LUNGLING SUNGSHAN MAYAN SUM AGRAWP MAT AI JAPAN

LUNGLING SUNGSHAN MAYAN SUM AGRAWP MAT AI JAPAN

SAU KA—MAI

Lai sai shaning 60 a wawra maga byin lai wa sai masat 2 mungkan majan a lam tsun hkai kajai shalai, hpaji la mai ai lam ni n taw n tsang ahprun n dang wa naw rai nga ai. Dai mungkan majan gaw, sinna mungdan ni a matu, "Janmani majan" rai nga ai zawn, anhte sinpraw dan masha ni a matu gaw, "Japan majan" rai nga mali ai. Mungkan majan garai n byin ai shawng ten e, Amerikan ni gaw, Miwa mungdan kata, masing galu jahkrat nna, paga yumga kaba galaw sha pyaw taw nga ai re majaw, Japan ni Miwa mung de him gasat shang bang wa ai hpe n ra sharawng nga ai. Japan ni chyawm gaw, Amerikan wa a htuk manu lam hpe myit tau sawn shalawm ya ai n rai, 1937-39 ning laman, n-gun kaba hte gasat mat wa yang, Miwa mungdan sinpraw nchyan, panglai hkingau mayan, ahkyak grau ai hpaga gina ni mahkra nan dang la kau ya nga sai. Amerikan ni a masa gaw, masha wa a mungdan de hyen n-gun hte ta tut shang chyinglau na tara n nga ai zawn, Miwa mung de tawt lai gasat shang ai Japan hpe mung htingnut nhtang na lang hte lang tsun shadum tim, Japan wa madat ya ai lam n nga ai. Dai re majaw, Japan ni hpe gawt shabai kau lu hkra shingla gasat nga ai Miwa ni hpe mahtang, hyen rai laknak n lawm ai sha, malu masha, tsi mawan, buhpun palawng arung arai ni karum jaw bu nga sai. Nnan daw hta hkoi jaw ai masa hku karum ai lam rai nga ai.

Rai tim, Amerikan a karum madi shadaw lam shalet jaw lu na, Miwa mungdan sinpraw hkingau mayan na sanghpaw daru mahkra, Japan ni a lata de hkrai rai mat nga sai. Dai majaw, Japan ni ka-up tawn ai shara ni hpe koi nhtawm, Wetnam mungdan dingdung daw hku wanleng hte matut shalet jaw yu yang mung, kade n na yang sha, Wetnam mungdan ting hpe Japan ni htim zing kau sai. Shaloi Amerikan ni gaw, Myen mungdan hku mahtang matut shalet jaw bang wa masai. Dai ten hta Myen mungdan gaw Inglik ni a zaw mungdan rai nga ai. Amerika kaw na sanghpaw hku htaw sa wa ai karum rai ni hpe, Yanggung sanghpaw daru e jahkrat htawm, dai kaw nna, wanleng hku Mandale, Lashu du hkra; Lashu kaw nna Sakhkung mungdaw hpe lai di nhtawm, Hkunmin duhkra matut shalet na mawdaw lam garai n nga ai majaw, nnan daw hta guma hte she htaw shalet bu nga ma ai. Mawdaw lam hpe mung hkyak lahkya ladat hte waw hpaw bang wa sai. Myen mungdan hpe lai di nhtawm, Miwa mung de Amerikan a karum wuntum rai ni htaw shalet ai hkrunlam hpe, Shidwiwe lam ngu nna tsun shamying tawn nga ai. Miwa Asuya gaw, sinpraw maga mungdan chyen mi ting tat sum kau sai re majaw, mungdan a sinna dingdung jut, Yangzi Kyang hka kau na Chunghkyin mare de mahtang hprawng htingnut rung jung taw nga sai. Japan wa chyawm gaw, Asha sinpraw dingda ting hpe tawt nhtawm, Yudiya mungdan hpe mung zing la kau ai hta n-ga, Myen mungdan de mung hkrawn shang sa wa na ra ai lam dan leng taw nga sai. Hpa majaw nga yang, Myen mung de Japan hpe woi dun bang na Myen myutsaw hpung ni nan, Japan ni kaw shang lawm taw nga ai.

Dai re majaw, Amerikan ni gaw, Yanggung, Mandale, Lashu mahkrun hten mat wa jang, Indiya mungdan Ledaw mare hku nna mahtang, Jinghpaw buga Hugawng pa hpe lai di nhtawm, Miwa mungdan de karum rai htaw shalet jaw na Shidwiwe lam mayun masing hpe mung, jau kaw nna yaw lajang tawn nga sai. Raitim dai ten hta Hugawng pa gaw, maling mala karing karang ginra she naw rai nga ai. Shing rai nga yang, Japan ni gaw, Asha sinpraw dingda mungdan ni langai hpang langai hpe yi ngam sharawt nna, gasat dang mat wa nga ai zawn, Hpasihpik nammuk dara ka-ang, Shawwiyi zunlawng, sanghpaw daru na Amerikan ni a Hka dap kaba hpe mung, 1941 ning, shata 12 praw 7 ya shani akajawng sha nbungli hku htim gasat dat sai. Dai re majaw, hpang shani jang Amerikan ni Japan hpe majan ndau nhtawm, hpyen n-gun hte ta tut htim gasat hpang wa sai. Bai nna, 1941 ning, shata 12 htum maga gaw. Yudiya mungdan e n-gun dahpran la nhtawm, Myen mungdan kata de mung Japan ni n-gun kaba hte htim kaput shang bang wa sai majaw, Miwa mung de karum rai htaw shalet jaw ai Yanggung-Mandale-Lashu lam kaba mung hten mat wa sai. Dai lam hpe makawp na matu Yinnan mungdaw kaw na du sa ai Miwa hpyenla sen mi tup mung, malawng maga Myen mung kata e arum ara rai si ru mat ai hkrum sai.

Japan ni gaw, Myen amyu ni nan shanhte hpang maga shang lawm taw nga sai re majaw, Myen mung hpe shata masum laman e Inglik Asuya a lata na yawng grawp di zing la kau lu sai. Inglik Asuya ni mung, gasat yu yang n dang ai chye jang, 1942 ning nnan daw laman, gwi wa hprawng rai Indiya mungdan de hprawng htingnut mat wa sai. Majan tsinyam si mang ni Myen mung jut shagu sumpum jawng nga sai. Myen mung ting rai yang, Jinghpaw ni chyu sha, Japan hpyen hpe Sumpra bum a lahta, Matsi hka kau, La-awn ga (Sumpyi Yang) kaw na n-shalai hkra, tinang a ladat hte gasat shingdang tawn lu nga ai. Japan ni gaw, Miwa mung hpe sinpraw maga hku dang la tawn lu sai zawn, sinna maga rai nga ai Myen mung hku nna mung, lahta Sammung hku, Manmaw hte Myitkyina kaw nna sinpraw maga hku, hkrawn shang wang matep bang wa sai. Yanggung-Mandale lam ngu ai n nga sai re majaw, Amerikan ni a karum wuntum hpe mung, Ledaw kaw nna nbungli hku mahtang Miwa mung, Hkunmin de n sim n sa matut htaw shalet jaw nga sai. Tsaw dik ai hkyen bum shagawng ni a ntsa hku pyen lai ra ai re majaw, dai masing hpe Htawfung nbung li lam ngu shamying da ma ai. Ledaw lam waw hpaw na htang tawn ai Hugawng pa e mung Japan hkrai hpring naw rai nga ai. Miwa mung de karum na mahkrun hpe pat shingdang ai lachyum rai nga ai.

Myen mung lahta daw hku Miwa mung de shang bang wa ai Japan ni gaw, Sakhkung hka sinna hkran, ahkyak ai mare kaba ni hte, bum marung kaba ni hkan e dahpran shangang nna dap jung taw nga sai. Dai mahkra mung Amerikan ni a karum wuntum lam n lu hpaw hkra bai shingdang ai masa hkrai rai nga malu ai. Lungling ngu ai gaw, Mangshi mare a lahta na lam ningmaw lai ang ai shara, moi prat na Miwa ni a hkaw dung ai mare usa langai mi rai nga ai. Lungling a dingdung de deng 40 gang ai shara e mung, Htinchung (Ju ga) ngu ai moi na Miwa ni a hkaw dung mare usa langai mi naw nga ai. Lungling hte Htinchung lapran, sinpraw maga Sakhkung hka mayan, marik marawk rai gran kazut nga ai gaw, Sungshan ngu ai bum shagawng rai nga ai. Japan ni gaw, mare kaba rai nga ai Htinchung, Lungling ni hpe zing madu tawn ai sha n ga, Sungshan bum shagawng kungring mahkra hpe mung, hpyen kaduk shagreng nna aten tup hkap dinggreng tawn da nga ai majaw, Miwa hpyen hpung ni gara hku mung n lu kahtep ma ai. Sungshan bum dabang gaw, sung dik ai Sakhkung hka krung lai di ai mawdaw a lam shagyit kaba hpe jum tek tawn ai shara re majaw, sinna mungdan masha ni pyi Sinpraw Malugya ngu she tsun shamying da nga ma ai. 1942 ning gaw, Myen mung hpe Japan a lata de tat sum kau ai shaning rai nhtawm, 1943 ning hta gaw, Japan hpe bai nhtang gasat na shajin shachyip ai shaning rai nga ai. Inglik Asuya gaw, Jinghpaw ni magrau grang ai marang e, tsam mari sharaw n-gup de n shang hkrup ai Putau mare kaw nbungli pa galaw nna, Dingdung Jinghpaw share shagan dap ngu ai Jinghpaw hpyendap hpaw nhtawm, Japan hpe yi ngam sharawt gasat hkrat wa nga sai.

Amerikan ni mung, lamu ntsa hku sha Miwa mung de aten galu hpyen rai alaw alam htaw lahka jaw na n loi ai re majaw, Miwa mungdan hpe Japan hpyen a lata na hkye la lu hkra, Ledaw kaw nna mawdaw lam hpaw let Hugawng pa de majan hpyen man kaba hpaw shang sa wa ra nga sai. 1942 ning hta Myen mung kata e, arum ara rai si ru ai kaw na lawt wa ai Miwa hpyenla angaw angam ni hpe, Putau kaw nna bungli hku Indiya de htaw shinggyin la masai. Miwa mung de hpyen rai htaw sa nna nhtang wa ai nbungli ni mung, Miwa hpyen rangrut ni hpe Indiya de htaw shalet la shajang ma ai. Japan hpe koi let, hkyen bum shagawng ntsa hku pyen lai ai re majaw, Indiya du yang, kau mi nbungli kata kashung si rawng taw ai ni pyi lawm nga ai. Lum palawng mung shanhte n iu ma ai. Grai tsaw ai hku pyen ai re majaw, kalang lang nhung gamyet n-gun yawm ai shara pyen lai ang nna, nbungli akajawng nem hkrat wa yang, kata na masha ni numgaw de baw adawt, bai hkrat wa nna shada gamyet, rai nbungli kata e pyi hkala nba naw hkrum nga ma ai. Shanhte a nshang e nbungli shingkyit kyit na mung n lu nga ai. Shing rai Amerikan AWSS 101 hpyen hpung, Amerikan Mehke Ase hpyen hpung hte Indiya mung e hpyen hpaji shagreng la ai Miwa hpyenla ni hpe Amerikan hpyendu kaba Shidwiwe (Gen. Stilwell) woi awn nhtawm, Ledaw lam hpaw ai masing hte hpawn, 1944 ning hta gasat shang sa wa sai. Inglik Asuya a matu Myen mung hpe bai lu la ra nga ai zawn, Amerikan ni a matu mung, Miwa mung hpe hkye la ra nga ai. Ndai masing kaba lahkawng awngdang lu na lam hta buga ginra masha rai nga ai Jinghpaw ni sadi dung dung, magrau grang grang hte aja awa apnawng gunhpai shakut shaja lai wa sai.

Shing rai Myen mung dingdung daw hta Japan hpe nhtang gasat ai majan, lapyin kaba wa ai hte rau, Miwa hkran Lungling-Sungshan mayan e lahkawng ning tup dap jung nga ai Japan ni hpe gasat shagrawt kau na hkinjang mung htuk manu taw nga sai. Ndai mayan na Japan hpyen hpe shagrawt kau lu jang she, Ledaw hpe lawan hpaw jahkrang la nna, Miwa mung sinpraw chyen ting hpe mung bai lu hkye la mai nga ai. Dai ten hta Amerikan ni woi hpareng ai hpyen hpung mahkra hpe ip mying hpra hpra jaw tawn ai. Miwa mung na Miwa hpyen hpung ni gaw "Y Fawrce" rai nga ai. Shanhte a mying madung chyawm gaw" Maigan majan rawt Miwa hpyen hpung" rai nga malu ai. 1944 ning, shata 5 praw 11 ya shani rai nga ai. Miwa maigan majan rawt Miwa hpyen hpung ni n-gun 32000 gaw, shawng numshawn hku nna Sakhkung hka nu hpe lani jan sha, danam shara lahkawng e kawa wawn hte kau mi, noikrat wawn hte kau mi rai rap nhtawm, Myen mung maga man yawng rawt sa wa masai. Sakhkung hka hpungla hte hpungwai ni e gayin kaboi shakyin ai lam gaw, yawng a shawng na mahkrum madup rai nga malu ai. Dai majan masing a matu hpyen n-gun yawng 115000 rai nna, shani shagu matut manoi hkan sa na hku rai nga ai. Dai hpang Sakhkung hka a sinpraw hkran, wut shakum zawn gran nga ai lungrawk lunghkram hku, summwi pyi she ka-up dumbat tawn hkra, lahpan 10000 jan tsaw ai bum shagawng kaba hpe mahkyit noi lung mat wa masai. Shanhte a masing gaw Lungling mare e 1942 ning kaw nna kazut rawng taw nga ai Japan ni hpe gasat shagrawt kau na lam rai nga malu ai.

Raitim Sakhkung hka krung hpe yu maja taw nga ai Sungshan bum pungding na Japan hpyen dabang hpe naw koi ra ninghkan, dai zawn lunghpra mahkyit shakut ai lam rai nga ai. Dai bum ntsa e Japan hpyen n-gun hkying shadang nna adak rawng taw nga ma ai. Bum kungring hkun jan ting hpe langai hte langai matut tawn da ai kaduk ni gaw, deng 6800 jan daram ram galu nga malu ai. Maigan majan rawt Miwa hyen hpung ni Lungling mare hpe, shata 5 shagawng kaw nna gasat hpang mat wa sai. Shani shana nsim nsa matut manoi gasat mat wa yang, lahkawng maga kala nba hte si ai lam laja lana rai nga tim, Miwa hpyen ni myit n daw ai sha gasat shakut ai majaw, shata 6 praw 10 ya shani padang dip la lu masai. Lungling mare lu la ai hpang, Maigan majan rawt Miwa hpyen hpung ni hpyen man lahkawng garan nna majan masing matut hpaw mat wa sai. Hpung mi gaw, Lungling a dingdung maga deng 40 tsan ai Htinchung mare de man yawng rawt sa wa sai. Dai hpung gaw Mia maigan majan rawt Miwa hyen hpung dapnu 56 ni rai ma ai zawn, Htinchung e kazut rawng taw ai shanhte sa gasat na hyen ni mung, Japan hyen dapnu 56 ni rai nga ma ai. Miwa maigan majan rawt Miwa hyen hpung langai mi gaw, "Hte Eastern Gibraltar" ngu tsun shalat tawn ai Sungshan bum pungding na Japan hyen dabang de man yawng rawt sa wa nga sai. Dai kaw na Japan ni gaw, dapnu 42 ni rai ma ai.

Dai mayan hku yawng hpawn deng 26 ting galu ai bum dinghkung ntsa ni hta, Japan hpyen kaduk dabang 1500-2000 daram jung da nga ai. Dai bum ni gaw, lahpan 12000 daram tsaw nna, wut bunghku sharawt shanat tawn ai zawn, ading jan rai nhkap la ai shara ni hta, nem ai sumwum kasha ni hte marau hpun kaji ni daram sha ateng apang rai kap tu shajang nga ai. Naw. 14th. Amerikan bungli dap ni mung, Sungshan majan hta lamu ntsa hku Japan ni hpe bawm sharu bun na shajin ala taw nga sai. Laknak kaba rai nga ai "75mm, 150mm, 76mm hawwitzers" myawk ni mung, tsan tsan kaw nna Japan hpe dum bun na matu, makau mayang bum ni hta shara la tawn nga sai. 1944 ning, shata 8 shang hpang wa sai. Sungshan majan hkyen shachyip lam hkum tsup sai hte maren, (Y-Fawrce) lagaw dap ni Sungshan bum a sinpraw hte sinna lahkawng maga hku mahkyit lung hpang wa ai hte rau, myawk kaba ni mung bum ntsa na Japan ni hpe baw n sharawt lu hkra matut manoi gap bun taw nga sai. Myawk gap bun taw nga ai hte jahtuk nna. ga lam hku him lung wa yang, kalang lang gaw, shanhte a baw ntsa makau mayang hkan e myawk pala ni hkrat kapaw ang nga malu ai. Amerikan nbungli ni mung lamu ntsa hku bawm sharu bun nga sai.

Myawk pala ni zim ai hte rau, lagaw dap ni akajawng him gasat bang wa sai. Japan kaduk de gumhtawn shang ai ni shang, wan pala ni hte gap je, ta bawm ni kabai bun, jak sanat ni hte gap dumbre di nna lahkam mi hpang lahkam mi, loi pyi n htingnut hkra shara kashun la mat wa sai. Agying agang gasat sham bang wanna, Sungshan bum dinghkung, ahkyak ai kaduk dabang malawng maga lu la kau mat wa ai hpang e, Japan ni ninghkap gasat ai lam angwi ngwi yawm mat wa ai majaw, Amerikan hpyendu kaba Gen. Dawrn hte shi a hyen jaubu ni gaw, "Ndai Japan ni yawng si htum sai rai kun? Yawng prawng pru mat ai mahtang kun? Machyu pala htum mat ai majaw kun?" naw sawn maram dinglik yu nga yang, Japan nbungli ni machyu pala hte malu masha sa jahkrat jaw ma ai. Rai tim, nbung jawng ni hkrat wa yang, bung e ahpawt kau ya ai majaw, Japan ni nga ai bum marung e n hkrat ang ai sha, kashai mat nna, Miwa ni mahtang she yawng atsai lu hta la kau ya nga sai. Shing rai tim Japan ni lata sharawt na kumla mi garai n pru hkraw taw nga ai. Lahkawng maga na si mang ni gaw, ga shingbut ni hte gayau gaya rai tarai jawng taw nga sai. Matut nna Y-Fawrce ni gaw, Japan ni hpe, bum dinghkung gyip dik ai marung gindai de yat yat wang matep shakyet shadang tawn nga masai. Japan ni mung Miwa ni hpe shanhte a kaduk makau htep htep shani sa wa na matu hpaji daw ai zawn byin nga ai. Shaloi Amerikan du kaba Hprengdawn a laksan hyen jaubu rai nga ai Zazen Hawrigrin namnyan daw ai hte maren, Y-Fawrce ni gaw, laban bat mi tup aten la nna, dai shara hpe matut wang shakyet tawn ma ai.

Bat mi na ai hpang, matut gasat hpang wa yang, Japan ni gaw, lahpan 40 daram grau tsaw ai kaduk kawng ntsa kaw nna, pu na Miwa Y-Fawrce ni hpe ta bawm ni nyen sharu bun bang wa masai. Mawta hte mung matut manoi gap bun nga ai. Galaw la ai bawm ni hte mung kapaw bun ma ai. Miwa ni chyawm gaw, htingnut ai lam n nga, tinang shada a si mang ni hpe kaduk shatai nna, htim lung tik tik rai nga ma ai. Si hkala ai law wa sai hte maren, shat shadu masha, gumra gawt masha kadain ngam hkra, sanat lang nna gasat gala lawm nga masai. Dapnawng up ai Miwa hyendu kaba wa gaw, shi a dapnawng ting rai yang, masha n-gun dapkung langai daram pyi n ngam wa sai hpe mu yang, shi a hpyenla ni hpe aming jaw ai lam gaw: "Share shagan ni, myit nden shaja mu! jahtum du hkra gasat na re. Myu hte mungdan a matu magrau grang grang hte asak apnawng lu ai ni mahkra, lupsung hku langai hta jawm makoi mayang hkam ga; Htim saga!" nga nna marawn jahtau wu ai. Sungshan bum ntsa na Japan ni ni hpe ni htim gasat ai gaw, shata 8 praw kaw na rai sai. Japan ni ta bawm htum jang, sanat chyawp nri hte mung, lata lahpum kaman hte mung, man hkrum hkrum htim galun amya hkat bang wa sai. Bat lahkawng tup nsin nhtoi nhkring nsa gasat mat wa yang, Japan ni shanhte sum nga sai hpe dum manu ai majaw, tinang kata na hkala masha ni hpe shawng gap sat sharu kau masai. Hpyen bawng hku rim zingri ya na n-ra sharawng nga malu ai. Shada da masha sat poi hku ang nga ai.

Bum dinghkung kaduk marung dingyang, lahkawng maga na si mang ni chyamut chyamat chyahpu chyayat, ginhka pyi n chye mat hkra hpring chyat jawng nga sai. Japan ni a matu Sungshan bum ntsa na hpang jahtum gam maka shajup na aten du wa sai. Lunghkrung lungrawk ntsa htap mali di galaw tawn ai kaduk langai sha ngam sai. Shing rai hpang jahtum marai mi sha gap noi shakre nga na share shagan masha lata taw ai madang rai sai. Dai ten hta Miwa ni gaw, dai lungrawk bum kaduk a npu sumlam e, ginlawng hku lahkawng hpe, shani shana nhtoi jahku ya tup, lahpan 22 sung hkra, nda hku krawk htu tawn lu sai. Dai hpang bawm yam kyin 1500 tup hpe dai nhkun yan hta anin jahpring nhtawm, kapaw ayai dat manu ai. Lungrawk bum ting mung, nhpu she mawng kapaw agrawp mani mat sai. Htap mali kaduk kata na Japan 42 dapnawng angaw angam ni yawng hpe mung, lungrawk lungkran kata galau dagup, magap ka-up, makoi shayup kau ngut sai. Mau na zawn n tau ai sha marai manga naw hkrung ngam taw nga ai hpe mung, shagrawt shatsim kau masai. Sungshan bum padang dip la lu ai gaw, 1944 ning, shata 8 praw 20 ya shani rai nga ai. Sungshan bum gasat poi hta Miwa hpyenla 7675 tup asak apnawng lai wa sai. Japan maga gaw 1500 daram hkrat sum ma ai. Lungling hte Sungshan majan kaba lahkawng rai yang, si sum ai masha jahpan gaw, lahkawng maga mau na zawn law dik la nga ai. Miwa maga de 37133 hkrat sum nna, Japan maga 13620 hkrat sum nga ai.

Miwa ni gaw si sum ai jahpan grau law tim, awng padang hpe lu la nga masai. Sungshan bum majan ngut ai hte rau, Htingchung majan bai matut hpang bang wa masai. Sungshan bum majan poi laja lana gasat nga ai ten hta, Myen mung de gaw, Myitkyina e kazut nga ai Japan ni hpe hpyen man kaba masum hku nna wang matep gasat nga ai. (1) Hkahku maga hku yu hkrat wa ai Jinghpaw hpyen hpung, (2) Hugawng pa maga hku shang wa ai Amerikan hpyen hpung; ndai hpung hta Jinghpaw ni gaw, V-Fawrce ngu ai ip mying hte shang lawm nga ai. (3) Dingda maga wanleng lam hku magawn lung wa ai Chindit Daphpawn hpung ni rai nga ai. Ndai hpung hta hpan grai gayau lawm ai zawn, Jinghpaw hpyenla ni manu mana lawm nang nga ai. Myitkyina hpe mung 1944 ning, shata 8 hta padang dip la lu nga sai. Japan ni gaw, Myitkyina a sinpraw maga hku hprawng htingnut hkrat wa ma ai. Shing rai Myen mung hkran hte Miwa mung hkran lahkawng maga na htingnut kahkyin wa ai Japan ni hpe Manmaw Gauri krung e hpaw la ai Jinghpaw Bum hpyendap ni gaw, Sammung lai hkra nhkring nsa gasat shachyut kau dat sai. Daw mi de Japan hpe padang dip magang, daw mi de Ledaw lam mung waw hpaw magang di mat wa sai.

Ning rai jawm shakut mat wa ai labau hpe nhtang sumru yu yang, Inglik-Amerikan ni hte hpawn, Jinghpaw ni aja awa shakut shaja lai wa ai lam gaw, Miwa mungdan hpe Japan a lata na hkye la na magam a matu shakut shaja ai lam she, ganoi malawng maga ang na zawn mu mada lu ai. ( Ning ngu tsun ai gaw, laika ka ai wa a tinggyeng ningmu sha re). Masat 2 Mungkan Majan a majaw, Jinghpaw ni lu la ai akyu ara lam ni mung nga ai daram gaw nga mali ai. Rai tim Jinghpaw ni matut shakut ra ai lam; dum hprang ra ai lam; myit mang shabawn ra ai lam; shading sharai la ra ai lam, labau hkringhtawng ginlen ra ai lam mung law law naw nga mali ai hpe sawn yu let, tsa ban 21 na labau lit kahpa galai na myu a shayi shadang ramma ni nlang hpe sawk tang madun dat nngai rai.