Shinggyim masha ngu ai hta amyu bawsang law law nga ai. Dai n bung ai amyu ni hpe kalangta yu dat ai hte Myen, Sam, Gala, Miwa, Jinghpaw ngu nna ginhka la lu na matu, Hpan Sagya Wa, Karai Kasang gaw amyu baw shagu hpe n bung ai “Rida Maka” ni hpe hpra hpra jaw da ngut chyalu rai nga ga ai. “Rida Maka” hpan law law nga nga ai hta, Kachin amyusha ni a “Rida Maka” gaw yawng hta, laklai tsawmdik nga ai hte kaga amyu ni mung, grai yu ra, buhpun sumraw ra ai rida maka langai, rai nga ai. Kachin amyusha ni a rida maka ni gaw nlung prat kaw na galaw lang sai lam hpe nlung prat hta, lang laiwa sai arung arai dingsa ni hta rida maka, manau maka ni kap ai hpe yu nna chye lu nga ai. Kachin ni yawng, Mongolia ngu ai Bumhkye ga, Jinghpaw mying hpang ai Jum Nawng kaw nna madung hku lang hpang wa sai.Chyumlaika (Pru 35:34- 35) hta “Dan a lakung hta na Ahisamak a kasha Aholiaba hpe shawng, Hpan Sagya Karai Kasang sharin ya sai. Kachin ni mung, Karai Kasang a wenyi atsam hte ginchyigram tsip hte shingtai sumbra sha kau ai namlaw namlap ni hpe yu nna maka ka hpang ai nga, tsunhkai hkrat wa nga ai. Jiwoi Jiwa ni shaning lawqlaw pasi hpun ni hkai la nna pasi hpaw jang, riri la nhtawm, maka hpan hkum sumhpa hte daqda lang wa sai. Nsam ni hpe mung, namlaw namlap ni tam bang la nna galaw lang laiwa sai. Shawng nnan, Pasham maka hpe ka hpang sai.
Moi Majoi Dujan Hka Nang gaw shabasi sa di ai shaloi, lapu putsit gaw lata e achye bun ya nna hprawng mat ai da. Dujan Hka Nang gaw lapu hpe n mu ai. Shingchyut hpe sha mu ai majaw, shi hpe shadu u ai. Shaloi, Shinghchyut gaw ngai n re. Ndai shara kaw ngai hkrai sha nga ai, n re ai. Lapu pu-tsit mung, nga ai ngu tsun dat wu ai. Dai amu hpe tara dara ya na matu, Gareng wa Tu Lawt gaw dumlu di dun shaprut tawn nna “gai, nan kawa teng ai wa gaw hpye na re, n kawa teng ai wa gaw hpa n ra na re” ngu matan tsun nhtawm, dai dumlu di hta gumhtawn bang shangun nu ai da. Shaloi, shingchyut gaw hpa mara n lu ai majaw hpa zawn n nawn, aloisha gumhtawn bang matwa nna hpa n ra ai sha, bai nhtang pruwa sai da. Putsit gaw mara lu ai hte hkrit nna dumlu di kaw gumhtawn bang na n gwi ai majaw, ningmai daw sha, kahtawk bang dat chyam yu ai shaloi, hpye hkut mat nu ai da. Dai shani kaw nna pu-tsit ningmai hkyeng mat ai re ai nga, hkaitsun ma ai. Gareng Tu Lawt gaw, pu-tsit hpe nang gaw masu ai majaw, shinggyim masha ni mu jang baw abyen ya u ga law, ngu dagam dat ya sai. Lapu tsit mung, ngai mung lahtin sha gaw achye la na, ngu bai htan nna dagam da masai da.
Dai majaw, Kachin myusha ni, htawnghkun nhpye maka kaw 1. Pu-tsit singgaw maka, 2. Shingchyut lagaw maka, 3. Shabapu maka, 4. Kabrang bra maka, 5. Dumlu di maka, 6. Kahkum tum maka ni hkumtsup hkra, lawm ra ai nga nna bang lang ma ai. Da labu hte nhpye maka mying ginshi ni : 1. Lasi maka, 2. Singnat maka, 3. Natlup maka ni, rai nga ai.
Maka amyu mying ni
1. Pu-tsit singgaw maka,
2. Shingchyut lagaw maka,
3. Shabapu maka,
4. Kabrang bra maka,
5. Kabrang bra singgaw maka,
6. Kahkumtum maka,
7. Kumgyintum maka,
8. Hkrintawng di maka,
9. Gabri maka,
10. Singgaw maka,
11. Gajit maka,
12. Gumlau htawnghkin maka,
13. Zingret maka,
14. Pasham maka,
15. Saihrang shingkyit maka,
16. Damsi maka,
17. Yahpyen maka,
18. Baren maka,
19. Uraw sing gaw maka... Labu maka.
20. Hkaugawng maka... Labu maka.
21.Jengwang maka... Labu maka.
22. Hpaqhka ru maka... Labu maka.
23. Gashawn maka... Labu maka.
24. Nhtat nmyi... Labu maka.
25. Kahkrem maka... Labu maka.
26. Zingret maka... Labu maka, Nhpye maka
27. Zendau maka... Labu maka.
28. Masha baw... Labu maka.
29. Chyahkyi shinglang... Labu maka.
30. Shu shatin... Labu maka.
34. Myi pawng maka... Nhpye maka.
35. Kahkumtum... Nhpye maka.
36. Hkanhkang maka... Nhpye maka.
37. Kawang maka... Labu maka.
38. Kazu maka... Labu maka...
zawn re ni rai nga ai. Maka mying ni lawqlaw hta na kachyimyi hpe sumla hte madun dat ai.
Manmaw Ahkawn
