Laiwa sai ban prat law law ni hta Jinghpaw shayi numsha ni yawng mayawng hte gaw ri da maka hpe sharawng ma ai hkrai rai nna, yawng mayawng gaw ri da maka hpaji chye ai ni hkrai rai shajang ma ai. Shaning shagu, walang ginhtawng htawng jang rida maka labu bunghkaw, nhpye da maka ni hpe da kyin kyin rai ma ai. Dai hta n ga na da sing ai masha shagu ni gaw tsawm htap ai da maka ni hpe shawng da shapraw shatsawm jahtap da ai, da da nu majan Sumse Byinu hpe nja myit dum shajang ma ai. “Sumse Byinu” ngu ai gaw Zaiwa ga hku “Hpaji Ninghkring Hkawnji” ngu ai lachyum re ai. “Sumse” chye chyang kungkyang ai, “Byinu” Hkawnji ngu ai lachyum re ai.
Da maka ni gaw, yu yang she tsawm ai, raitim sharin chye la na matu loi ai amu n rai nga ai. Dai hta grau ai gaw, maka hpe shawng nnan tam da hpang ai hkrunlam she grau galu nga ai law!... Shawng nnan e, ginding ga ntsa e nga ai u nlang hte gaw, hpraw nsam tsawm lali ai u mun hte mawn sumli lang nhtawm, jan shingbut ga de manau dum sa lawm ma ai.
Bai u nlang hte gaw, shingrai mawn sumli lang nna jan shingbut ga de sa wa ma yang, nampu nampan amyu magup pu tsawm shajang nga ai tsit tsawm maling Kasung Bum kaw sa du ma ai. U amyu shagu nlang gaw, u myu shada hkau ra ai hte ganawn mazum let, dai Kasung Bum maling e, Lagat Ntsin zawn nga hkra mu ai nampu nampan ntsin chyup lu, namsi namsaw di sha rai sa hkring shajang nga ma ai.
Dai manau dum sa wa ai u nlang hte gaw, dai Kasung bum e, kawsi hpang gara shamai la nhtawm u amyu shagu myitngwi myitpyaw rai mahkawn hkawn ai ni gaw hkawn, ka manawt ai ni gaw ka manawt rai nna pyaw chyai shajang nga ma ai.
Dai Kasung Bum kaw nna bai sa wa yang gaw, shata shagan ga she rai mat hte maren, dai shana gaw dai bum kaw hkringsa na hkyen manu ai. Kasung Bum hte gade n tsan ai kahtawng ni hta gaw, kaman ngu ai kahtawng mung langai mi nga ai. Dai kahtawng e shanu nga ai Jinghpaw shayi num ni gaw, shaning shagu dai Kasung Bum de lahpaw lung htat htat rai ma ai. Lani mi n ten hta, Jinghpaw shayi hkawnsek lawlaw gaw htinga gun kau rai nna, Kasung Bum lagaw de sa du ma yang, bum bungding e bum pyi she ashun wa ai zawn nga hkra, u ni ngoi garu pyaw nga ai nsen hpe sa na dat ma ai. “Htawra daram na pyaw ai gaw, galaw ga de na yu-ngwi hpung wa mi sa shapyaw ma ai kun? She lung wa yu ga law...” ngu nna, shayi hkawnsek ni shanhte shada da tsun shaga hkat ma nna, da labu matu gaw pai de yawn, hkra de yawn rai lahkam lawan wan htawt let sa wa ma ai. Dai shaloi, shanhte bum pungding de sa du ma yang, u wunawng ni wa, ntsa malen e pyen gayin ai ni gaw pyen gayin; hpun ndung e sinkaw layit yit ai ni gaw yit; aga de bai rai jang, ga ntsa na u amyu ni yawng hta tsawm htum ai u amyu mi rai nga ai Utawng a hpang hkan nna, nmai gahpyen shara ai ni gaw gahpyen shara; Umung a hpraw nsam gaw hpraw ai, tsit ai, hkyeng ai, mut ai, mang ai, chyang ai baw amyu myu gayau ka nga ai u ni, nachying pyaw hkra hkringsa shajang nga ma ai hpe sa mu ma ai.
Dai Jinghpaw shayi hkawnsek ni gaw, dai u ni a hpraw nsam maka ni hpe sa mu ma ai majaw, mana maka yu gabu yu n-gun lu ma ai hta n ga na hpraw nsam dai ni hpe mala la nan ra mayu ma ai. Shingrai, shanhte gaw; “anhte shinggyim shayi hkawnsek ni da ai da labu mung, maka shade hkum, hpraw nsam shade tsawm ai labu rai taw gaw, gade she tsawm htap na wa law!” nga nna, marit shingni ga tsun let, lahpaw lit li ai pyi n dum hkra nja nhpra rai bai nhtang wa mara ai. Shayi hkawnsek ni gaw, shani shanhte sa mu hkrum ai lam, mare na shayi numsha manang ni yawng mayawng hpe dandan prapra wa tsun dan ma ai. Dai majaw, shanhte gaw Sumse Byinu hpe myit dum dat manu ai.
Kasung Bum kaw nna sa wa yang, nhtoi mali shi ya jan hkawm ai ga de, Htingnu ngu ai mare langai mi nga ai. Sumse Byinu gaw dai Htingnu mare e nga ai, Laingu ga hta mying danhkung ai, shayi numsha dada ninghkring rai nga lu ai. Kaman kahtawng na shayi hkawnsek ni gaw, shanhte Kasung Bum de sa mu la ai lam ni, dai dada ninghkring Sumse Byinu hpe sa tsun shana dan mayu ma ai majaw, shayi num ni nlang hte hte jawm bawngban ginrat nhawm, myit hkrum mangrum rai, Ban Yung yan Ban Htoi hpe Laingu ga de, dada ninghkring hpe sa saw shaga la na matu dat gasa shalai mu ai.
Kasung Bum hte Laingu Bum a lapran e gaw, sung kaba dik ai hka-nu langai mi din nga ai. Dai hka-nu hpe gaw Kasung hka-nu ngu mu ai. Ban Yung yan Ban Htoi gaw, nta buga na manaw manang ni hte chyu jaw chyinghkai nu wa myitsu salang ni a shawang amyit hpe n myit mada gawm kau shangun hkra ngu nna, sumtsan lam e hkarum ai ruyak kyindut ni hpe pyaw hpa shatai kau nna Laingu ga de sa wa ma ai. Singrai sa wa ma yang, Ban Yung yan Ban Htoi shannau gaw, nhtoi sumshi ya sumshi na hkawm ai hpang, dai Kasung hka makau de sa du ma ai. Raitim hka nau sung, nau kaba, hpungla nau ja, mahkrai hkrai tawn ai mung n mu, ganing di n lu rap lai ai majaw, myit ru myit yak ai hte hka hku de mahkrai tam ngu nna bai lung wa ma yang, hka makau de galaw tawn ai hkarang yihku na yiwa langai mi hta sa du ma ai. Shaloi dai yiwa kaw, paishau bunghkaw hkaw, shanhpyi n-ga hpye, lachyit nhpye hpye, nhka mun gaw bainam nhka mun zawn rai nna ahpraw re ai dingla langai mi hte sa hkrum ma ai. Dai dingla gaw Ban Yung yan Bai Htoi sa wa ai hpe mu jang, shi shingnoi janghpa hkrai nga ai hpe mu jang, shi shingnoi jinghpa hkri nga ai lata jahkring kau nhtawm, grai yu masan dum ai ga manawng hte hkap san u ai.
“Goi Law! Ashu shayi yan gaw ganing rai nme gara ga nna ganang ga de sa wa myit ta?” Shaloi Ban Yung yan Ban Htoi gaw, shan lahkawng gun ai lit hpe shada hpai shayu hkat let, yiwa shakum kaw shanat tawn da nna, grai a-na ai hte, “an gaw Kasung hka mahkrai tam hkawm ga ai law!” ngu nna tsun dan jang, dai dingla gaw shi hkri ngam tawn ai jinghpa hta lang yu let, ning nga bai san u ai.
“Shu shayi yan e, nan gaw gara buga ni rai myit ni?” “Kaman kahtawng na shayi sha yan rai ga ai law”
Ban Yung yan Ban Htoi shing ngu tsun dan let, dada ninghkring hpe sa gun jaw na ngu nna gun ai jahkrat chyaru dinghkru mi ru la nhtawm, Jinghpaw amyu ni gumgai dingla, myitsu salang ni hpe hkungga jaw ai lai lang nna, ta lahkawng a manga dung yunglat hte hkrak jum nhtawm: “Hkungga lara ai jiwi e, maw, ndai ruhkrat lu yu u, mu n mu n chye” ngu nna, dai dingla hpe ruhkrat sa jaw lu ma ai. Shaloi dai dingla gaw, Ban Yung yan Ban Htoi Jinghpaw amyu ni a htunghking lang nna shi hpe hkungga jaw ai laikyang hpe yu ra sharawng ai majaw, ruhkrat dinghkru hpe ta lahkawng hte hkap la let, “goi law! rai sa! Chyaru mi she nu gaw e!” nga tsun u ai. Dai dingla gaw Ban Yung yan Ban Htoi a shingnoi hta udi tsahku htep lahti di baw gun ai hpe mu chye ai majaw, shayi numsha yan hpe akri akrai di bai san yu u ai.
“Ngai shu nan gaw mayu jahkrum sa ai n rai mani? “N rai ga ai.” “Dai re nan udi nbaw shat shadu gun, tsa jahkrat gun rai nna, galaw ga de sa na ngu myit mani?” “An lahkawng gaw Laingu Bum ga na Htingnu mare de sa wa ga ai law!” “Goi law! Dai daram tsan ai ga de mi, hpa baw amu ra nna sa wa myit ta?” “An lahkawng gaw Kasung ga na Kaman kahtawng e nga ai shayi num ni yawng, da maka hpe chye mayu ma ai majaw, shayi numsha dada ninghkring Sumse Byinu hpe sa saw shaga la nna, ri da maka da sharin ya shangun na matu, dai Htingnu mare de sa wa ga ai. Dai re Kasung hka ganing di n rap lai ai majaw, myit mau ai hte hka kau de dam garet hkawm ga ai law!”
“Ngai shu shayi yan e, Kasung hka rap lai na matu gaw mana maka yak ai, anum ala n nga, share shagan myit sha n rawng ai ni gaw, n lu rap lai ai. Nan gaw num ma yan re ai hte, yi gwi rap na ma ai kun? Raitim, nan lahkawng hpe tsun dan yu made.” Dai dingla gaw n hka mun masawp let ning nga bai matut tsun u ai.
“Ndai kaw nna hka kau hkan let yu wa yang, jan daw mi hkawm ai shara e, kaba ba law ai lagat hpun ni ading ren rai tu nga ai. Dai lagat hpun ni hpe hka hku de nna hti yu wa yang, lagat hpun nhpang matsat wa hti du, hka nam de nna hti lung wa yang mung, nhpang matsat wa hti du ai lagat hpun gaw, Kasung hka mahkrai shatai ai lagat hpun rai sai.”
Ban Yung yan Ban Htoi gaw, dai dingla tsun ai ga hpe grai na kabu ma ai majaw, n dum shamyi rawt tsap dat nna, dai dingla hpe san yu ma ai. “Jidwi! Dai kaw mahkrai nga a ni?” “Garai hkum rai, ngai naw tsun dan yu made.” Dai dingla gaw, ahkye re ai sha-ji mayen prat kau, shi a ahpraw re ai nhka mun galu kaw gamang kap taw ai sha-ji mayen hpe, pali shit hka hkrai hkrai re ai, pai lata hte gatsut kau nhtawm, dai mahkrai shatai ai lagat hpun gaw ganing re ai lam hpe bai tsun dan u ai. Ban Yung yan Ban Htoi mung myit maju jung ai hte dai dingla tsun ai ga hpe madat nga ma ai.
“Dai yang e tu ai lagat hpun ni a hpun lakung gaw, wawra hkran de na hpun lakung hte ndai hkran de na hpun lakung hka kaang ntsa kaw ladawn dep hkat nga ai. Shingrai, Wawra hkran de na lakung hte ndai hkran na lakung, hka ntsa e hkrai tawn ai lamu mahkrai zawn rai hkrum matut hkat nga ai majaw, dai Kasung hka kaw lai ai masha ni gaw, dai lagat hpun lakung hpe sha mahkrai shatai nna, lu rap lailai rai ma ai.” Dai dingla gaw, ta loi sha pyi n jahkring ai jinghpa hkri ai dingyang, ga tsun ai mung dingyang rai nga u ai.
Raitim dai yang e tu ai lagat hpun yawng hpe gaw mahkrai mai shatai ai hkrai n rai nga ai. Dai hka hku hka nam de nna hti wa ai shaloi, nhpang matsat wa hti ang ai lagat hpun hpe chyu sha Kasung hka rap na mahkrai mai shatai nga lu ai.”
Dai dingla shing nga tsun ai hpang, pai lata hte nhka mun hpe nhka kaw prat di masawp shakap dat nna, sha-ji mayen prat kau, mayu sharai la di nhtawm bai tsun u ai. “Dai mahkrai shatai ai lagat hpun a tawtap e tu ai lagat hpun hta gaw, samyen ru nhpang mi tu nga ai, dai samyen ru gaw wawra hkran na lagat hpun lakung kaw nna ndai hkran na lagat hpun lakung hta ru jahkap taw nga ai, shingrai dai lagat hpun e ru nga ai samyen ru hpe, “Samyen ru mahkrai” ngu ma ai.”
Jidui dingla ndai kaw tsun du ai hte, bum maling e woi ni wau ai hpe na dat u ai majaw, woi ni wau nga ai bum de mada yu nhtawm masha ni dai “Samyen ru mahkrai” rap ai shaloi, woi ni sa baila la re ai lam bai tsun dan wu ai. “Oh! Bai lam mi rai jang, Kasung hka mayan e gaw woi ni grai law la nga ai rai nna, dai “Samyen ru mahkrai” hkan sa noi gumbyau ashun shun rai ma ai majaw, ahkying aten hpe naw yu yu rai nna rap ra ai, shing n rai yang gaw dai kaw masha ni rap sa wa ai shaloi, dai samyen ru hta woi ni e sa ashun dat jang, Kasung hka e dihkrat yawng si mat na makran shara nga ai.”
Ban Yung yan Ban Htoi gaw dingla tsun ai ga dai hpe nachying na hkrit gajawng ma ai majaw, shannau shada “ganing di sana kun? ngu myit n pyaw ai myiman madun hkat nhtawam, dai dingla hpe azin ayang san yu ma ai. “Hkungga la-ra ai Jidwi e, woi dai ni hpe n lu shachyut kau na kun?” “Dai gaw shanhte anga nga ai shara re majaw, woi dai ni hpe shachyut kau na gaw loi ai amu n rai nga ai.” Dai dingla gaw ya sha hkri ngut kau ai jinghpa hpe ngang n ngang nga gang shajen yu let lamu de mada yu na, bai tsun dan u ai.
“Woi nlang hte hkringsa mat ai aten laman gaw, dai “Samyen ru mahkrai” rap na aten kaja rai sai. Raitim aten dai hte hkrum na mung tsawmra naw yak ai. Ganing rai nme law nga yang, dai woi gaw ajan hte marang gasat hkat wa ai hpe sha hkrit mu ai majaw, lunghkrung, shing n rai sumwum hkan hprawng shang mat wa chye ma ai. Dai shaloi yang e sha alawan lu rap lai nga ai.”
Ban Yung yan Ban Htoi gaw dai dingla a ga hpe myit na pyaw ai hte shada mada yu let, “rawt sa wa yu sana nhten?” ngu ai myiman madun hkat nhtawm, tsa dinghkru mi ru la nbaw shat makai mi shaw la, udi hkum lahkawng hpaw la rai nna, grai hkungga ai hte dai dingla hpe jaw let, “hkungga la-ra ai Jidwi e, lai nna kumhpa kaga n chye jaw da ga ai, raitim, an shayi numsha yan gaw Jidwi na a chyeju hpe gaw galoi nhtoi hta rai timung n chye malap kau na ga ai law!” ngu nna chyeju dum ai ga tsun kau da nhtawm, myitngwi myitpyaw rai, dai “Samyen ru mahkrai” tam sa mat wa masai.
Dai Jidwi dingla gaw sha-ji pa prat kau nna, wanmang makau e shadun tawn ai hka-tu na ntsin hte n-gup garu kau ai hpang, hkatu na ntsin bai maum la nna, mi yat sha hkri ngut ai jinghpa, hpa-lap hte hpana kaw ahprup bun nhtawm, hparit atsawm sha shawn bang nna, Ban Yung yan Ban Htoi hpe kumhpa jaw let, tsawra lanu lahku ai ahte hkan shaman jaw dat wu ai.
“Ngai shu shayi yan e, nan lahkawng gaw hpa mung n hkrum n hkra ai sha du mayu ai shara de du hkap lu ai hta n-ga, ndai jinghpa hte Kasung Kaman ga de na shayi num ni shangun dat ai amu hpe awngdang ai hte lu gun shangun mu ga law.”
Ban Yung yan Ban Htoi gaw dai Jidwi dingla tsun dan ai hte maren, Kasung hka kau hku hkan nna yu wa ma yang, jan dawmi hkawm ai shara e, kaba ba law ai lagat hpun ni tu dingren shajang nga ai hpe sa mu dat ma ai. Dai lagat hpun ni gaw samyen ru ru lung nga ai nhpang mahtang she law nga ai. Ban Yung yan Ban Htoi gaw, “Langai, lahkawng, masum, mali...” ngu nna, dai lagat hpun ni hpe nhpang langai mi pyi n hti jahkrat kau hkra langai hte langai hti yu wa nhtawm, matsat ngu wa hti du ai lagat hpun nhpang kaw lungpa langai mi jawm hpai mara da mu ai. Shannau gaw dai kaw shingrai matsing tawn da ai hpang, hka nam de lai yu wa nhtaw, hka nam de wa du jahtum ai lagat hpun nhpang kaw nna, “langai, lahkawng” ngu nna bai nhtang hti lung wa ma yang, nhpang sanit sha naw hti du ai lagat hpun hta lungpa mara taw nga la ai hpe wa mu ma ai, shaloi shannau gaw lam nau hkawm ba ai majaw hti shut sai nhten, ngu nna bai nhtang yu wa nhtawm, npawt kaw nna bai hti lung wa ma yang, dai lang grau nhpang manga kaw sha naw hti du ai lagat hpun hta lungpa hta mara tawn nga la ai hpe wa mu dat ma ai majaw, grai mau ma ai. Raitim dingyang hti lung wa nna, nhpang matsat wa hti du ai lagat hpun kaw, shagawng uri mun langai mi hta tsat matsing kau da nhtawm, bai lai lung wa ma yang, woi ni lagat hpun hta lungpa jawm hpai mara nga ma ai hpe wa mu ma nna, jahtau marawn dat jang, dai woi ni gaw hpun maling de hkrai hprawng shang mat mu ai. Ban Yung yan Ban Htoi gaw dai shaloi she woi ni e shan lahkawng hpe hkan abai ai lam hpe chye la lu ai majaw, mau ai myit n rawng masai.
Dai hpang shannau gaw hka hku de wa jahtum ai lagat hpun nhpang kaw nna, nhpang mi pyi n hti shut hkra kangka ai hte bai hti yu wa ma ai. Shaloi lagat hpun nhpang shagu hta shagu hta uri mun tsat tawn nga la ai hkrai re ai hpe bai wa mu nna, woi ni e bai sa jehpre hkawm ai hpe chye lu sai majaw, woi ni e bai n sa lu jahten kau na hku di nna, nyan hpaji kaga langai mi daw ma ai. Shan gaw lagat hpun nhpang matsat wa hti du ai shaloi, kara singkawng mi baw la nna, dai lagat hpun hpyi hta gyit shakap da ma ai. Dai hpang hka nam de nna bai sa hti lung wa ma ai rai yang, shan lahkawng kara sa gyit shakap matsing da ai lagat hpun hta nhpang matsat hkrak wa lu hti shaang ma ai majaw, n dang tsun hkra kabu ma ai.
Ban Yung yan Ban Htoi gaw dai shaloi she kawsi hpang gara ai hpe n dang hkam ai majaw, dai lagat hpun shinnyip kata na, Kasung hka du hkra dingsang nep tawn ai zawn re ai lungbyen ntsa hta, nbaw shat makai hpyan sha, udi baw sha, magyep tsa hku lu chyai di nna myit mu ai hte hkringsa nga ai. Woi ni gaw dai samyen ru hta n-goi goi chyai nga ma ai; kau mi gaw Kasung hka kaang e noi abya taw ai samyen ru hta noi yu wa nna ntsin lu, man myit di nna hka gajam chyai shajang nga ma ai. Woi kau mi gaw shannau shat lu sha sha nga ai hpe makau grup-yin na hpun ndung de nna, hkumbai pyi lalam lam abya hkra asoi yu nga ma ai. Shaloi Ban Htoi gaw Ban Yung hpe, “Ashawng! Woi ni ruhkrat grai lu mayu sam ma ai i?” ngu san u jang, Ban Yung ning nga htan tsun u ai.
“She lu mayu le... Woi ni mi masha ni sha ai baw hpa mung chye sha ma ai. Kaba ai ni tsun yang, Kasung hka mayan e nga ai woi ni gaw grai ju la ma ai da. Moi shawng de mayu jahkrum sa ai nga nna, ndai hkan lai ai ni a chyaru, udi nbaw shat pyi hkap gashun sha kau ya ya di ma ai da. Dai majaw, kalang lang chyaru lu na ai woi langai ngai pyi lu rim la ma ai da.” Ban Htoi gaw Ban Yung tsun ai ga dai hpe na hkrit ai majaw, shi hkum chyahkring mi chyajun dat nhawm mani sai bai di let, “Ashawng annau mung woi ni hpe ruhkrat jaw lu shanang tawn nhtawm, alawan rap lai mat wa ga le” ngu tsun dat u ai. Shaloi Ban Yung bai tsun ai gaw; “dai daram law ai woi wunawng ni hpe wa mi, annau gun ai ruhkrat hte sha gaw ganang lu jaw shanang tawn lu na law e! Bai rai jang dai woi ni hpe jaw kau sayang gaw, Langu Bum ga na jinghku ni hpe sa jaw na kumhpa n lu mat sai. Dai hta n ga chyaru gaw anhte jinghpaw ni makyin jinghku jahkrum, sumtsan ga na manam ni hpe hkap hkalum, num jaw num la re ai nhtoi hta shada hkungga dat hkat yang, nachying ra ahkyak ai kumhpa myu mi rai nga ai, dai re majaw, annau gun ai ruhkrat hpe gaw n mai lahpawt kau na re, dai rai nna, Jidwi dingla tsun ai hku she naw la yu ga.”
Ban Yung shing nga tsun jang, Ban Htoi gaw mali hka nsam hpe sha mu ai lamu de mada yu nna; “Ashawng htaw lamu de she yuyu u, samwi hkyep mi pyi n kap yang, ganang na marang sa htu ya na rai? Jan mai marang galoi she htu hkrat wa na rai? Ngai gaw n dang la wa ni ai!” ngu tsun let shi lahput hta labu sharai magap dat nna, Kasung hka maga de man yawng nhtawm, hka hpungla kun kun rai lwi nga ai hpe yu chyai let dung nga ai. Shaloi Ban Yung mung shi makau de sit dung dat nhtawm, gahtan kaw abya hkrat wa ai kara masawp shalun dat ya nna, tsawra lanu lahku ai hte kanau hpe dating ai myit rawng ra ai ga woi tsun wu ai.
“Tsawra nau e, wawra Kasung hka hpe she yuyu u, hka gade kaba ai, hka hpungla gade she ja ai; Samyen ru mahkrai hta mung, woi ni she masha ni e sa shachyut yang pyi n hkrit ai ding yang ashun chyai nga ma ai. Shade makran ai wa ganing di rap lai mat wa na ra? Bai rai jang, shingrai ruyak ai ngu nna, “shan lu mahka na hpunggun daw” di nna lam lapran kaw nna bai nhtang wa yang gaw, Kasung Kaman ga na shayi num ni hpe she n kabu gawm shangun na i? Dai majaw, ganing re ai ruyak kyindut hkrum tim, da maka hpe garai n lu da la la gaw, sumtsan lam ndai n hkrang hkrang gaw hkawm ra nga ai. Shing n rai yang gaw, nta buga de nga ai manang shayi num ni chyu sha da maka labu n mu bu na n rai, anhte Jinghpaw shayi numsha nlang hte, mungkan ga hta tsawm htap ai da maka labu n mu bu na rai nga ai. Bai rai nna, da maka labu n lu da bu yang gaw, anhte Jinghpaw shayi num ni gaw madu a hkum gawng shingyan gade tsawm tim ya na hte maren, gade tsit tsawm lali tim nampan n chye pu ai nampan hpun hte sha abung nga na rai nga ai. Anhte shayi num ni a hpraw nsam hpe n galai shatsawm la ai sha, ya prat na zawn she anga nga yang gaw, ura makau e tsap ai u kanu hte sha bung nga na chyu sha rai nga ai. Shing rai sha she nga pra hkrat wa yang gaw, shayi shadang sha ni yawng a hpung shingkang chye rawng wa na n rai nga ai. Dai hte maren, annau gaw gade kaba ai ruyak hkrum tim, Kasung Kaman ga na shayi num ni a shawang amyit hpe n mada gawm kau shangun na hku di nna, Jidwi dingla hkan shaman jaw dat ai hte maren, dada ninghkring sa shaga na mung lit ndai hpe hkrak gun hpai shangut ra ai.”
Ban Htoi gaw jit mung n nga ai dagup dung nga nna, Ban Yung tsun ai ga hpe atsawm sha madat la let, lungbyen ntsa hta hkrat taw nga ai lagat hpunlap hpe labu palawng kasha galaw la nhtawm, shi shingna kaji hte galaw la ai masha sumla kasha hpe jahpun chyai ya nga ai. Dai hpe Ban Yung mu nna; “Ban Htoi! Nang chyawm gaw ma pyi tsawmra gan shangai tawn da nit dai i!” nga nna tsun jang, Ban Htoi gaw; “Hi hi” nga mani let gaya dum ai majaw, dai masha sumla kasha ni hpe Kasung hka kaw hkrai gabai bang dat wu ai. Shaloi, lagat hpun na samyen ru hkan dung jawng nga ai woi ni gaw, shanhte hpe gabai dat ai zawn nawn nna, ganoi di hkrat wa hkra gajawng ma ai. Ban Yung gaw dai lam hpe mu nna, shawng de kaba ai ni hkai dan ai, woi ni hpe ganing di shachyut kau ai maumwi hpe myit dum dat nna, Ban Htoi hpe hkai dan wu ai.
“Moi shawng de, Hkaimu Tu ngu ai wangan langai mi gaw, yi grai chye hkyen sha ai majaw, shaning shagu hkaimu law law lu la wu ai da. Dai Hkaimu Tu gaw, bum de hkrai hkainu yi sa galaw law re ai da. Shaloi laning mi e, woi nau ju la ai majaw, hkainu yi de mahkam sa hkam tawn nhtawm, mahkam hta woi langai mi lu jang, nam de wa tau si mat nu ga ngu nna, shaje shamya re ai labu palawng jahpun ya rai dat dat wu ai. Shaloi, woi nkau mi gaw woi dai hpe hkap yu hkrit ai majaw, shingna hpe pyi n hkan mu dat hkra hprawng gadap mat wa ma ai. Dai hpang, Hkaimu Tu a hkainu yi hta shaning shanang woi ni n wamk sa mat manu ai da.”
Dai shaloi yang e, saup saap nga nna gahtet wa ra ai. Lamu de mung muthpraw muthpaw re ai wamwam samwi kap wa ra ai. Kasung hka na nga ni mung “Hprunghprang” “Hprunghprang” nga nna, lalam jan tsaw hkra hkra gatu garu rai pyau gumlawt nga ma ai. Nau gahtet ai majaw, woi ni gaw lagat hpun ndung shingnip kata e, myit mi n rai shada da shakrat yu ya hkat let, bungli shalawt nga ma ai.
Ban Htoi gaw Ban Yung hkai dan ai maumwi hpe kaja wa na ra nna kabu ai majaw, ganing re ai nyan gada yang she woi langai mi lu rim la na kun? nga nna myit sumru dung nga ai. “Ashawng! An mung woi langai mi hkam la nhawm, dai maumwi hta tsun ai hku galaw nna alawan rap lai wa ga le” “Nang hkum sintawt u, nang htaw lamu de yuyu u, lamu nip wa ra ai, marang lau htu sai.” Ban Yung shing nga tsun ai hpang gade n na yang, jan mai marang htu wa ra ai, n-goilatum mung pru wa nna wa-kawng mahkrai zawn rai Kasung hka ntsa e hkrai tawn da sai. Ban yung yan Ban Htoi mung, Kasung hka rap lai na hkyen masai. Ban yung gaw jan mai marang htu wa ai kaw nna, dai samyen ru mahkrai hkan nga nga ai woi ni galoi yen mat wa na ma ai kun nga, myi kalang pyi n grip ai azi yu nga nu ai. Dai woi utsa hkrat rai wumwum re ai hpun ndung kaw shang mat wa manu ai. Shaloi Ban yung jaja san nna samyen ru mahkrai hta yu nga ai myiman hpe atsang sha di Ban Htoi maga de gayin dat nhtaw, Ban Htoi hpe lit gun hkyen shangun wu ai.
“Ban Htoi! Daini gaw Kasung hka lai na aten nhtoi kaja rai sam sai, shingnoi jinghpa hte shingnoi magap mung chyipchyip di sharai magap u.” Ban Htoi gaw galoi raitim kana Ban Yung a shangun ga hpe madat la ai shayi numsha re ai majaw, shi kana tsun ai hte rau, ashawng shara rai shingnoi jinghpa alawan galaw sharai gyit shangang kau wu ai. Shing rai ngut jang, Ban Yung yan Ban Htoi gaw shannau shada lit hpai shagun hkat nna, lagat hpun hta lung wa ma ai. Dai re shannau lahkawng ga de nna pyi dep masawp daram re ai hpun lakung hta sha naw du lung wa ai shaloi, lamu asan awan sha rai bai hpawng mat ai. Lamu bai hpawng wa ai hte grai bai sawng wa mara ai majaw, lani mi na tingsa ajan bai shagu kau manu ai.
Dai hpang shani e, Ban Yung gaw ugan masum lang sha naw goi yang yup rawt nna, “nhtoi gaw masha hpe matsan n chye dum ai, lani hte lani lai mat wa nga ai. Kasung hka ndai galoi she lu rap lai na kun?” nga nna myit ru dung nga let, Ban Htoi hpe sinda kaw nba jahpun ya u yang, shi ta hpe Ban Htoi akajawng hkap magra shingdang tawn nna, “Lu rim sai law! Lu rim sai law!” nga nna, myiman hpe yu dat yang grai tsawra matsam yu dum mat ai majaw, shi na kajawng tim shi a ta alawan n wam dawm la kau wu ai, shi a kanau “su, su...” nga bai yup pyaw mat wa nna, ta akya sha di hpyan dat jang she, shi a ta yat sha dawm la nhtawm, sinpraw bum de htoi pru wa ai sawmrawm ninghtoi hpe mu wu ai hte, shi a shingkyit hta gyit noi lang ai maka ririt raw la nna, dai ririt hta makyit langai mi bai makyit jat nna hti yu nga ai.
Ban yung yan Ban Htoi gaw, shawng nnan rawt hkawm wa ai shani kaw nna, shani shagu jahpawt shagu dai maka ririt hta makyit langai ngai kyit jat nna, bu hkawm nhtoi hpe matsing tsing di ma ai. Ban Yung hti yu yang, dai shani du yang ri makyit sumshi sanit du nu ai. Dai hpang Ban Yung gaw ri makyit hpe pai lata na ta lakran kaw tsat noi tawn nhtawm, ta lahkawng hte nhka madi nna, shawng hpang na hkawm sa lam hpe myit sumru yu nga ai. Dai hpang Ban Htoi hpe yat sha jasu la wu ai. “Ban Htoi! Annau sumtsan lam rawt mat wa ai hpang dai ni gade ya rai wa sani?” Ban Htaoi gaw jasu ai hta ngoi rai rawt wa let Ban Yung maka ririt makyit lang nga ai hpe mu nna shing nga rawt san jang, Ban Yung gaw maka ri makyit hpe shi a sumpan hkyeng shingkyit hta bai gyit noi dat let; “daini gaw annau nta buga de na rawt hkawm mat wa ai hpang, nhtoi sumshi sanit ya du sai” nga tsun dan nhawm, jahpawt shat woi sha nga u ai. Woi ni gaw lagat hpun ndung de nna, bai asoi yu nga ma ai hpe mu dat ma ai. Shaloi Ban Htoi gaw dingsang di nna, woi ni hpe udi baw sha dan, ruhkrat lu dan rai nga let Ban Yung hpe ning nga tsun wu ai.
“Ashawng! Woi langai mi hpe shalen rim la nna, she datdat yu ga law!” “Mai gaw e! Woi kaga rim la na pyi n ra ai, mana nang lu rim da ai woi hpe datdat jang rai sai le!” Ban Yung shing nga tsun jang, Ban Htoi chyahkring mi gan mau mahka mat nna tsun ai; “taw! Ngai galoi lu rim la a ni? “Reng, nang yupjawp jawp ai shaloi pyi ngai hpe tsun dan sai le!” “Oh! Re, ashawng, kaja wa ngai woi langai mi mu rim la ai yupmang mu nngai.” “Mai sa! Na a yupmang dai chyawm mi yupmang kaja rai re ai, she chyam yu ga.”
Ban yung yan Ban Htoi gaw dai lungbyen ntsa e, nbaw shat makai mi tawn da ya, udi tawn da ya, ruhkrat kedok lahkawng shadun tawn da ya di nhtawm, dai shara hte gade n tsan ai lagat hpun nhpang kaw nna, sa lagyim yu nga ma ai. Ban Htoi gaw woi ni tsa lau lu na masai, nga nna nsa pyi n shaw hkra azi yu nga ai; Ban Yung gaw “Myit mada ai ku yi lu byin na kun? Lama lu rim la jang ganing di na? Udi tsa hku sha lahpawt kau nhtawm, myit ai kaw n du lu yang ganing bai di na?” nga nna, hkum ting salat she grit rai myit pu ai hte yu nga ai. Shaloi dai woi ni gaw, Ban Yung yan Ban Htoi hpe n mu mat ai hte di hkrat si na hpe pyi n tsang hkra gumhtawn yu wa ma nna, dai lusha ni hpe gashun gashe rai sa gashun sha nga ma ai. Grau kaba ai woi mahtang gaw, shi hkrai sha ruhkrat kedawk langai gashun hpai la nhtawm, woi kaga langai sa gashun jang langai hpe gawa jahkrap dat dat di nna, shi hkrai sha hkru hkru lu shajang nga nu ai. Woi dai gaw ruhkrat kedawk mi lu ma kau nna, kedawk hku kaw manaw yu, kedawk htumpa de nhtawng yu di let gapyi gapap rai wa nu ai.
“Ashawng! Woi wawra ruhkrat lu nang nu ai!” Ban Htoi gaw nau kabu ai majaw, n dum shamyi marawn shaga dat wu ai. “Garai hkum rai! Jit mung n nga ai lagyim sa nna sa rim la ga, dai jinghpa hkyen lang u!” Ban Yung yan Ban Htoi gaw, dai tsa lu nang nga ai woi hpe sa rim la nna, Jidwi dingla kumhpa dat ai hpa-rit hte lagaw lata gyit ahkang tawn ya, baw hta ntsa labu hte dinggrum tawn di nhtawm, shannau bu hkawm lam e galai hpun na nga gun ai palawng lam mi jahpun, sumpan hkye shingkyit hpe labu shatai nna bu ya rai, Ban Htoi galaw chyai ai masha sumla kasha zawn di mawn sumli ya nna, dat dat ma ai. Shaloi dai samyen ru mahkrai kaw dung gunjup shajang nga na ai woi ni gaw, dai woi hpe masha ni shanhte hpe shachyut shangun ai zawn nawn ai majaw, numla n rawng ai zawn nga hkra, woi dai shanhte kaw hkan kagat nang magang, shanhte grau hprawng mat masai. Ninghkaw ajan gaw kawa yan mi daram dang tsaw sai. Shingrai, alum ala nga ai jan lagaw gaw, Kasung hka mayan ting chyam hkra htawng hkra wa sai. Dai yang e tu shajang nga ai hpun kawa maling ni mung grau aningtsing sek lasau rai tsawmhtawp wa ra ai. Kasung hka mung, Ban Yung yan Ban Htoi sumsai myiman gaw ahkye atu rai samyen ru mahkrai hta lai wa ai shaloi na shingna hpe pyi prapra mu lu hkra san mat sai. Dai Kasung hka mayan na lagat hpun lakung lakying ni gaw, Ban Yung yan Ban Htoi hpe, “Kungzet ai shinggyim shayi sha yan e, gaungwi sa wa mu yaw!” nga nna, grai n ja ai hte hkan shakram dat ai zawn di ladawn dingsi shajang nga ma ai.
Ban Yung yan Ban Htoi shannau gaw, dai Kasung hka na samyen ru mahkrai hta tsam mari rai lu rap lai nhtaw, tsit tsawm maling kata na shingnyip lam hkan nna, Laingu Bum maga de dingyang bai sa wa manu ai. Asoi palawng hpun ai, ada labu bu ai hkumgawng shingyan gaw, dam lada ai tsingdu tsingman ga hta jahkrat da ai, hpu htum ai lungseng hte bung nga ai. Ban Yung yan Ban Htoi gaw, sung dik ai Kasung hka-nu lai ai hpang, Hkashi sumshi kawt, abum sumshi bai tawt lai nna, Laingu Bum lagaw de sa du mu ai. Laingu Bum gaw, bum lagaw de nna mada dat yu yang, sumsing lamu e htoi gabrim nga ai shagan ni hpe pyi lu dep di la daram tsaw nga lu ai.
Shaloi Ban Htoi gaw Ban Yung a nshang kaw gyit noi tawn ai maka ri makyit hpe mu dat nna tsun u ai. “Ashawng, shade tsaw ai bum mung naw lung ra a ni?” “She naw lung ra le! Nang hkawm ba sani?” Shaloi Ban Htoi baw nga rai tsun ai; “Lamu malen du hkra tsaw ai bum pungding de wa mi ganing lu du na i?” “Nau e! Gade sung ai hkaraw nhkap raitim anhte Jinghpaw shayi num ni a hkawm sa lam hpe n lu pat kau ya ai; gade tsaw ai bum raitim, anhte Jinghpaw shayi num ni lai sa na hpe n lu shingdang ya ai, dai grau sung ai hkaraw gaw Jinghpaw num mahkawn ni a lahpaw htat shara tai lu ai. Dai grau tsaw ai bumnu gaw Jinghpaw shayi hkansek ni a pantsun panse di shara tai lu ai.”
Ban Htoi gaw kana shing nga tsun jang, n-gun na rawng ai majaw bu hkawm ai asat lahkam htawt lawan let tsun ai. “Ashawn! Annau lama singkaw tu yang chyawm gaw, pyilan zawn di pyen lung wa na wa i!” “Langji gaw singkaw tu tim, lamu malen e jan daw mi n lu pyen nga ai, anhte Jinghpaw shayi hkawn ni gaw lagaw sha tu timung, jan du luplup ahkawm lu nga ai law!”
Ban Yung yan Ban Htoi gaw, langai san dat langai bai htan dat rai sumtsan lam hkawm pyi n dum hkra tsun shaga let sa ma yang, Laileng bum lam numshe, Laihku Hkam lam numshe nga ai gadawng lam numshe ni sumshi masum, shannau a labu hta da bang tawn ai manau shadung maka zawn rai magyi magaw re ai, lam hpunggaw krushi kru hpe gabye shalai kau da ai hpang, Laingu mare na numshang kaw sa du manu ai. Shaloi Ban Yung yan Ban Htoi gaw, Jinghpaw masha ni a htunglai nga ai hte maren, dai numtsa gachyi mi ru jahkrat da nna, mare hpe hkungga jaw ma ai.
“Gaw kaw o oi! Lau sa mu law o!”
“Wauwau!” “Laulau lau!”
“E shawn!”
“Oi!”
“U goi ai nsen pyi na sai, nang yi na nni?”
“Na sai, gui wau ai mung na sai, htingnu mare de du na ni wa re sai, hpun palawng galai hpun lang saga!”
Ban Yung yan Ban Htoi gaw, masin gaduk ai gaw “Htukhtuk, htukhtuk...” nga hkra kabu ai hte, numshang loi mi lai ai shara na makawk hpun nhpang kaw udi tsa-hku lit raw shanat tawn nhtawm, labu palawng htephtep galai hpun, kara atsawm sha masit shara kau rai nna, Htingnu mare de shang sa wa ma ai. Shing rai shang sa wa ma yang, mare kaang kaw e, bai lahkawng jan kaba ai dawhpum jung tawn, wara chyinghkyen hte gumdi shakum da dum tawn re ai dap jahku htingnu kaw sa du manu ai. Shannau lahkawng htingnu nta ndaw e sa du ma yang, n-goilatum zawn re hpakang labu bu kau, soi palawng hpun kau re shayi numsha ni dada nga ai hpe sa mu ma ai. Laingu ga na dada ninghkring Sumse Byinu gaw, hkawhtawn hkaw kau rai nna, yawng a kaang kaw dung nga nhtaw, shayi numsha ni hpe da maka sharin ya nga wu ai. Shaloi Ban Yung yan Ban Htoi sa wa ai hpe mu dat ma nna, myit kap ai hte hkap shacgyen let lit hkap tau gun nna, nhku de woi shang wa wu ai.
“Goi law! Ning yan gaw galaw ga de nna sa wa ai manam shayi yan rai myit ni?” “An gaw Kasung ga de nna sa wa ai manam yan rai nga ga ai law!” Ban Yung yan Ban Htoi gaw dada ninghkring hpe hkungga lara ai myiman madun let shing nga tsun dan mu ai. “Anhte nga ai shara hpe gaw Kaman kahtawng ngu ma ai.” Sumse Byinu gaw, BanYung yan Ban Htoi kawsi hpang gara hkrum sana mu ai nga, kanau hpungdim shayi hpe hkaupyiseng tsapa wa la jaw shangun wu ai. Ban Yung yan Ban Htoi gaw, shanau hpe manam kaja shatai nna, lagat jahku hta pyi grau mu ai hkaupyiseng tsapa hte hkap hkungga jaw ma ai hpe n dang tsun hkra chyeju dum ai hte Sumse Byinu hpe myit kata kaw nna grau hkungga lara nga manu ai.
Dai hpang, ndaw ya dada shara de sa nhaw, shada da tsawra hkungga dat hkat let bai sa shachyen nga ma ai. “Ning ji yan gaw hpa amu ra nna sa wa ai rai myit ta?” “Hkungga ai Ning Shawng hte shayi numsha manang ni e, ananu gaw da maka htauchyi hkringhtawng hpe ra sharawng ga ai majaw sa wa ga ai law!” “Ning ji yan e, anhte ndai ga de chye da bang ga ai da maka gaw dada nu majan rai nga ai Sawzaw Mawaw e tsawm htap shayi Mahtwi Byibaw hpe sharin ya ai baw da maka hpe chyu sha chye ga ai law!”
Sumse Byinu gaw shing nga tsun let, nsam rai jang n-goilatum nsam, da maka rai jang manau shadung maka da bang tawn re ai da maka labu la dan u ai. “Maw! Ning nan yuyu mu, anhte ndai ga de gaw kaga da maka kasi hte nsam mung n law, bai nna masha ga na zawn nampu nampan mung n hkum n tsup ai ga re majaw, ndai labu kaw da bang tawn ai da maka hpe chyu sha chye da ga ai. nanhte Kasung ga de gaw, nsam maka ni gade she law la nga ma dawng.” “Hkungga ai ning shawng e, anhte Kasung ga de chyawm gaw hpraw nsam hkum tsup ai nampu nampan ni, shaning shanang aten ladaw shagu pu at shajang nga ai. Dai re anhte da labu kaw n chye da bang la ga ai. Dai hta n ga, hpraw nsam baw shagu rawng ai u amyu nlang hte mung tut e ngoi garu shajang nga ma ai.”
Ban Yung yan Ban Htoi shing nga tsun dan jang, dada ninghkring Sumse Byinu hte shi a dada shayi numsha manang ni gaw, dalim shingnat pyi jahkring kau hkra na kabu ma ai majaw, dai kaw dada nga ai shayi numsha langai mi ga tsun dat wu ai. “Ashawng, hpraw nsam dai hte anhte a da labu kaw sa da la taw gaw, kade she tsawm na wa i!” “Ning shawng e, kaja wa anhte shayi num ni a da labu kaw she lu da bang la yang gaw, kinding ganai n tsa e anhte Jinghpaw num ni a da labu mahtawng grau tsawm na tai nga ai. Dai majaw, Kasung ga na jinghpaw shayi num ni nlang hte, ga ntsa hta grau tsawm ai da maka labu hpe bu mayu ma ai majaw, ning shawng nang hpe sa saw shaga la nhtawm, dai hpraw nsam amyu shagu hpe sa da bang la na matu an nau lahkawng hpe shangun dat ma ai law!”
Dai hpang, Sumse Byinu a tsawra shayi nau ni mung kana hpe hkungga ai ga manawng hte, “Shawng e! annau ni mung ya bu ai labu hta grau tsawm htap ai da maka labu bu mayu ga ai, ning yan nhtoi kade shi ya gade shi na hkawm kau nna, nde tsan ai ga de dingtawng sa nhtawm, shawng nang hpe dingsang sa shaga ma ai gaw, sa lawm u; bai anhte hpe mung hpraw nsam tsawm la ai da maka labu sa da wa ya rit!” nga nna hpyi shawn ma ai. Shaloi Sumse Byinu mung, shi a shayi nau ni yawng shi sa lawm na hpe myit hkrum ma ai hte maka baw shagu rawng ai da maka labu sa da wa na hpe hpyi lajin ma ai hte maren, sumtsan Kasung ga de sa na myit dawdan nu ai.
Sumse Byinu gaw, shi a shayi nau ni marai matsat lu ai, shi hte rai yang shannau ni yawng marai jahku du ma ai. Shi a shayi nau ni nlang gaw, shada hkungga tsawra chye ai hkrai rai ma ai. Shannau ni gaw, galoi nhtoi hta raitim ga-li ga-law n nga ai sha angwi apyaw rai ganawn mazum chye ma ai. Kaga shayi num mannag ni hte raitimung sumnung shingdi rai hku hkau chye ma ai. Ban Yung yan Ban Htoi sa du ai shana gaw, sumtsan Kasung ga na manam kaja sa du ra ai shiga hpe na lu ma ai majaw, Htingnu mare na gumgai dingla, myitsu salang, mahkawn shabrang, ji nban kabu gara rai, dai daram galu ai Htingnu nta kaw na dap shagu hpring chyat hkra sa chyai nna, Ban Yung yan Ban Htoi hpe sa hkap hkalum lawm ma ai. Gumgai dingla ni gaw, Ban Yung yan Ban Htoi gun sa ai magyep tsahku dinghkru hpai let majan laka dat nna, dada ninghkring shayi num ni hpe shakawn shagrau nhtawm, Sumse Byinu hpe hpa n hkrum n hkra ai sha, mahku yan sumtsan Kasung ga de sa du nna, tsawmhtap ai da maka hpe wunli lu ai hte sa dai la lu mu ga, nga nna shaman jaw ya ma ai.
Dai hpang shani, ulat hpunggam goi ai hte Sumse Byinu shi a shayi nau ni hpe jasu sharawt la nna, shi a dada shayi manang ni hpe sa shaga wa shangun nhtawm, jitna tam ai gaw tam, dalim, litrung ni hpai ai gaw hapai, ri gan lahkawn ai ni gan lahkawn, shingnoi noiji kaw ri lahkaw hta baw ai ni gaw hta baw di nna, nnan woi sing kyin shajang nga wu ai. Ninghkaw ajan gaw dada shayi num ni hte shingjawng hkat ai zaw sinpraw hkran de nna, la rai mani pru wa ra ai. Shaloi jan lagaw gaw dada shayi num ni da sing nga ai shara hta wa htawng hkra dat ai htw, da nnan mung sing ngut nna gatsu nga masai. Htoisan la ai Ninghkaw ajan gaw, ahtoi re ai lairi sumpan zawn rai Laingu Bum shagawng ting hta jahpun dat wu ai. Shaloi yang gaw sumtsan buga de rawt sa wa na ahkying aten kaja mung du wa sai hte maren, sumtsan lam e gun na lit mung baw ra sai.
Sumse Byinu gaw, shi a shayi nau ni hpe grau tsawm grau ngang ai shingnoi lata shangun nhtawm, sharaw hpyi hte galaw la ai jinghpai hpa zum mi, Magui kawng hte galaw la ai litrung zum lahkawng, Laisi hpun hte hprang la ai dalim zum mi, Kawa ginchying kaji hte galaw la ai kajit shingnat zum lahkawng, Majan shingnat zum lahkawng, Shapu matin zum mi, Labri hpun hpunkri hpe hprang la ai dahkaw zum mi, Nsam amyu shagu rawng ai maka ri ni hpe tsawmhtap ai shingnoi noiji kaw hkrai baw jahkum shatsup bang ya shajang shangun wu ai.
Lit baw lajang ngut ai hpang, Sumse Byinu gaw hkawhtawn hkaw kau, lakan kai kau, hkachyi shawa nang gali kau, gumrit gali kau, soi palawng hpun lahkawn hkawn, n-goilatum zawn re ai hpakang labu bu, da ai shingkyit kyit, nbang ban kau, da maka laraw raw, atu rai chyang tsawm ai hpundang dang kau rai grai tsawmhtap hkra mawn sumli la nhtawm, shi a kanau shayi numsha Byi Htoi hpe woi lang rai shanhte a dailup daihpang Htingnu mare hpe gayin shakram da na, Ban Yung yan Ban Htoi hte mahku Kasung ga de wunyaw aman yawng let rawt hkawm mat wa manu ai. Shaloi Sumse Byinu a tsawra shayi nau ni Byi Lat, Byi Roi, Byi Rawng, Byi Kai, Byi Yun, Byi Kying, Byi Hka ni gaw mare na dada shayi num mannag ni hte rau, kana ni hpe Htingnu mare na numshang kaw nna tsawmra lai yu wa ai sa-ra de du hkra hkan sa dat ma ai. Shanhte gaw kana Sumse Byinu ni hte shakram hkat nna, hka ai hpang dai sa-ra na htangnya hpun nhpang kaw shamyet tsap dingren nga let tsit lali ai bum maling shingnyip lam hku hkan nna, kana ni a hkumgawng shingyan hpe pyi n mu mat hkra hkan mada yu dat ma ai.
Sumse Byinu yan nau hte Ban Yung yan Ban Htoi gaw, Laingu ga na Htingnu mare kaw nna rawt hkawm mat wa ai hpang sanit ya ngu na jahpawt e, Kasung hka kau de sa du masai. Raitim shanhte gaw Ban Yung yan Ban Htoi lai ai hku lam nau magaw ai majaw, Sumse Byinu tsun ai hte maren, numrap kaga tam nna lam dingtawk hku lai mat wa na yaw shada ma ai. Shingrai shanhte gaw nga hkui ai ni rap lailai re ai numrap (danam) de sa du ma ai. Raitim dai shaloi yang e, gade n de pyi n mu mat hkra Kasung hka hta amut re ai saiwan hkrai hkrai pak rai ga-up magap kau mat nga ai. Shingrai shanhte gaw hka hku hka nam masam yu ma ai.
Shahte gaw hka hku de shawng tam lung wa ma yang, hka hku maga de na saiwan grau htat nga la ai majaw, hka nam maga de bai tam yu wa yu ma ai, shaloi mashang hkap da maka hkum mi lu da bang na ahkying daram hkam ai shara de sa du ma yang, hka hku maga de yawng ai lagaw hka hpe sa mu ma ai. Shaloi Sumse Byinu ning nga tsun wu ai. Waloi n nga ai ga de waloi hka hka ai, Jinghpaw n nga ai shara de Jinghpaw hka hka nga ai gaw, hka sharap na masha mahkoi mu tam nhten atsawm sha she tam yu ga!”
Shi shayi manang ni gaw ga dai myitkraw lawang kaw nna nan na pyaw ma ai. Dai hpang shanhte shayi numsha marai mali gaw, dai lagaw hka hkan nna, hka hku maga de tam lung wa yua ma ai. Shaloi hka hku de nna;
“Oh, yelaw e... Nu a ma chyang n ra ra nga ai le,
Shayi sha hkawn tai hpe n ja ja nga ai le!
Ninghkaw ajan pru wa ra ai law,
Mahkup saiwan hkoi wa ra ai le.
E, e yelaw e...
Sungsung Kasung hka nu sung ai law,
Tsaw tsaw Laingu bum nu tsaw ai law.
Grau mu ai nga nga gaw brangla ngai hkui ai nga law,
Grau mu ai mam gaw hkawntai ting ai amam law!” nga nna, shadang la sha langai mi hturen dum let nchyun chyun dat ai hpe na dat ma ai. Sumse Byinu hte shi a shayi numsha manang ni gaw, shadang lasha a hturen nsen hte nchyun ga dai hpe grai na pyaw ma ai. Dai hta n ga, Kasung hka sharap na masha nga re sai, nga nna grai kabu ma ai. Shanhte gaw kabu ai myiman hte dai shadang la sha a nchyun nse ngoi pru wa ai maga de mada dat yu ma ai. Shaloi, htoi gabrim ai jan ningja, la rai basi nba zawn rai hpun maling hpe jahpun tawn ai saiwan hpe jinghkren shalai kau da nhtawm, Kasung hka hte dai yang na wum kaba ai lagat hpun ni hta htawng hkra dat u ai. Matmut rai hkra htat ai saiwan mung hpun maling gadawng hkan nna yatyat sha hkoi lung wa mat sai.
Shaloi n-ga jinghpa hta sharaw wa shakap ai n-ga galu hpye, banput hkaw hpraw hkaw re ai shadang la sha langai mi, Kasung hka kaang hku wawn htu nna nchyun chyun let sumgawn gabai yu wa ra ai. Sumse Byinu ni gaw shanhte hte ang ang kaw htu yu wa jang hkap shaga na hkyen nna, myi pyi n grip hkra mada yu let la nga ma ai. Shanhte gaw shadang la sha dai hpe alawan hkap shaga dat na hpe myit mada nga ai ten re majaw, myi grip mi sha raitim, jan daw mi ting la dingda ai zawn ngu ma ai. Shadang la sha dai wa gaw shayi numsha ni la jin nga ai hpe chye ai zawn rai, wawn loi mi chyang chyang di htu yu wa nna, Sumse byinu ni tsap nga ai shara hte ang ang kaw wa jahkring dat wu ai. Shaloi Sumse Byinu ni gaw shadang lasha dai wa hpe grai hkungga ai hte hkap shaga dat yu ma ai.
“E, Kasung hka e awawn htu ai tsa, nang gaw kadai wa rai nta?” Sumse Byinu shing nga hkap shaga dat yang, dai wawn htu ai shadang lasha bai htan tsun dat wu ai. “E, ngai gaw Marip wa Kumja Magam a matu nga hkan Brangtse rai nngai law! Hkri nanhte gaw kadai bu ni rai myit ni?” “Anhte gaw grau ngawn Kasung bum nu hte grau tsaw Laingu bum nu na shayi numsha ni rai ga ai law!” Sumse Byinu hkungga ai manawng dat nna shing nga tsun jang, Brang Tse gaw, galoi raitim masha bat pyi nau n manam ai hkam nhkap maling mala de wa mi, masin shade gaba ma ai numma ni gaw, gara ga de na share shagan shayi num sha ni rai ma ai kun? Atsawm she sa san sagawn y una ng anna myit let Sumse Byina nit sap nga ai hka hkingau de wawn gachyi mi htu shani dat nhtawm, tsawra matsan dum ai ga manawng hte san u ai:
“Oh! Reng hkri nanhte gaw gade madaw sa wa na ngu myit ni?”
“Tsa e, anhte gaw Kasung Kaman bum de da maka sa da sharin la na ngu saw a ga ai law! Dai re Kasung hka ganing di n lu rap lai ai majaw, ndai kaw sa myit law tsap nga ga ai law. Shingrai, hkungga ai tsa nang chyeju hte gan htu sharap dat rit ngu nna hpyi lajin mayu ga ai law!”
“Hkungga ai hkri ni e, ngai hpe gaw hkawn Tai shayi e jahpawt shatmai shatai na matu nga hkui shangun dat ai she re ai, nanhte mu chye nga ai hte maren, shade dam gaba ai Kasung hka hta nanhte hpe htu sharap nga jang gaw jan law mat na tai nga ai.”
“Hkungga ai tsa e, na a sumtsaw jan hkawn Tai gaw, anhte a dada shayi manang jan she rai re nga ai, nang anhte hpe Kasung hka hta htu sharap ai lam hpe shi lama chye yang gaw, nang hpe n hkap daru ai hta n ga, nang hpe chyawm hkap shakawn shagrau na ra ai.”
Brang Tse gaw Sumse Byinu a ga dai hpe lu ningdang kau na zawn n nga ai majaw, shi gatsa shi hpe sharin shaga ai ga hpe manaw dan u ai;
“Hkri ni e, anhte Jinghpaw ni a ga malai hta, “Hpunjum hpe gaw lu shingkawt ai, hpundu hpe gaw n lu shingkawt ai.” Nga ai ga malai rawng ai hte maren, nye tsa dingla ngai hpe “Nga hkui ai wawn kaw num ni hpe jawn shangun jang yuk mat nna nga n lu hkui la ai lu” nga nna matsun ai ga hpe gaw n madat n mai na re!”
“Hkungga ai tsa brang e, ningtsa dingla hkap shara na hpe mung hkum myit tsang u, nang anhte hpe htu sharap kau nhtawm, ya lu la ai nga ndai hte hta grau law hkra lu hkui gun wa ai hpe ningtsa hkap yu gabu nna, nang hpe
“Ngai lu ai gaw dama shingtai rai,
Kasung hka e hkrai nga hkui ai,
Anum mu tim n yuk ai,
Ala mu tim n hpuk ai,
Jahpawt sa nga walai lu,
Shani sa yang nga urat bai lu,
Nga gasat sha nhtawm,
Asak mung grau galu u ga law!” nga nna hkap shaman jaw na ra ai, “shaloi nga shagu lang sumgawn gabai n shut, ningtsa mung shat dun shagu warat walai sha n dumhput na nu ai rai.”
Shaloi Brang Tse gaw dada ninghkring shayi numsha Sumse Byinu hte shi num manang ni a hkungga la-ra ai kyang lailen hte tsun shaga wa ai mahku manang ni hpe yu hkungga tsawra ai hte matsan yu dum ai majaw, dai shayi numsha ni hpe shi a nga hkui wawn kasha kaw lung jawn shangun nna, sung gaba dik ai Kasung hka hta winli lu ai hte htu shakap dat u ai. Shaloi Sumse Byinu ni gaw Brang Tse hpe chyeju nau dum ma ai majaw, shi a sumtsaw jan Hkawn Tai hpe wa ya u ga nga nna, latsun zum mi kumhpa jaw ma ai. Shaloi Brang Tse gaw n-ga hte nhpye hpe shingdu de loi mi galaw sharai dat let, grai hkungga ai hte atsawm sha hkapla nhtawm, manat baw kau na hpe hkrit ai zawn di nna, grai sadi ai hte ta lahpum gata kaw bang tawn wu ai.
Sumse Byinu yannau hte Ban Yung yan Ban Htoi gaw, Brang Tse hpe hkungga la-ra ai hte shakram kau dat nhtawm, Kasung Kaman ga de dingyang hkawmsa mat wa ai. Dai hpang shanhte gaw, gade tsan ai bum lung shagawng lam, hkaraw nhkap lam ni hpe gabye shalai kau da nhtawm, nhtoi sumshi ya sumshi na hkra hkawm ai hpang, nga hkawm htum ai tsit tsawm maling kasung ga de du manu ai.
Kasung ga de gaw gahtawng ninghtawn law law de tawn nga ma ai. Ban Yung yan Ban Htoi nga ai mare hpe gaw kaman mare ngu ma ai, Ban Yung yan Ban Htoi gaw dada ninghkring sa lu shaga wa ai hte madu a buga de sumhtang ama bai la sai majaw, kabu gara rai grai hkungga la-ra ai hte Sumse Byinu yan nau hpe shanhte a mare kaw woi shang wa ma ai. Dai Kasung ga e nga shanu ai gumgai dingla, myitsu salang, mahkawn shabrang, ji nban gabu hpa shiga dai hpe na lu ma ai majaw, htawngbau supsheng hte ring, magyep tsahku hte htep di, grau tsaw Laingu bum na Htingnu mare de nna hkiba lit li rai du sa ai dada ninghkring shayi Sumse Byinu hpe sa hkap hkalum la ma ai. Bai rai jang shayi num ni hta na share shagan rai nga ai Sumse Byinu raitim mung, ndai mare baw de gumhpraw shinggat gat, mare htum pa de aja hkat hkat re ai je ngawn Kasung ga de sa du lu majaw, na chying kabu nu ai.
Dai shana wa, Kasung ga na shata jan pi din din rai nna grau htoi san u ai. Gumgai dingla ni gaw dada shayi num ni hpe majan laka hte wa nang ningsin sin ai kaw nna u lat hpung gam goi hkra, sawmrawm ninghtoi htoi hkra shakawn kungdawn ma ai. Dai majaw, Ban Yung ni a htingchying nta pyi hkungran poi galaw ai zawn she nga mat nu ai. Kasung ga na ramma ni gaw Sumse Byinu hpe ya sha sa hprawn wa ai num nnan hpe sa yu ai zawn di nna sa yu nga ma ai. Shingran ni gaw moi kaw nna jinghpaw htunghking hta nga ai hte maren, Sumse Byinu hpe grai sa woi shachyen hkat chyai mayu ma ai. Dai re shi shabrang ni hpe madun dan ai hpraw nsam hpe yuyu, ga manawng hpe madat yu yang chyawm gaw sa saw yu yang hkraw na zawn re ai raitim shi nu wa myitsu salang ni hte mung jahta hkat ma ai hpe madat yu yang gaw, shayi hkawnsek zawn mung nnga mat, myitsu hpawmyi zawn nga nna she jahta bang wa wu ai. Dai majaw, sa saw yu tim shangawn ga hku shing n rai majan ga hku hkap san shanawng tawn na hpe tsang ma ai majaw, gade yu tsawra tim, mu nga ninglen di la n lu ai numri pan hte bung nga ai.
Sumse Byinu gaw dai Kasung Kaman ga de du ai hpang, gahtawng ninghtawn shagu na hkawn shayi ni hpe saw shaga gahkyin tawn nhtawm, kau mi hpe gaw ndan tam nna pasi gap shangun, kau mi hpe gaw sagu mun tam nna sagu ri gaboi shangun, kau mi hpe gaw gabang tam nna ri gaboi shangun, kau mi hpe gaw mahtat lap sa dan gun wa shangun nna ri jaw shangun, kau mi hpe gaw danghkyam tam nna majan ri lahkaw shangun, kau mi hpe gaw majan ri shatai na ri chyang lahkawn shangun, kau mi hpe rai jang gaw, nsam amyu shagu hpe gabaw shagu rawng ai maka ri ni chya ai gaw chya, hkringna kaw sa lam lajang ai gaw lam lajang di nna grai kyin shajang nga ma ai.
Sumse Byinu woi gahkyin tawn ai shayi numsha dai ni chyawm gaw, marai rawng ai la-shawp sha ai ni hkrai rai ma ai. Shanhte gaw, da maka labu da na ri ni hpe dada hkringrai ni jahkum jasup ngut nhtawm, marai shagu lalam mi chyen chyen galu ai jinna ren di lang nna, da nnan bai sing shajang ma ai. Shanhte gaw, hkruta shagawng garai ndu, nampu nampan garai npu ai ladaw laman e, da nnan gatsu sanit shi sanit lu sing hkra nga nna, sinpraw hkran shagawng bum de nna ninghkaw jan lagaw “praw” rai sa shayawn dat ai hta pyi grau lawan hkra da sing shajang nga ma ai.
Ninhkaw ajan gaw, langai hte langai pru wa nhtawm, mani sumsai rai langai hte langai sinna bum ntsa kaw nna Tingsa ajan nhtang salam kau da da ti lai mat wa nga ai. Gawng shata mung, shayi hkawnset a masit pasi zawn rai yu, sumsing lamu de matsaw shayi a man yu jamna wa tai ya yu, basi kaji bai tai nna ga ntsa na shinggyim shayi ni a kara bai sa masit ya yu, rai nna gade lang she galai lai mat nu ai. Aten nhtoi lani hte lani lai mat wa sai, ladaw laman langai hte langai du wa ra ai.
Hkruta shagawng du sai, ntsa malen pyen u ni ra sharawng la ai nampu nampan ni mung pu ang shajang sai. Chyinghkai nu num ni hte shayi hkawnsek ni krawwang myit mada ai walang ginhtawng du ra ai, ri da maka ten du sai.
Sumse Byinu gaw, dai Kasung Kaman ga na marai rawng la-shawp sha ai shayi numsha marai sanit shi sanit woi, lalam masum sum galu ai da nnan sanit shi sanit woi gatsu gun nbaw shat gabaw gun, udi shadu gun, lagat jahku zawn mu ai magyep tsahku malum gun rai nna Kasung bum bungding de lung wa manu ai. Shanhte nlang gaw, nhtoi jahku ya jahku na hkawm nhtawm, hkruta shagawng nhtoi a jahpawt manap, tingsang majan la nnan pru wa ai aten laman hta, wunli lu ai hte bum bungding e du manu ai.
Ntsa palen pyen u nlang hte mung, jan shingbut ga de manau sa dum lawm ai hpang kinding ganai de bai nhtang du wa manu ai. Shanhte gaw shawoi shaning na hte maren, jan shingbut ga de dum ai manau hkringhtawng hpe hkan nna, Kasung bum bungding e U manau bai wa dum nga ma ai.
Sumse Byinu woi lung wa ai jinghpaw shayi dada ninghkring ni gaw, bum pungding kaw du ai hte bum pungding ninghkawng e grup di nna, shanhte yawng a dada shara tam masat tawn nhtawm, da-lang jung nna da-hkaw mara, da-hprau jung nna lahti da, da gatan hpyen dat ai hte jinghpai hpa kyit di galaw ngut shajang ai hpang, shingnat masawp shara da-lim shawn shachyen da-hkyam shatai htinglet ai gaw “laplap” rai da maka labu da hpang wa shajang masai.
Pyaw ngawn la ai Kasung bum pungding tsit tsawm ai hpun maling e, hpraw nsam baw shagu hkum ai nampu nampan e mawn sumli, Jinghpaw shayi num ni da maka labu da let gabu mani; Utu chyangngau she ngoi garu, jinghpaw shayi ni a da-lim shara nsen she ngoi gadu nga sai. Sumse Byinu hte shi a dada shayi num manang ni gaw, hkawnset ni a da maka labu da shakyin; U manau dum ai u ni gaw, ntsa malen e pyen gayin rai nachying tsawm lali ai hte nga ngwi nga ngawn ai matsaw bum nu tai shajang mat nu ai.
Bai, dada ninghkring Sumse Byinu mung shi a tsawra hkauchyap ai, jinghpaw shayi dada ninghkring manang ni hpe, jamjau jamhkaw rai woi shakut shaja ai a jaw e, Da-pyen chyinghkyi maka, Manau shadung maka, tsawm htum Utawng maka, Htingra kaisek maka, Nampu nampan, tsit mut mang hpraw hkye chyang re ai hpraw nsam rawng da maka ni hpe ninglaw lu ai hte lu da la manu ai rai!
1982 ning Guptung ta
Hparat Panglai
Ka Ai - Chumlot Ton
