, Jinghpaw laika hku ga shagawp ka re sara byin tai wa sai. Magwi La San gaw kaji kaw nna ginjaw Bekyin de lapran tsang jawng lung nna, Yinnan nlaw amyu jawng kaw Inglik laika sharin ai majaw, maigan hpaji hte Miwa hpaji hpe law law sharin la lu ai nna, ya gaw Nshawn ginwang ginwang daw du kaba galaw nga nu ai. Magwi Tu Magwi Tang, Magu Yaw ni gaw shanhte madu hte seng ang ai magam bungli hpe galaw shakut nna, dinghku hpe alum ala rai de kajang nga ma ai. Ganoi sumshi ning rai wa yang, ngai gaw ndai Magwi ni a dingshawn lahkawng lang wa shang yu nna maram yu ai shaloi, gashu gasha ngu ai hpe gaw madu hkum nan galaw du let sharin shaga yang she, gashu gasha ni mung myit su myit gawp let kam ging ai masha ngau tai lu nga ai re. Grau nna salang kaba Magwi Tu gaw shi hpe masha ni e "Magwi lawan wa" ngu shamying ai mying lu ai hte maren, gasha hte mare masha ni hpe hpa galaw yang mung lawan mu, lawan mu ngu krai shadut dut re nga nna tsun gajai nga ma ai rai.