MUNGKAN NTSA NGA MANGA GAW GARA HKU BYIN TAI WA AI RAI

MUNGKAN NTSA NGA MANGA GAW GARA HKU BYIN TAI WA AI RAI

ZINGHANG TANG

Mungkan baw rai a paw pru byintai galai nga ai hpe nchye chyang yang, hkam la tawn ai jasat jasa makam ni mung njaw nteng man ai byin nga ai, jasat jasa makam nteng man yang, duk shamak kam sham, duk shamak galaw ai tai nna, myit n-gun sut n-gun lila shama ai, lila myit shawam la gawm kau ai law law shabyin nga ai re, chye chyang hkam la ai shut nna akyu nrawng ai kaw myit n-gun sut n-gun lila shama ai gaw, dinghku langai a nga mu nga mai lam hta nnga, rawt jat zinghka lam hta unga aja awa dingbai dingna jaw nga ai. Mungkan baw rai paw pru zinghka byin galai shamu shamawt na ai hpe. kaja byin ai hte maren chye chyang yang she hkam la ai myit jasat hte makam teng man nhtawm galaw shamu shamawt sa ai tengman nna akyu sali kaja padang lu la nga ai. Dai rai nna Wunpawng sha ni leng man tara hpe chye chyang nhtawm tengman rum ai makam hpe hkaijung da lu na matu, ndai mungkan baw sumhpa hpe gara hku byin pru wa ai ahkyak lamang kaba hpe tang madun jahkrak dat nngai. Ndai ahkyak lamang kaba gaw makam jawjau lam hte matut manoi seng hkat nga ai rai nna amyu sha makam jaw jau lam hta gayep nna tang madun mat wa na nngai.

BAWRAI MUNGKAN HTE MYIT JASAT MUNGKAN

Mungkan ntsa na baw sumhpa hpe baw rai hte myit ngu shingchyawm madun lu nga ai. Ndai hpe baw rai mungkan hte myit masin mungkan ngu ginhka shamying nga ma ai. Mungkan ntsa na mun Mungkan baw rai sen rai bung hkat ai rai ni yawng gaw, bawrai ngu ai kaw mazum nga ai. Tawngleng grin nga ai nhprang lungkring lung kya, ga nai hkrang jahkai tu kram hpun, du sat du myeng shinggyim masha ni yawng mung baw rai a daw chyen ni krai rai nga ai, shinggyim wuhpung mung baw rai shamu shamawt gata na daw chyen ni hkrai rai nga ai. Baw rai ngu ai hta, lwi hkawm shamu nga ai hka shi hka nu, ing nga ai nawng panglai hka san ntsin nga yang, lwi gayun ai baw rai hpan langai hku grin nga ai. Lwi ntsin hka hte hprai shai ai baw rai ni hpe hkru hkat wa shangun lu ai, chyi yang htoi tu ai wan ngu ai mung grin nga ai. Bai nna mungkan ga dam ting hta yu nmu jum nlu ai, dingdung dingda hprai shai ai gang chyup n-gun, hpri magri sumri hte nbung hpun lam kaw lawan dik ai hku hkawm shamu nga ai myi hprap dat gaw laklai ai baw rai hpan myi hku grin nga ai. Ndai gang chyup myi hprap dat grin nga ai gaw, mawtaw gawng shakri shachyai lu ai hte dat wan pu dat makru waya let, rediyu, ta jak, datnu ni hte laika sumla htinglet jahkrang lu ai hta sakse hkam nga ai. Hkrang hpawm masa hku yu yang, baw rai gaw manan grin nga ai re, baw rai gaw nambat langai re. Mungkan shinggyim hpawng shingra hta baw rai hte akri nbung ai myit masin ni grin nga ai.

Myit masin jasat jasa gaw baw rai a htawng dan ai re, baw rai kaw na zingran pru wa ai re, nambat lahkawng re, baw rai shawng nga nna jasat jasa ni nga wa ai re. Myit masin jasat jasa ngu ai gaw, shinggyim masha a nu nyan zinghka wa ai hta hkan nna paw pru wa ai myit jasat ni tai nga ai. Masha myit mang sumru ai, myit la hkaw tsun ai; myit la hta hkaw tsun ai ni myit hta jung rawng wa nna makam masham myit byin wa ai, myit la hkaw tsun ai ni hpe jahkrak shingyan nna mung masa chyum tara, jaw jau tsun tara shabyin ai, masa tara, upadi tara zawn re ni rai nga ai. Jahkrak shing-yan da ai jasat jasa chyum tara gaw, masha hpe hkaw tsun gang hpawng chyawm ai, masha hpe jum hkang ai ahkyak zai nyan lak hkai byin nga ai re. Baw rai mungkan hta baw sumhpa a byin galai na rai hpe atsawm chye chyang yang she, hkam la ai myit jasat chyum tara ni tengman na rai. Mungkan ntsa na baw sumhpa magup gata hku byin pru wa ai re ta? Kadai wa e hpan da ai re ta? Ndai ga san ahkyak lamang hpe, kadai gara hpungtang hpaji sara wa nnga ahkum atsup mahtai jaw lu na nrai tim, ndai prat na masha a nu nyan hte hpuntang hpaji chye chyang kunghpan ai tsaw dik sai rai nna, mungkan ga shan byin galai labau, hkrung jahkai zinghka labau hte shinggyim sha zinghka labau ni hte anhte dep mu ai daw na baw sumhpa magup a matu ndai paw pru byin galai nga ai hpe hkrang hpawn masa, hpuntang hpaji madang tsaw mung masa hte nna azin ayang htep lahti hku maram yang, teng man ai mahtai kau chyen lu la mai nga ai, anhte hpe rawt jat kunghpan wa sha-ngun lu nga ai.

Anhte shawng mu chye ging ai gaw.mungkan ntsa na baw sumhpa magup a lam hpe tengman ai hku chye chyang ai gaw, moi prat na masha ni nrai nna ndai lak prat na nu nyan jasat jasa ai prat dep hpungtang hpaji chye ai ni sha rai nga ai. Ndai prat na masha ni she ga htap lungkring byin grin wa ai shaning wanri gade na sai, masha du sat si mat nra ni ga gata ge rawng mat ai shaning pawng mun sen gade na mat sai nga ai hpe sawn tawt la lu nga sai re. Ndai prat na masha ni she sumsing ginra kawp yen gayin nna sumsing ginra hta hpa baw baw rai grin nga ai htep lahti yu maram chye la lu nga ai. Moi prat na du magam hkawhkam, myi htoi dumsa nat hkin jawng, jaw jau hpung jau sara kaba ni nga tim, madang tsaw hpaji garai nchye chyang shajang ma ai majaw, baw sumhpa langai ngai hpe maju jung nna azin ayang htep lahti dinglik maram ai garai nchye galaw ma ai majaw, mungkan hta baw sumhpa mabyin lam hpe hkumtsup tengman ai hku nchye chyang shajang ma ai. Moi prat na masha ni sumhpa nkau a byin nsam hpe sha yu nna myit la de hkaw tsun ma ai majaw myit la shut ai, hkaw tsun shut tawn ai mung law law lawm nga ai re. Sakse nkau tsun madun yang, hpraw tsit ai lamu gaw didam kaba zawn mungkan hpe dagup tawn nga ai, jan gaw sinpraw de nna pru wa nhtawm sinna de gadang shang mat wa ai, shata shagan ni gaw shana e sha htoi tu ya nga ai ngu myit la shajang ai. Ndai zawn byin nsam hpe sha yu nna myit la ai gaw njaw shut ga ai re.

Grau nna gaw mungkan ga dam hte mungkan ntsa na dagu byin nsam hpe nchye shajang ma ai; marang htu hka tung ai, nbung ahpawt myi hprap gala mu ngoi mu chye ai, nnang nawn nawn wan bum gapaw ai gaw gara hku byin wa ai ngu ai dagu byin nsam hte dagu ninggun atsam hpe nchye chyang ai zawn re ni a majaw, myi hte yu nmu nchye lu ai hpung shingkang ninggun kaba dik ai mahtum mahta nat sagya, karai kasang nga ai, shinggyim masha ni nmyit madawm hkrup ai shalat shabyin ai gaw nat karai e galaw shabyin ai re ngu myit la kau shajang nga ai. Yup nga yang kaga shara hkan hkawm sa let si mat sai ni hte bai hkrum shaga hkat ai zawn re yupmang mu ai majaw, masha hte weinyi numla rawng ai ngu myit la kau ai, gatsi gahtet nrap ra ai hte ana hkrung kanu a majaw masha machyi makaw byin wa ai she jahtung nat nyi e kawa ai re ngu nat nawng kyu hpyi shaja ai zawn re ni yawng gaw, myit la shut kam shut nna hpa lachyum npru ai galaw ai lam ni rai nga ai.