JINGHPAW NI HTE MAKAU GRUP-YIN
PUNGGA JA LI
Jinghpaw ni chye ai nga yawng nga pra, shing nrai tinang a makau grup - yin, tinang gara hku seng hkat ai, gara hku lit nga hkat ai nga ai lam ni gaw kaga amyu nkau ni chye na ai hte shai hkat ai lam ni nga ai rai nna, laklai ai hku mu lu nga ai. Dai rai nna Jinghpaw ni hkap la ai hte n bung nga ai. Shingrai, nhtan shai hkat ai yan, hkrum gadeng ai kaw na kaga grau gaja ai byin wa lu na hku hkap la kam sham ra nga ai. Jinghpaw maumwi hku rai yang, Hpan Madu gaw Ninggawn Chyanun hte Hpunggam Woishun kaw du hkra shabyin la ai. Dai yan a lawu de gaw shan e bai matut shangai ai hkrai rai nga ai. Ninggawn Chyanun hte Hpunggam Woishun shangai ai magam bungli nga yawng nga pra yawng hta Hpan Madu a hpaji gaw Hpan Ningsang Chye Ningchyang ngu ai mying hte yu lanu lahku ngai ai. Ninggawn Chyanun Hpunggam Woishun a shangai chyinghkai lam yawng gaw Hpan Ningsang Chye Ningchyang a myi gata kaw rai nga ai, shi e matsun hpajang la madun ai gata kaw nga pra nga ma ai. Dai rai nna yawng nga pra shada seng hkat akyu jaw hkat na matu rai nga ai. Lawu de Jinghpaw ni makau grup - yin hte seng hkat ai lam hpe htai la ai myit jasat ni tsun yu ga:
1. HPAN MADU HTE SHINGGYIM MASHA.
Jinghpaw ni kam ai hku rai yang Hpan Madu hte shinggyim masha gaw arau sha nga pra ai lam tsun ai. Shinggyim masha a labau ma hkra hta, lajang, hpajang lawm ai hku tsun nga ai. Masha a asak hkrung lam gata kaw shi nan lawm ai hku tsun nga ai. Masha a asak hkrung lam gaw shi a bungli yi ngam hku tsun nga ai. Hpan Madu hte shinggyim masha gaw hpung shingkang atsam grai shai ai raitim, dai Hpan Madu a hpung shingkang gata kaw shinggyim masha a asak hkrung lam mung daw chyen hku shang lawm nga ai. Ninggawn Chyanun yan Hpunggam Woishun lama mi shangai shagu mying jaw, hkringdat jaw, bungli matsun madun ai gaw Hpan Madu shi hkrai rai ngai ai. Daini du hkra shangai wa ai ma a gam maka mahkra hpe shi hpajang ya nga ai. Shinggyim masha ni a asak hkrung shamu shamawt ai lam hta shi n lawm ai n nga ai. Ca kaw rawng ai kagyin hku hpe la- gaw hte shingdit pat kau ai rai yang, dai wa hpe nahpang mat ai hku mara jaw nga ai, hpang jahtum shani je yang ai hku n re ai sha, daini jang mara jaw nga ai, shinggyim masha ni jahtum chyalai yak hkat ai shaloi shaga dat yang, na lu na shara kaw shi nga taw nga ai.
2. SHINGGYIM MASHA HTE NAT.
Shinggyim masha hte nat gaw shai hkat ai. Nat gaw hkrang kata rai nna shingyim masha gaw hkrang hte rai nga ai. Rai timung shada ga- rum ningtau hkat lu nga ai. Nat e n mai ga- law ai hpe shingsyim masha e galaw ya ai. Shinggyim masha e n lu galaw ai hpe nat e galaw ya ai. Tinang ra ai arai ni hpe galai gachyai mai ai, shada mung jahta hkat mai nga ai. Shada jaw lu, jaw sha hkat ai, nga shara, atsam marai shai hkat ai rai timung akyu jaw hkat ai. Dai majaw kaga masha ni chye na ai nat gaw Jinghpaw ni chye na ai nat shai hkat ai. Kaga amyu ni chye na ai nat gaw, nat hte masha aten tup nhtan shai hkat nna hpyen tai nga ai hku chye nà ai, shing- rai kaga masha ni a matu gaw nat jaw ai ngu ai hpe sum ai lam, shut ai lam ngu chye na ai. Bai Jinghpaw gaw nat jaw lu ai lam hpe arawng lu, myi man pa ai hku she chye na ai. Nat hte shinggyim masha mung shada seng hkat ai jinghku hku htai la chye nga ai.
3. LAMU MARANG, DU HKRA LADAW HTE SHINGGYIM MASHA.
Lamu marang du hkra ladaw ni mung masha hte seng hkat ai hku kam nga ma ai. Ga shakrin kaw masha sai ing taw yang marang aja awa htu nna dai sai hpe gashin shamal kau chye ai. Dai hpe lasa mang sai gashin ai nga ai. Shinggyim masha ni hta n sawn n ang ai hku byin wa, ga shadawn lamu hkun hkraw ai shaloi, "Lamu e mung u, gingding aga mung bung wa u.." ngu nna lupgrawng sa hta tsing rai marang shaga dat yang, lamu marang htu wa nna mu achye ai. Shinggyim masha ni nau gahtet, shing nrai nbung hpe ra gadawn ai shaloi, n - gup lahpyaw hpyaw, kawa wahtoi rai ni dum yang nhung, bung hpyi ni bung wa chye ai. Lup da ai masha mang yat n tsawm ai rai yang, marang htu shayan ai. Dai hpe ningnan ai ngu tsun chye ai. Shinggyim masha ni hta lama ma ra rawng jang, ma- rang yawm mat ai rai nna jan hkring mat chye ai. Lahta de tsun ai lam ni yawng gaw du hkra ladaw yawng hte lamu marang ni mung masha asak hkrung lam ni hte seng hkat ai hpe madun nga ai.
4. HPUN KAWA HTE SHINGGYIM MASHA.
Hpun kawa ni mung asak hkrung lama hte matut hkat ai ngu kam ai. Jinghpaw ni hpun kawa hte n hka lu ai, shingrai nta chyahpung shachyang hkan hpun kawa ni hkai madat da nga ga ai. Lama machyi masha nga ai nta makau hkan na hpun kawa lakung gatsing galang ye mat wa ai rai yang, dai machyi masha si mat chye ai. Numshang hkan na hpun kaba ni lak- ying gyi ye mat yang, mare na du salang ni kaw hkra wa chye ai. Masha langai ngai yup mang hta hpun kawa daw ai mu yang, masha si chye ai. Hpun kaw nlung hpri zawn re ai ni shachyat tawn da ai rai yang, dai zawn galaw ai wa machyi galu hkrum chye ai. Dai hku byin ai lam mung hpun kawa hte masha asak hkrung lam gaw matut taw nga ai ngu kam ai lam hpe ma- dun nga ai.
5. DUSAT DUMYENG HTE SHINGGYIM MASHA.
Mare de u gan, chyahkyi nam shan ni shang wa yang, mare kaw lama ma byin chye ai, shing nrai mare hten chye ai. Nta nhku de nam u shang yang, nta masha lama ma byin chye ai. Nta nhku kaw yu shalip, u hka, u hku zawn re ai ni shang yang, n gaja ai shiga lama ma na chye ai. Ndai zawn byin ai lam gaw shinggy- im masha hte seng ai byin wa na lam hpe dusat dumyeng ni hku nna shawng tau hkrau chye kau ai kumla hpe madun nga ai.
6. TSINGDU TSINGMAN NAM BANDA HTE SHINGGYIM MASHA.
Mam, shagyi, ya ni gaw tsingdu tsingman hta lawm nga ma ai. Shanhte mung shinggyim masha ni a asak hkrung ra ai ngu hkap la nga ai. Mam la- law ai ngu tsun ai gaw shanhte hpe agaw la- kawn ai hpe tsun ai rai nga ai. Shaba lap ni, kahtan ni mung shanhte hta shamawn maka shapraw na atsam lu ai rai nna, shanhte lu ai atsam hte masha asak hk- rung lam hpe garum chye nga ma ai.
7. WAN, HKA HTE SHINGGYIM MASHA.
Wan gaw masha yawng hpe akyu jashawn ai rai timung, wan hte asak sum ai masha mung law law rai nga ai. Masha a arung arai law law hpe mung jahten chye nga ai. Hka hpe akyu jashawn lang ai rai timung hka hta masha asak grai sum nga ai, shing nrai, hka hte arung arai jahten nga ai. Jinghpaw ni gaw lamu ganhkau e nga ai arung arai jan shata ni pe mung jinghku hku, shing nrai, marai hku hkungga jaw jau nga ai. Jan ga sa jang ana wa sa, wa wa sa sa galaw ma ai. Kaga masha ni grai hkrit ai baw hka gata na lapu, baren hpe mayu daw nga ma ai. Nam maling mala, hka rum, hpun yawng hkan nga ai nat mat- se, sawn, jahtung ni hte mayu daw nga ma ai. Dik nna Karai Kasang pyi shanhte a mayu sha rai nga ai. Dai majaw, Jinghpaw a matu ndai nga yawng nga pra hpe hkrit nra nga ma ai. Shingrai simsa lam npawt gaw Jinghpaw kaw nga nga ai.
8. SHINGGYIM MASHA SHADA GARA HKU SENG HKAT AI LAM.
Mungkan ntsa e nga ai shan hpraw gaw gahpu ba Gam re ai da. La a kasha ni gaw shanhtoi amyu ni re ai nga. Shing rai hpunau ni hkrai re ai majaw ga li ga law byin n mai ai nga ma ai. Shanhtoi kaw na mung Miwa gaw gahpu ba Cam re ai da. Gahpu ba re ai hte maren kanau ni yawng a ntsa myit su myit gawp ai kam hpa manoi manat ai, Miwa hpraw gaw gahpu Bawk, gahpu Ji mahtang re ai da. Shi mung kanau ni a ntsa e grai chye tsawra ai. Ma la gaw Kayin, Kaya, Mun, Myen, Yahkaing a kaji re ai da. Dai majaw, Jing- hpaw ni gaw gahpu Ba, gahpu Ji ni hte rau nga ai hta gahpu Doi hte rau nga ai gaw grau pyaw dum ai rai nna, ya gahpu Doi ni hte rau nga ang ai rai nga ai. Ma la gaw Kayin, Kaya, Mun Yahkaing a kaji, shi gaw Kala amyu rai nga ai. Dai wa mung myit grau su ai rai nna Jinghpaw ni Kala mung kaw grai pyaw ai hku sim sim sa sa nga nga ma ai. Gahpu Dim gahpu. Gun Tang wa gaw Danda a kaji re ai nga ma ai. Gahpu Gun mung grai myit su ai rai nna kanau ni hte gali galaw hpa n nga ai asim asa tinang a kanau ni hpe hkauna htu jaw, nhtu, ningwa dum ya nga nga ma ai. U ma Yaw wa gaw Jinghpaw re ai nga ma ai.
U ma re ai hte maren ya gahpu ni yawng jawm tsawra nga ma ai. Gahpu ni nga ai Miwa mung de sa dat, Kala mung de sa chyai hkawm rai nga ai nga ma ai. Jinghpaw ni hta na mung kawa langai hkrai rai nga ma ai. Naga gaw hpuba Gam, Hkannung gaw hpuji Naw, Rawang gaw hpudoi La, Lisu gaw hpulum Tu, Lawwaw hte Lachik gaw hpu Gun Tang, Jinghpaw ni gaw hpudim Yaw rai nga ma ai. Kanau langai kawa langai dinghku masha hkrai rai nga ai majaw, numwawn numla htunghking manghkang hpa n nga ai, wang lu wanglang, brang brang lang lang nga pra lu ai rai nna shinggyim masha shada simsa lam mung Jinghpaw kaw sha nga nga ai. Marip yan Maran hpe sai garan ya na ngu yang, Maran a kanu gaw Marip kasha rai nga ai majaw, gara hku mung n mai galaw shangun nga ai. Lahta na zawn byin nga ai rai nna ga law hpai shai hkat na ngu yang, ga law matu nan n mu nga ai. Shing rai Jinghpaw a mungdan dinghku daram pyaw ai gaw Jinghpaw sha nga ai. Mungkan hta laklai ai amyu rai nga ai majaw, laklai ai hku nan nga ra ga ai. Jinghpaw nga ai shara shagu hte Jinghpaw du ai shara shagu simsa ngwi pyaw ra nga ai.
