MUNG NNAN NSI NAISI MAJUN
NDING TAWNG RA
Wunpawng sha ni a htunghking makam masham hku nna, nsi naisi majun hpe salang ni tsun dan hkai dan ai lam hpe ka madun dat ai. Wunpawng sha ni a mam lu wa ai matsun maroi maumwi hte maren nga yang, moi hpan da ai Nga rawng Sagya wa hku nna, shi a kasa kaba, Jan wa Ningsang Tang hpe shalat da nu ai. Jan wa Ningsang Tang kaw nna, Kinji ma Ja Ra hte shi a numdu jan Jaring Bai Sang hpe bai shaprat sai. Dai yan a kasha gaw wundwi wunsau mam rai nga ai. Dai mam yan nau ni hpe ya dani shinggyim masha ni hkai sha nna hkru kat lu nga ga ai. Moi shawngde shinggyim masha ni gaw namsi namsaw hte nam nai ning-un ningbyen ni hpe sha sha nga ma ai rai na, lani hte lani lasi lamun byin mat wa ai shaloi mam n-gu nan sha ra sai hpe myit dum wa masai. Dai majaw Mahtum Mahta Jan Shata ni hpang de mam nli wa hpyi la lu masai da. Dai mam nli hpe mare shingnawm na nga wu lu kaw wa hkai da masai da. Nga wulu ngu ai gaw nga wuloini nga hkyi nga jit hkaw bang nna lagaw hte gabye gumchya da ai majaw, ga tsawm nam hpun rawng ai rai nna mam grai gaja nga malu ai.
Raitim mung dai prat na mam gaw mam kawp ahpyi n kap ai sha n-gu nsi si ai mam re da. Dai mam hpun daini du hkra Majoi shingra ga kaw naw tu nga ai nga ma ai. Nam hte mare matut ai shara kaw hkai da ai rai nna, nam de na sa wa ai ashu ashan ni, wa du wa tsa ni, woi sharaw ni, ubyit uzwi ni, hkaike, u hkring ni kam mara sa sha shajang ai hta n-ga, numlai numhprang rai ai shinggyim masha, u wa yamnga ni yawng mung sa maret sha shajang ai nga ma ai. Dai ari hpe n hkam lu ai rai nna, mam wa gaw kanu yan kawa Kinji Ja Ra hte Jaring Bai Sang hpang de wa mat sai da. Gaang masha ni mung dai lam hpe Mahtum Mahta ni hpang de shiga shana dat sai. Mahtum Mahta ni kaw na mung Kinji Ja Ra hte Jaring Bai Sang yan hpang de shinggyim masha ni kawsi hkrum yang n mai na re, mam hpe dinghta ga de lawan bai yu wa shangun na matu lajin dat sai nga ma ai. Kanu yan kawa mung wundwi wunsau mam hpe mam hpyi mam kawp shakap nna, dinghta ga de bai yu sa na matu shatsam sai. Dai majaw mam yan nau ni zuphpawng hpaw bawngban la nhtawm, shawng na lang hkrum hkra ai hpyen ni hpe manga lu na matu bungli lit ni hpe jawm hprai garan nhtawm, dinghta ga de bai yu sa wa masai nga ma ai. Shanhte hprai garan ai lit ni gaw lawu na hte maren rai nga ai.
1. Shani na ubyit uzwi hpe gaw wahpu wahpawk machya wajawng hie makawp na hku rai sai.
2. Shana na hte kaga lam hku makawp na manaw shingnan ni gaw: Nai—wa du wa tsa, du dumsi, yu ni mam hpe zingri ai kaw na hkyam sa lam lu na matu shingnawm lam nam, bung hkan asak a pawng lit la na nga sai da. Dai majaw, nai hpe shingnawm hkan nna nai hpra galaw ai re nga ma ai. Wa hkum, hkum hkye-Hpun kawa hku nna gau sa ai woi hkyeng woi gang ni gaw wa hkum si hpe sa sha nga ai a marang e mam hpe n sha na matu makawp maga lit la na nga sai da, Naw kyu si— Yi yang gata na punghkaw hpun du garet let mam sha hkyen ai, yu , kadu hka ni hpe adaw achyen sha pyi lit la ya na nngai nga sai da. Dai majaw shi hpe hpundu punghkaw hkan nna hkai ai re. Hkai nu—Ntsa malen hku pyen sa wa ai hkaike, u hkring, kadu hka kinshi shang hkaka la ni a hpyen kau chyen mi sha pyi manga kau hkra asak ap nawng na nga sai da. Dai majaw shi hpe shingnawm lam hte yi lam garet nna hkai ai nga ma ai. Ndai ni gaw hpyen hpe hkyam sa ya ai manaw shingnan ni rai nga ma ai.
3. shinggyim masha ni n-gu shat hpe sha ai shaloi, sha mu, sha ra, sha sau na matu garum ya ai manaw shingnan ni gaw , nambyen namwum, shaba ba hkri, shinglim shingtawn, latan saga, sap ring, sap bup, kumgyin gyin ka, shakau shanam gai yin gai byet, majap maprip ni rai nga ma ai.
